ന്യൂഡൽഹി: അന്താരാഷ്ട്ര ചീറ്റ ദിനത്തിൽ ഇന്ത്യയുടെ ‘പ്രൊജക്ട് ചീറ്റ’യുടെ പുതിയ നേട്ടങ്ങളിൽ അഭിമാനം പങ്കുവെച്ച് പ്രധാനമന്ത്രി നരേന്ദ്ര മോദി. ചീറ്റയെ അതിന്റെ സ്വാഭാവിക ആവാസ വ്യവസ്ഥകളിലേക്ക് പുനഃസ്ഥാപിക്കുന്നതിനുള്ള ഇന്ത്യയുടെ സ്വപ്നങ്ങൾക്ക് പ്രതീക്ഷനൽകുന്ന ഒരു പുതിയ ഘട്ടത്തിലേക്ക് രാജ്യം കാലെടുത്തുവെയ്ക്കുകയാണെന്ന് അദ്ദേഹം പറഞ്ഞു. ഒരു ദശാബ്ദത്തിലധികം നീളുന്ന പ്രയത്നത്തിൻ്റെ ഫലമായി എണ്ണത്തിലുള്ള വർധന, ആവാസ വ്യവസ്ഥയുടെ വികാസം, അന്താരാഷ്ട്ര പങ്കാളിത്തം എന്നിവയിൽ ഗണ്യമായ പുരോഗതിയാണ് രാജ്യം കൈവരിച്ചിരിക്കുന്നതെന്നും പ്രധാനമന്ത്രി പറഞ്ഞു.

To advertise here,

‘അന്താരാഷ്ട്ര ചീറ്റ ദിനത്തിൽ, നമ്മുടെ ഗ്രഹത്തിലെ ഏറ്റവും ശ്രദ്ധേയമായ ജീവികളിൽ ഒന്നായ ചീറ്റയെ സംരക്ഷിക്കാൻ ഒരുമിച്ച എല്ലാ വന്യജീവി സ്നേഹികൾക്കും സംരക്ഷകർക്കും എന്റെ ആശംസകൾ. മൂന്ന് വർഷം മുമ്പ്, ചീറ്റയെ സംരക്ഷിക്കുകയും അതിന് വളരാൻ കഴിയുന്ന ആവാസവ്യവസ്ഥ പുനഃസ്ഥാപിക്കുകയും ചെയ്യുക എന്ന ലക്ഷ്യത്തോടെ സർക്കാർ പ്രൊജക്ട് ചീറ്റ ആരംഭിച്ചു. നിരവധി ചീറ്റകളുടെ ആവാസ കേന്ദ്രമായതിൽ ഇന്ന് ഇന്ത്യ അഭിമാനിക്കുന്നു. ചീറ്റ സംരക്ഷണത്തിൽ നമ്മുടെ പുരോഗതി സാധ്യമായത് ജനങ്ങളുടെ കൂട്ടായ പിന്തുണയിലൂടെയാണ്. വന്യജീവികളെ സംരക്ഷിക്കുന്നതും പ്രകൃതിയുമായി ഇണങ്ങി ജീവിക്കുന്നതും ഇന്ത്യയുടെ നാഗരിക ധാർമ്മികതയുടെ അവിഭാജ്യ ഘടകമാണ്, ഈ ശ്രമങ്ങളിൽ ഇന്ന് ആ ചൈതന്യം നമുക്ക് ജീവനോടെ കാണാം’, അദ്ദേഹം പറഞ്ഞു.

പ്രൊജക്ട് ചീറ്റയുടെ ചരിത്രം

ഇന്ത്യയിലെ തദ്ദേശീയ ചീറ്റ ഉപജാതികളായ ഏഷ്യാറ്റിക് ചീറ്റ (അസിനോണിക്സ് ജുബാറ്റസ് വെനാറ്റിക്കസ്) ഇരുപതാം നൂറ്റാണ്ടിന്റെ മധ്യത്തിൽ വംശനാശം സംഭവിച്ചു. അതിനുശേഷം, ഏഷ്യാറ്റിക് ഉപജാതികൾ ഇറാനിൽ മാത്രമേ അതിജീവിച്ചിട്ടുള്ളൂ, അതും വിരലിലെണ്ണാവുന്നവ മാത്രം. എന്നാൽ, ഇന്ത്യയുടെ ആവാസവ്യവസ്ഥയിൽ ചീറ്റകൾക്കുള്ള അവിഭാജ്യസ്ഥാനം തിരിച്ചറിഞ്ഞ വിദഗ്ധർ ഇവയെ ഇന്ത്യയിൽ വീണ്ടും പുനരധിവസിപ്പിക്കാൻ തീരുമാനമെടുത്തു.

