നമ്പി നാരായണൻ അപമാനിക്കുന്നത് ഐ.എസ്.ആർ.ഒയെ- ശശികുമാർ

ഒരു വസ്തുതയുമില്ല. അത് എൽ.പി.എസ്.സി. ഡയറക്ടർ മുത്തുനായകം തന്നെ നേരത്തെ വ്യക്തമാക്കിയതാണല്ലോ? ഒരു കാര്യം പ്രത്യേകം ശ്രദ്ധിക്കണം. 1998-ൽ  ഈ കേസ് സുപ്രീം കോടതി അവസാനിപ്പിച്ചതാണ്. ഞാൻ നേരിട്ട് വാദിച്ചാണ് കേസ് ജയിച്ചത്. നമ്പി വെളിയിൽ നിൽക്കുകയായിരുന്നു. മൂന്നു വർഷത്തോളം ഇരുന്ന് നിയമം പഠിച്ചാണ് ഞാൻ വാദിച്ചത്. ഞാൻ 99-ൽ റിട്ടയർ ചെയ്തു. അത് കഴിഞ്ഞ് നാലു വർഷം കൂടി ഐ.എസ്.ആ.ർഒയിൽ  നമ്പി ഉണ്ടായിരുന്നു. അത്ര കഴിവുള്ളവൻ ആണെങ്കിൽ അപ്പോൾ ക്രയോജനിക്ക് ഉണ്ടാക്കാമായിരുന്നില്ലേ? നാലു വർഷം  ഒരു പണിയും കൊടുക്കാതെ എന്തുകൊണ്ട് ഐ.എസ്.ആർ.ഒ. മൂലക്കിരുത്തി എന്നും ആലോചിക്കണം. നാലു വർഷം അവിടെ വെറുതെ ഇരിക്കുകയായിരുന്നു. എന്നിട്ടാണ് ഇപ്പോൾ പ്രചരിപ്പിക്കുന്നത്. കേസ് വന്നതുകൊണ്ട് ക്രയോജനിക്  ഉണ്ടാക്കുന്നത് വൈകിയെന്ന്. അദ്ദേഹത്തോട് പോയി ചോദിക്കണം 98-ൽ കേസെല്ലാം കഴിഞ്ഞ് നാലു വർഷം അങ്ങ് സർവീസിൽ ഉണ്ടായിരുന്നല്ലോ, എന്ത് മലയാണ് അങ്ങ് മറിച്ചത് എന്ന്. വലിയ ശാസ്ത്രജ്ഞൻ ആണെന്നാണല്ലോ അവകാശപ്പെടുന്നത്. ചുമ്മാ ഇരുന്ന് ശമ്പളം വാങ്ങിച്ചതല്ലാതെ ഐ.എസ്.ആർ.ഒയ്ക്ക് വേണ്ടി എന്താണ് താങ്കൾ ആ നാല് കൊല്ലം കോൺട്രിബ്യൂട്ട് ചെയ്തത് എന്ന് ഒന്നു ചോദിക്കാമോ? നമ്പിക്ക് ഇത്രമാത്രം കഴിവുണ്ടെങ്കിൽ ആ ചുമതല ഐ.എസ്.ആർ.ഒ. അദ്ദേഹത്തെ ഏൽപ്പിക്കില്ലായിരുന്നോ? അല്ലെങ്കിൽ നമ്പിക്ക് പറയാമല്ലോ ഇത് ഞാൻ ഉണ്ടാക്കിയതാണ്, ഞാൻ തന്നെ തീർത്തു തരാം എന്ന്. എന്തുകൊണ്ട് പറഞ്ഞില്ല. അദ്ദേഹം ഓടി രക്ഷപ്പെടുകയായിരുന്നു. ആളില്ലാത്ത പോസ്റ്റിലേക്ക് എത്ര ഗോളു വേണമെങ്കിലും അടിക്കാം. ഞാനാണ് എല്ലാം  എന്ന രീതിയിൽ കലാം പോലും ഒരിക്കലും  പറഞ്ഞിട്ടില്ല. പറയുകയുമില്ല. അത് അന്തസ്സിന്റെ പ്രശ്നമാണ്.

