വൈറ്റമിൻ കെ കുറവുള്ളവരില്‍ ശ്വാസകോശ ആരോഗ്യം തകരാറിലാകുമെന്ന് പഠനം

വൈറ്റമിൻ കെ-യുടെ അളവ് കുറയുന്നത് ശ്വാസകോശാരോ​ഗ്യത്തെ ബാധിക്കുമെന്ന് പഠനം. ഇക്കൂട്ടരിൽ ആസ്ത്മ, ക്രോണിക് ഒബ്സട്രക്റ്റീവ് പൾമണറി ഡിസീസ്, വലിവ് തുടങ്ങിയ രോ​ഗങ്ങൾ കൂടുതലായിരിക്കുമെന്നും പഠനത്തിലുണ്ട് . 

പച്ചനിറത്തിലുള്ള ഇലക്കറികളിലും ധാന്യങ്ങളിൽ നിന്നുമൊക്കെ ലഭിക്കുന്ന വൈറ്റമിൻ കെ രക്തം കട്ടംപിടിക്കുന്നതിൽ വലിയ സ്ഥാനം വഹിക്കുന്നുണ്ട്. മുറിവുകൾ ഉണങ്ങാൻ ശരീരത്തെ സഹായിക്കുന്നതും ഇതാണ്. എന്നാൽ വൈറ്റമിൻ കെ-യും ശ്വാസകോശവും തമ്മിലുള്ള ബന്ധത്തെക്കുറിച്ച് വലിയരീതിയിലുള്ള പഠനങ്ങൾ മുമ്പ് നടന്നിട്ടില്ല. ഈ സാഹചര്യത്തിലാണ് കോപ്പൻഹേ​ഗൻ സർവകലാശാലയിലെയും കോപ്പൻഹേ​ഗൻ യൂണിവേഴ്സിറ്റി ഹോസ്പിറ്റലിലെയും ​ഗവേഷകർ സംയുക്തമായി പഠനം നടത്തിയത്. 

ഇ.ആർ.ജെ. ഓപ്പൺ റിസർച്ച് എന്ന ജേണലിൽ പഠനം പ്രസിദ്ധീകരിച്ചിട്ടുണ്ട്. ശ്വാസകോശത്തെ ആരോ​ഗ്യകരമായി നിലനിർത്തുന്നതിൽ വൈറ്റമിൻ കെ-യുടെ സ്ഥാനം വലുതാണെന്ന് ​പഠനത്തിൽ പങ്കെടുത്ത ഡോ.ടോർകിൽ ജെസ്പേഴ്സൺ പറഞ്ഞു. 

4,092 പേരെ ആസ്പദമാക്കിയാണ് പഠനം സംഘടിപ്പിച്ചത്. കോപ്പൻഹേ​ഗനിൽ താമസിക്കുന്ന  ഇരുപത്തിനാലിനും എഴുപത്തിയേഴിനും ഇടയിൽ പ്രായമുള്ളവരെയാണ് പഠനത്തില്‍ ഉള്‍പ്പെടുത്തിയത്. ലങ് ഫങ്ഷൻ ടെസ്റ്റ്, രക്തപരിശോധന, ആരോ​ഗ്യവുമായി ബന്ധപ്പെട്ട വിവിധ ചോദ്യങ്ങൾക്ക് ഉത്തരം നൽകൽ തുടങ്ങിയവയ്ക്കൊടുവിലാണ് ​ഗവേഷകസംഘം വിലയിരുത്തലിൽ എത്തിയത്. 

തുടർന്നാണ് വൈറ്റമിൻ കെ ശരീരത്തിൽ കുറവുള്ളവരിൽ ശ്വാസകോശത്തിന്റെ പ്രവർത്തനവും അത്രമെച്ചമായിരുന്നില്ല എന്നുകണ്ടെത്തിയത്. ഇക്കൂട്ടരിൽ സി.ഒ.പി.ഡി., ആസ്ത്മ, വലിവ് എന്നിവ കണ്ടതായും ​ഗവേഷകർ പറയുന്നു. ശ്വാസകോശാരോ​ഗ്യത്തിന് വൈറ്റമിൻ കെ നിർദേശിക്കുന്നത് ​ഗുണംചെയ്യുമോ എന്നതുതുടങ്ങി  പ്രസ്തുത വിഷയത്തിൽ വിശാലാടിസ്ഥാനത്തിലുള്ള പഠനങ്ങൾ വരേണ്ടതുണ്ടെന്നും ​ഗവേഷകർ പറയുന്നു. 

വൈറ്റമിൻ കെ സമ്പന്നമായ ഭക്ഷണങ്ങൾ

ഇലക്കറികൾ

പച്ചനിറത്തിലുള്ള ഇലവർ​ഗങ്ങളിൽ വൈറ്റമിൻ കെ ധാരാളം അടങ്ങിയിട്ടുണ്ട്. ചർമത്തിനും മുടിക്കും പ്രതിരോധശേഷിക്കും നല്ലതാണിവ.  പച്ചയ്ക്കും വേവിച്ചും കഴിക്കുന്നത് ​ഗുണം ചെയ്യും. 

ശതാവരിച്ചെടി

അവശ്യമായ വൈറ്റമിനുകൾ ഉൾപ്പെടെയുള്ളവ അടങ്ങിയ പോഷകസമ്പന്നമായ വിഭവമാണിത്. 90​ഗ്രാം വേവിച്ച ശതാവരിയിൽ നിന്ന്  72 mcg വൈറ്റമിൻ കെ ലഭിക്കും. 

ചിക്കൻ

 ചിക്കനിലും വൈറ്റമിൻ കെ നന്നായി അടങ്ങിയിട്ടുണ്ട്. 100 ​ഗ്രാം ചിക്കനിൽ 60 mcg വൈറ്റമിൻ കെ അടങ്ങിയിട്ടുണ്ട്. പ്രോട്ടീൻ, കാൽസ്യം തുടങ്ങിയവയാൽ സമ്പന്നവുമാണ് ചിക്കൻ. 

പ്രൂൺസ്

ആന്റിഓക്സിഡന്റുകൾ, ഫൈബറുകൾ എന്നിവയാൽ സമൃദ്ധമാണ് പ്രൂൺസ്. എല്ലുകളുടെയും പേശിയുടെയും ആരോ​ഗ്യം വർധിപ്പിക്കുന്ന ഇവയിലും വൈറ്റമിൻ കെ അടങ്ങിയിട്ടുണ്ട്. അഞ്ച് പ്രൂൺസിൽ 28 mcg വൈറ്റമിൻ കെ ഉണ്ട്. 

​ഗ്രീൻപീസ്

മ​ഗ്നീഷ്യം, കാൽസ്യം, പൊട്ടാസ്യം എന്നിവയാൽ സമ്പന്നമായ ​ഗ്രീൻപീസിലും വൈറ്റമിൻ കെ ധാരാളമുണ്ട്. ഇത് ഡയറ്റിൽ ഉൾപ്പെടുത്തുകവഴി ദഹനപ്രക്രിയ സു​ഗമമാക്കാം. 100 ​ഗ്രാം ​ഗ്രീൻപീസിൽ 26 mcg വൈറ്റമിൻ കെ അടങ്ങിയിട്ടുണ്ട്.