പട്ടികടി രൂക്ഷമായി തുടരും...

നെടുങ്കണ്ടത്ത് തെരുവുനായശല്യത്തിന് പരിഹാരമില്ല

നെടുങ്കണ്ടം : ടൗണിലും പരിസരപ്രദേശങ്ങളിലും തെരുവുനായശല്യം രൂക്ഷമാകുന്നു. കൂട്ടമായി അലഞ്ഞുതിരിയുന്ന നായ്ക്കൾ കാൽനടയത്രക്കാർക്കും ഇരുചക്രവാഹന യാത്രക്കാർക്കും ഒരുപോലെ ഭീഷണിയാവുകയാണ്. പ്രഭാതനടത്തത്തിനായി ഇറങ്ങുന്നവരും പുലർച്ചെ ആരാധനാലയങ്ങളിൽ പോകുന്നവരും തെരുവുനായ്ക്ക‌ളെ പേടിച്ച് വടിയുമായാണ് സഞ്ചരിക്കുന്നത്. നായശല്യംമൂലം പ്രഭാതസവാരി ഉപേക്ഷിച്ചവരുമുണ്ട്.

വെളുപ്പിനെ വ്യാപാരസ്ഥാപനങ്ങൾക്ക് മുൻപിൻ ഇറക്കി വെയ്ക്കുന്ന പത്രക്കെട്ടുകളും നായ്ക്കൾ കൂട്ടമായെത്തി കടിച്ചുകീറുന്ന സാഹചര്യമാണുള്ളത്. നഗരത്തിനുള്ളിൽ തെരുവുനായശല്യം രൂക്ഷമായിട്ടും അധികാരികൾ വേണ്ട നടപടി എടുക്കുന്നില്ല എന്നാണ് ജനങ്ങളുടെ ആക്ഷേപം.

എ.ബി.സി. ഉപേക്ഷിച്ചു

നായ്ക്ക‌ളുടെ പ്രജനന നിയന്ത്രണത്തിനായി നെടുങ്കണ്ടം ബ്ലോക്കു തലത്തിൽ എ.ബി.സി. സെന്റർ സ്ഥാപിക്കാൻ നടപടി തുടങ്ങിയിരുന്നെങ്കിലും പ്രാദേശിക എതിർപ്പിനെ തുടർന്ന് പദ്ധതി ഉപേക്ഷിച്ചിരുന്നു.

നായകളുടെ എണ്ണം വർധിച്ചതോടെ ഇവ മാലിന്യങ്ങൾ വലിച്ചിഴച്ച് കുടിവെള്ളസ്രോതസ്സുകൾ മലിനമാക്കുന്നതും പതിവായിരിക്കുകയാണ്. പൊതുസ്ഥലങ്ങളിലും വഴിയോരങ്ങളിലും അറവു മാലിന്യം ഉൾപ്പെടെയുള്ള മാലിന്യങ്ങൾ തള്ളുന്നതും നായ്ക്ക‌ളുടെ എണ്ണം വർധിക്കാൻ കാരണമാകുന്നുണ്ട്.

കുടുംബശ്രീപദ്ധതിയും ഉപേക്ഷിച്ചു

കുടുംബശ്രീയുടെ സഹകരണത്തോടെ തെരുവുനായ്ക്ക‌ളെ വന്ധീകരിച്ച് തുറന്നുവിടുന്ന പദ്ധതിക്ക് തുടക്കമിട്ടിരുന്നെങ്കിലും അതും പാതിവഴിയിൽ നിലച്ചു.