വൈക്കിങ് എഞ്ചിന്റെ ടെകനോളജി ട്രാൻസ്ഫറിന് വേണ്ടി ഇന്ത്യ ഫ്രാൻസിലേക്കയച്ച 53 അംഗസംഘത്തിന്റെ ലീഡർ നമ്പി ആയിരുന്നു. പക്ഷെ, നയിച്ചു എന്നൊക്കെപ്പറയുന്നത് തന്നെ ശരിയല്ല. ഇവിടെ നിന്നയച്ച സംഘത്തിന്റെ കാര്യങ്ങൾ നോക്കാൻ ചുമതലപ്പെടുത്തിയത് നമ്പിയെ ആണ്.

അതിന് വികാസ് എഞ്ചിൻ ഡെവലപ്പ് ചെയ്തത് നമ്പിയല്ലല്ലോ! വികാസ് എഞ്ചിൻ എന്നത് ഒരു പേര് മാത്രമാണ.് യഥാർത്ഥത്തിൽ അത് ഫ്രാൻസിന്റെ വൈക്കിങ് എഞ്ചിനാണ്. അതിന്റെ ഡിസൈൻ നടത്തിയത് ജർമ്മൻകാരനാണ്. രണ്ടാം ലോകമഹായുദ്ധം കഴിഞ്ഞപ്പോൾ ഫ്രാൻസിലേക്ക് വന്ന ഒരു ജർമ്മൻ ശാസ്ത്രജ്ഞനാണതിന്റെ ശിൽപ്പി. അതിൽ നമുക്ക് തീരുമാനമൊന്നും എടുക്കാനില്ല. ഫ്രാൻസിൽനിന്ന് കിട്ടിയ ഡ്രോയിങ് നാട്ടിൽ കൊണ്ടുവന്ന് ഒരു കമ്പനിയിൽ ഫാബ്രിക്കേറ്റ് ചെയ്യണം. അത് ചെയ്തത് നമ്പിയല്ല. കാശി വിശ്വനാഥനാണ്. അത് ടെസ്റ്റ് ചെയ്ത് ക്വാളിറ്റി ഉറപ്പാക്കിയതും നമ്പിയല്ല. അത് കരുണാനിധിയാണ്. മഹേന്ദ്രഗിരിയിലാണത് ചെയ്തത്. അതിന്റെ പിതൃത്വം നമ്പി ഏറ്റെടുക്കരുത്. കരുണാനിധിയും കാശി വിശ്വനാഥനും നമ്പിയുമെല്ലാം നേരിട്ട് റിപ്പോർട്ട് ചെയ്യുന്നത് മുത്തുനായകത്തിനാണ്. ഞാനും ക്രയോ പ്രോജക്ടിൽ വന്നപ്പോൾ മുത്തുനായകത്തിനാണ് റിപ്പോർട്ട് ചെയ്തത്. ഫ്രാൻസിൽനിന്ന് അതിന്റെ ഡിസൈൻ ഇന്ത്യയിൽ കൊണ്ടുവന്ന് ഫാബ്രിക്കേറ്റ് ചെയ്തെടുക്കാൻ ഈ നമ്പിയുടെ ടീം 18 വർഷം എടുത്തു. അതെ സമയത്താണ് നാല് സ്റ്റേജ് ഉള്ള എസ്.എൽ.വി. എന്ന ലോഞ്ച് വെഹിക്കിൾ കലാമിന്റെ നേതൃത്വത്തിൽ ഞങ്ങൾ എട്ടു വർഷം കൊണ്ട് പൂർത്തിയാക്കിയത്.

ഒരിക്കലുമില്ല. അതൊക്കെ മസാലയാണ്.

ഇല്ല. അവർ തിരുവനന്തപുരത്ത് സെക്രട്ടേറിയറ്റിൽ വന്ന് നമ്പി പറഞ്ഞത് മാത്രം എഴുതിക്കൊണ്ടുപോയി. അതിന്റെ 150 മീറ്ററിനകത്ത് താമസിക്കുന്ന എന്ന വിളിപ്പിച്ചില്ല. അത് ഒരിക്കലും ശരിയല്ല. ബന്ധപ്പെട്ട എല്ലാവർക്കും പറയാനുള്ളത് കേൾക്കേണ്ടേ?

അതിനെക്കുറിച്ച് എനിക്ക് അറിയില്ല. യെസ് പറയാനും എനിക്കറിയില്ല നോ പറയാനും എനിക്കറിയില്ല. പക്ഷേ, തമിഴ്‌നാട്ടിൽ നമ്പിക്ക് ഒരുപാട് കോൺടാക്ട്സ് ഉണ്ട്. നങ്കുനേരി എന്ന സ്ഥലത്താണ് അത്.

