വയറു നിറയും ബ്ലോട്ടിങ് തടയും; മുളപ്പിച്ച ചെറുപയറുകൊണ്ട് സൂപ്പർ സാലഡ് തയ്യാറാക്കാം

വയറിന് യാതൊരു ഭാരവും തോന്നിക്കാതെ ദിവസം മുഴുവൻ നിലനിൽക്കുന്ന ഊർജം നൽകുന്ന ഉച്ചഭക്ഷണം കഴിച്ചു നോക്കിയിട്ടുണ്ടോ? ചോറും കറികളും കൂട്ടി ‘ഹെവി ലഞ്ച്’ കഴിച്ച് ഉറക്കം വരുന്ന രീതിയിൽ ഊണ് കഴിക്കുന്ന പതിവു രീതിയിൽനിന്ന് ഒന്ന് മാറ്റിപ്പിടിച്ചാലോ?

ചെറുപയർ മുളപ്പിച്ച് തയ്യാറാക്കുന്ന സാലഡ് അത്തരത്തിലുള്ള ഒരു ഹെൽത്തി ഭക്ഷണമാണ്. ദഹനക്കുറവുള്ളവർക്ക് ഈ സാലഡ് വളരെ നല്ലതാണ്. അല്പം ചൂടോടെയോ അല്ലാതെയോ കഴിക്കാവുന്ന ഭക്ഷണമാണിത്. 

ആയിരക്കണക്കിന് വർഷങ്ങളായി ഇന്ത്യൻ ഭക്ഷണരീതിയുടെ ഭാഗമായ പരിപ്പ്, ദഹിക്കാൻ ഏറ്റവും എളുപ്പമുള്ള പയറുവർഗ്ഗങ്ങളിൽ ഒന്നാണ്. പോഷകങ്ങൾ ശരീരം എളുപ്പത്തിൽ സ്വീകരിക്കാനും ദഹന പ്രശ്‌നങ്ങൾ കുറയ്ക്കാനും വീടുകളിൽ പരിപ്പ് മുളപ്പിച്ച് ഉപയോഗിക്കുന്നത് ഒരു പരമ്പരാഗത രീതിയാണ്.

മുളപ്പിക്കൽ പ്രക്രിയ പ്രകൃതിദത്തമായ എൻസൈമുകളെ സജീവമാക്കുകയും പരിപ്പിനെ കുടലിന് ദഹിക്കാൻ എളുപ്പമുള്ളതാക്കുകയും ചെയ്യുന്നു.

മുളപ്പിച്ച ചെറുപയറിൽ ധാരാളം പ്ലാൻറ് പ്രോട്ടീൻ, നാരുകൾ, ദഹനത്തെ മെച്ചപ്പെടുത്താനും വായുകോപം കുറയ്ക്കാനും സഹായിക്കുന്ന എൻസൈമുകൾ എന്നിവയെല്ലാം അടങ്ങിയിട്ടുണ്ട്.

ശാരീരിക പ്രവർത്തനങ്ങൾ കുറയുന്നതിനാൽ ദഹനം സാവധാനത്തിലാകുന്ന തണുപ്പുകാലത്ത് ഇത് വളരെ പ്രയോജനകരമാണ്. മുളപ്പിച്ച പയറിലടങ്ങിയ നാരുകൾ മലബന്ധം നിയന്ത്രിക്കാനും വയറു വീർക്കുന്നത് സ്വാഭാവികമായി പരിഹരിക്കാനും സഹായിക്കുന്നു.

മുളപ്പിച്ച സാലഡിൽ ചേർക്കുന്ന പച്ചക്കറികൾ ഭക്ഷണത്തിന് കൂടുതൽ സ്വാദും വൈറ്റമിനുകളും നൽകുന്നു. ഇത് ഭക്ഷണത്തെ ലൈറ്റാക്കും. ചെറുനാരങ്ങാ നീര്, ചെറിയ തോതിൽ സുഗന്ധവ്യഞ്ജനങ്ങൾ, കുറഞ്ഞ അളവിൽ എണ്ണ എന്നിവ ഭക്ഷണം എളുപ്പത്തിൽ ദഹിക്കാനും രുചി നിലനിർത്താനും സഹായിക്കുന്നു.

വയറുനിറച്ച് ഉച്ചഭക്ഷണം കഴിക്കുന്നതിൽ നിന്ന് വ്യത്യസ്തമായി, ഈ സാലഡ് ഊർജസ്വലത നിലനിർത്തുകയും മന്ദത തോന്നിപ്പിക്കാതിരിക്കുകയും ചെയ്യും.

മുളപ്പിച്ച ചെറുപയർ സാലഡ് തയ്യാറാക്കുന്ന വിധം

ചേരുവകൾ (2 പേർക്ക്):

ചെറുപയർ മുളപ്പിച്ചത് - 1½ കപ്പ്

ഉള്ളി (നന്നായി അരിഞ്ഞത്) - ¼ കപ്പ്

തക്കാളി (വിത്ത് മാറ്റിയത്, അരിഞ്ഞത്) - ¼ കപ്പ്

കക്കരി (അരിഞ്ഞത്) - ¼ കപ്പ്

നാരങ്ങാ നീര് - 1 ടേബിൾസ്പൂൺ

വറുത്ത ജീരകപ്പൊടി - ½ ടീസ്പൂൺ

കുരുമുളക് പൊടി - ¼ ടീസ്പൂൺ

ഉപ്പ് - ആവശ്യത്തിന്

എണ്ണ - 1 ടീസ്പൂൺ

മല്ലിയില (അരിഞ്ഞത്) - 1 ടേബിൾസ്പൂൺ

തയ്യാറാക്കുന്ന വിധം

1. ചെറുപയർ മുളപ്പിച്ചത് 3-4 മിനിറ്റ് നേരം അല്പം വേവിക്കുക, ഇത് എളുപ്പത്തിൽ ദഹിക്കാൻ സഹായിക്കും.

2. വേവിച്ച ചെറുപയർ ഒരു പാത്രത്തിലേക്ക് മാറ്റുക, അല്പം തണുക്കാൻ അനുവദിക്കുക.

3. അരിഞ്ഞ ഉള്ളി, തക്കാളി, വെള്ളരിക്ക എന്നിവ ചേർക്കുക.

4. വറുത്ത ജീരകപ്പൊടി, കുരുമുളക് പൊടി, ഉപ്പ് എന്നിവ വിതറുക.

5. നാരങ്ങാ നീരും എണ്ണയും ചേർക്കുക.

6. എല്ലാം നന്നായി യോജിപ്പിക്കാൻ മൃദുവായി ഇളക്കുക.

7. മല്ലിയിലകൊണ്ട് അലങ്കരിക്കുക.

8. ചൂടോടെയോ അല്ലാതെയോ വിളമ്പാം.

(ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയശേഷം മാത്രം ഭക്ഷണക്രമത്തിൽ മാറ്റം വരുത്തുക)