ടോയ്ലറ്റ് ഉപയോ​ഗത്തിനിടെ മൊബൈൽഫോൺ ഉപയോ​ഗിക്കുന്നവർ നിരവധിയാണ്. ഇതുണ്ടാക്കുന്ന ആരോ​ഗ്യപ്രശ്നങ്ങളേക്കുറിച്ച് കഴിഞ്ഞവർഷം ഒരു പഠനം പുറത്തുവന്നിരുന്നു. NordVPN നടത്തിയ പഠനത്തിൽ 61.6 ശതമാനംപേർ സാമൂഹികമാധ്യമങ്ങൾ ഉപയോ​ഗിക്കാനും 33.9 ശതമാനംപേർ വാർത്തകൾക്കുംവേണ്ടി ടോയ്ലറ്റിലിരിക്കെ മൊബൈൽഫോൺ ഉപയോ​ഗിക്കുന്നുവെന്ന് വ്യക്തമായിരുന്നു. ടോയ്ലറ്റ് സീറ്റിനേക്കാൾ പത്തുമടങ്ങ് കൂടുതൽ അണുക്കൾ ഇത്തരത്തിൽ മൊബൈൽഫോണിലൂടെ ശരീരത്തിൽ പ്രവേശിക്കുമെന്നും ​ഗവേഷകർ വ്യക്തമാക്കിയിരുന്നു. അണുക്കളുള്ള പ്രതലങ്ങളിൽ സ്പർശിച്ച് മൊബൈൽ ഫോൺ ഉപയോ​ഗിക്കുന്നതിലൂടെയാണ് രോ​ഗാണുക്കൾ മൊബൈൽ ഫോണിൽ അടിയുന്നത്. ബാത്റൂമിൽ മൊബൈൽ ഫോൺ ഉപയോ​ഗിക്കുന്നതുമൂലമുണ്ടാകുന്ന ചില ആരോ​ഗ്യപ്രശ്നങ്ങൾ പരിശോധിക്കാം. 

To advertise here,

ശരിയല്ലാത്ത പോസ്ചർ

ടോയ്ലറ്റിൽ ദീർഘസമയം മൊബൈൽഫോൺ നോക്കി ഇരിക്കുകവഴി പോസ്ചർ ശരിയല്ലാതാവും. ഇത് കഴുത്തിനും നടുവിനുമൊക്കെ സ്ഥിരമായ വേദനയുമുണ്ടാക്കും. ഫോൺ നോക്കാൻ വളഞ്ഞിരിക്കുന്നത് നട്ടെല്ലിനും അതിനുചുറ്റുമുള്ള പേശികൾക്കും പ്രശ്നമുണ്ടാക്കും. 

അർശസ്

ടോയ്ലറ്റിൽ മൊബൈൽ ഫോണുമായി ദീർഘസമയം ഇരിക്കുന്നവരിൽ അർശസിനുള്ള സാധ്യതയും കൂടുതലാണ്. മൊബൈൽ ഫോണുമായിരിക്കുമ്പോൾ ദീർഘസമയം ടോയ്ലറ്റിനുള്ളിൽ തന്നെ ഇരിക്കുകയും ഇത് മലദ്വാരത്തിലെ നാഡികളിൽ സമ്മർദമുണ്ടാക്കുകയും ചെയ്യുന്നതിലൂടെ അർശസിന് കാരണമാകും. 

രക്തചംക്രമണത്തെ ബാധിക്കും

മൊബൈൽ ഫോണുമായി ദീർഘസമയം ടോയ്ലറ്റിൽ ഇരിക്കുന്നവരിൽ ശരീരത്തിലെ രക്തചംക്രമണവും തകരാറിലാവും, പ്രത്യേകിച്ച് കാലുകളിൽ. ഇത് ഡീപ് വെയിൻ ത്രോംബോസിസ് പോലെ രക്തം കട്ടപിടിക്കുന്ന ആരോ​ഗ്യപ്രശ്നങ്ങൾക്ക് കാരണമാകും. മാത്രമല്ല ശരീരത്തിലെ രക്തചംക്രമണം തകരാറിലാവുന്നതിലൂടെ ഹൃദയാരോ​ഗ്യത്തെയും മോശമായി ബാധിക്കും. 

അണുക്കൾ

ബാക്ടീരിയ, വൈറസ് തുടങ്ങി വിവിധയിനം അണുക്കളുടെ കൂടാരമാണ് ടോയ്ലറ്റുകൾ. മൊബൈൽ ഫോണുമായി ടോയ്ലറ്റിലിരിക്കുന്നത് സൂക്ഷ്മാണുക്കൾ ഫോണിലടിയുന്നതിന് കാരണമാകും. ഇതിലൂടെ അണുക്കൾ ശരീരത്തിൽ പ്രവേശിക്കുകയും ടോയ്ലറ്റിനുപുറത്തുള്ള മറ്റ് പ്രതലങ്ങളിലേക്കും പടരുന്നതിനും കാരണമാകും.

കണ്ണുകൾക്ക് സമ്മർദം

മൊബൈൽഫോണിൽ നിന്നുള്ള നീല വെളിച്ചം കണ്ണിന് കൂടുതൽ സമ്മർദം നൽകും. വെളിച്ചം അധികം കടക്കാത്ത ബാത്റൂമിലും ടോയ്ലറ്റിലും ഇവ ഉപയോ​ഗിക്കുന്നതിലൂടെ ഈ പ്രശ്നം കൂടും. പ്രത്യേകിച്ച് രാത്രികാലങ്ങളിൽ ടോയ്ലറ്റിൽ മൊബൈൽ ഫോൺ ഉപയോ​ഗിക്കുന്നത് ഉറക്കത്തേയും തകരാറിലാക്കും.