ചാരക്കേസിൽ താങ്കളെ ഉൾപ്പെടുത്തിയതിൽ കേസെടുത്ത വിജയനോ അന്വേഷണ സംഘത്തലവൻ സിബി മാത്യുവിനോ താങ്കളോട് വല്ല പൂർവവിരോധവും ഉണ്ടോ?

ഒരു പൂർവ്വവിരോധവും ഇല്ല.

നമ്പി നാരായണൻ അമേരിക്കയിലെ പ്രീസ്റ്റൻ യൂണിവേഴ്സിറ്റിയിൽ പഠിക്കാൻ പോയത് വലിയ സംഭവമായിരുന്നോ?

ഒരു കാര്യവുമില്ല. അന്ന് ബി.ടെക്. കഴിഞ്ഞവർ എം.ടെക്. ചെയ്യും. ലോകത്തെ വലിയ വലിയ യൂണിവേഴ്സിറ്റികളിൽ പ്രവേശനത്തിന് ഒരു പ്രയാസവുമുണ്ടാകില്ല. എനിക്കുതന്നെ മിനിസോട്ട യൂണിവേഴ്സിറ്റിയിൽ കിട്ടിയതാണ്. പക്ഷെ, ഞാൻ പോയില്ല. ഞാൻ കേരള യൂണിവേഴ്സിറ്റിയിൽ ആണ് പഠിച്ചത്. സെക്കൻഡ് റാങ്ക് ഉണ്ടായിരുന്നു. അന്ന് ഏത് യൂണിവേഴ്സിറ്റിയിലും പ്രവേശനം കിട്ടുമായിരുന്നു. പോസ്റ്റ് ഗ്രാജ്വേഷൻ  ചെയ്തത് ജർമ്മനിയിലെ ആക്കൻ യൂണിവേഴ്സിറ്റിയിലാണ്. മെറ്റലർജിയിൽ ലോകത്ത് പെരുകേട്ട യൂണിവേഴ്സിറ്റിയാണത്.

നാസയിലെ ജോലി സ്വീകരിക്കാതെ ഇന്ത്യയിലേക്ക് വന്നതിന്റെ ദേഷ്യമാണ് അമേരിക്കയ്ക്ക് നമ്പിയോട് എന്നു പറയുന്നുണ്ടല്ലോ?

നോക്കൂ, നമ്മുടെ മുമ്പിൽ ഇരിക്കുന്ന ആൾക്ക് വിദ്യാഭ്യാസം ഉണ്ടെങ്കിലും ഈ കാര്യങ്ങളിൽ ഒന്നും വിവരമില്ലെങ്കിൽ അവരെ പലതും പറഞ്ഞ് വിശ്വസിപ്പിക്കുവാൻ നമ്പി വളരെ വിദഗ്ധനാണ്. 1960-കളിൽ എൻജിനീയർമാർ വളരെ കുറച്ചേയുള്ളൂ. ഇന്ത്യയിൽ മാത്രമല്ല, അമേരിക്കയിലും വളരെ കുറച്ചേ ഉള്ളൂ. അന്ന് ഇന്ത്യയിൽനിന്നും ഫിലിപ്പൈൻസിൽനിന്നും മറ്റ് പല രാജ്യങ്ങളിൽനിന്നും വന്ന എൻജിനീയർമാരെ നാസ എടുത്തിട്ടുണ്ട്. പല പോസ്റ്റുകളിലേക്ക് എടുത്തിട്ടുണ്ട്. അതിൽ വലിയ അത്ഭുതം ഒന്നുമില്ല. നമ്പിയെ ഏതെങ്കിലും പ്രോജക്ടിൽ ഉൾപ്പെടുത്താമെന്ന് പറഞ്ഞിട്ടുണ്ടാകാം. അത് വലിയ കേമൻ ആയതുകൊണ്ട് ഒന്നുമല്ല. എന്റെ കൂടെ ജോലി ചെയ്ത ഒരു എൻജിനീയർ രവീന്ദ്രൻ കൊല്ലം സ്വദേശിയാണ്. നാസയിൽ പോയിട്ടുണ്ട്. അതിലൊന്നും ഒരു അത്ഭുതവും ഇല്ല. അദ്ദേഹം ഇതും വിളിച്ചുപറഞ്ഞ് നടക്കുന്നുണ്ടോ? നാസ, പ്രീസ്റ്റൺ യൂണിവേഴ്സിറ്റി എന്നൊക്കെ കേട്ടാൽ എന്തോ മഹത്തായ സംഭവമാണെന്ന് ധരിക്കുന്ന കുറച്ചധികം വിഡ്ഢികൾ നമ്മുടെ നാട്ടിലുണ്ട്. അവരാണ് ഇതൊക്കെ പാടി നടക്കുന്നത്.

നമ്പിയുടെ അവകാശ വാദങ്ങളിൽ കഴമ്പില്ലെന്നാണോ പറയുന്നത്?

ഒരു കാര്യം ഞാൻ പറയാം.  മുത്തുനായകത്തിന്റെ കീഴ്ജീവനക്കാരിൽ ഒരാൾ മാത്രമായിരുന്നു നമ്പി. അമേരിക്കൻ യൂണിവേഴ്സിറ്റിയിൽനിന്ന് ഡോക്ടറേറ്റ് എടുത്തുവന്ന ആളാണ് മുത്തുനായകം. നമ്പി ചെയ്തത് പി.ജിയാണ് എന്നോർക്കണം. മുത്തുനായകത്തിന് നാസയുടെ അസൈൻമെന്റ് ഉണ്ടായിരുന്നു. ആ ജോലിയിൽ ഏതാനും മാസം പ്രവർത്തിച്ചുകൊണ്ടിരിക്കുമ്പോഴാണ് സാരാഭായി പിടിച്ച് ഇന്ത്യയിലേക്ക് കൊണ്ടുവന്നത്. ആ സമയത്തൊക്കെ നമ്പി ഏറ്റവും താഴത്തെ ഗ്രേഡിലാണ്. ടെക്നിക്കൽ അസിസ്റ്റന്റ് എന്ന് പറയും. എന്നാൽ ഇപ്പോൾ എന്തൊക്കെയാണ് പറഞ്ഞു നടക്കുന്നത്? കഴിഞ്ഞ ദിവസം ഒരു ഇന്റർവ്യൂ കണ്ടു. ഞാൻ ജനിച്ചില്ലായിരുന്നെങ്കിൽ ഇന്ത്യയ്ക്ക് എന്തോ സംഭവിക്കുമായിരുന്നു എന്ന രീതിയിലാണ് വെച്ചുകാച്ചുന്നത്. നമ്പി എന്റെ സുഹൃത്തൊക്കെ തന്നെയാണ്. എന്നാൽ ഇങ്ങനെയൊക്കെ പറയാമോ? ഒരു ബേസിക് ഡീസൻസി  വേണ്ടേ. ഇതൊക്കെ അറിയാവുന്നവർക്ക് കേൾക്കുമ്പോൾ് അരോചകം ആവില്ലേ? എല്ലാവരും വിഡ്ഢികളാണെന്ന് ധരിക്കാൻ പാടുണ്ടോ? എന്നെ ഐ.എസ്.ആർ.ഒയിൽ കൊണ്ടുവന്നത് സാരാഭായിയാണ് പക്ഷേ ഞാൻ അതും വിളിച്ചു പറഞ്ഞു നടക്കുന്നില്ല. ഇതുപോലുള്ള ഒരു സ്പേസ് പ്രോഗ്രാം ഒരാളോ രണ്ടാളോ നൂറാളോ വിചാരിച്ചാൽ നടക്കുന്നതാണോ? ആയിരക്കണക്കിന് ശാസ്ത്രജ്ഞർ നിശബ്ദമായി ജോലി ചെയ്തുകൊണ്ടിരിക്കുന്ന ഒരു സ്ഥാപനത്തെയാണ് ഇങ്ങനെ അപമാനിക്കുന്നത് .ഇതെല്ലാം ഞാനാണ് ഉണ്ടാക്കിയത് എന്ന്. പാവം ജനങ്ങൾ അങ്ങനെ ധരിക്കുകയും ചെയ്യുന്നു. ഇത് കൊടിയ ദ്രോഹമാണ്. ഇതൊക്കെ ഒരാളങ്ങ് കയറി അവകാശപ്പെടുക എന്ന് പറഞ്ഞാൽ ശുദ്ധമായ മലയാളത്തിൽ പറഞ്ഞാൽ പോക്രിത്തരമാണ്.