2022 സെപ്റ്റംബർ 17-ന്, നാല് മുതൽ ആറ് വയസ്സ് വരെ പ്രായമുള്ള അഞ്ച് പെൺ ചീറ്റകളെയും മൂന്ന് ആൺ ചീറ്റകളെയും നമീബിയയിൽ നിന്ന് വിമാനമാർഗം ഇന്ത്യയിലെത്തിച്ചു. മധ്യപ്രദേശിലെ കുനോ നാഷണൽ പാർക്കിനുള്ളിലെ ക്വാറന്റൈൻ വാസത്തിന് ശേഷം ഇവയെ തുറന്നുവിട്ടു. നമീബിയ ആസ്ഥാനമായുള്ള ചീറ്റ കൺസർവേഷൻ ഫണ്ടിലെ ലോറി മാർക്കറും ഇന്ത്യയിലെ വന്യജീവി ഇൻസ്റ്റിറ്റ്യൂട്ട് ഓഫ് ഇന്ത്യയിലെ യാദവേന്ദ്രദേവ് ഝാലയും ചേർന്നാണ് അന്ന് സ്ഥലംമാറ്റത്തിന് മേൽനോട്ടം വഹിച്ചത്. റേഡിയോ കോളറുകൾ ഘടിപ്പിച്ച ചീറ്റകളെ നവംബറിൽ വലിയ ചുറ്റുപാടിലേക്ക് മാറ്റി.

2023 ഫെബ്രുവരിയിൽ ദക്ഷിണാഫ്രിക്കയിൽനിന്ന് 12 ചീറ്റകൾകൂടി ഇന്ത്യയിലെത്തി. 2023 മാർച്ചിൽ ഇവയെ പാർക്കിൽ തുറന്നുവിടാൻ തുടങ്ങി. ഫെബ്രുവരിയിൽ ആദ്യ ചീറ്റ നാല് കുഞ്ഞുങ്ങൾക്ക് ജന്മം നൽകി. 70 വർഷത്തിലേറെയായി ഇന്ത്യയിൽ രേഖപ്പെടുത്തിയ ആദ്യത്തെ ജീവനുള്ള ചീറ്റ ജനനമായിരുന്നു അത്. മാസത്തിന്റെ അവസാനത്തിൽ ആദ്യത്തെ മരണം റിപ്പോർട്ട് ചെയ്യപ്പെട്ടു. 2024 ജനുവരി ആയപ്പോഴേക്കും പത്ത് ചീറ്റകൾ ചത്തു. ഇതോടെ പ്രൊജക്ട് ചീറ്റ വലിയ തിരിച്ചടിയായെന്ന ആശങ്കയുയർന്നു.

എന്നാൽ, പിന്നീട് നടത്തിയ കൂട്ടായ പ്രവർത്തനങ്ങളിലൂടെ അതിജീവിച്ച 12 ചീറ്റകളെയും സംരക്ഷിക്കാൻ കേന്ദ്രത്തിനായി. വർഷങ്ങൾക്കിപ്പുറം 2025 ഡിസംബർ കണക്കുകൾ പ്രകാരം ഇന്ത്യയിൽ 32 ചീറ്റകളുണ്ട്. അതിൽ 21 എണ്ണം ഇന്ത്യയിൽ ജനിച്ച കുഞ്ഞുങ്ങളാണ്. ഇന്ത്യയിലെ ജനനങ്ങൾ ചീറ്റകളുടെ ആഗോള എണ്ണത്തിൽ ഗണ്യമായ സംഭാവന നൽകിയിട്ടുണ്ട്. 2025 നവംബറിൽ ഇന്ത്യയിൽ ജനിച്ച പെൺചീറ്റ മുഖി അഞ്ച് കുഞ്ഞുങ്ങൾക്ക് ജന്മം നൽകിയത് നാഴികക്കല്ലായി.

ഇന്ന് രാജ്യത്തിന്റെ ചീറ്റ സംരക്ഷണം പുതിയ ഘട്ടത്തിലേക്ക് കടക്കാനുള്ള തയ്യാറെടുപ്പിലാണ്. ഇതിന്റെ ഭാഗമായി ബോട്സ്വാനയിൽനിന്ന് എട്ട് ചീറ്റകളെ ഇന്ത്യയിലെത്തിക്കും. നവംബറിൽ രാഷ്ട്രപതി ദ്രൗപതി മുർമുവിന്റെ ബോട്സ്വാന സന്ദർശന വേളയിലാണ് എട്ട് ചീറ്റകളെ ഇന്ത്യയ്ക്ക് കൈമാറാൻ ധാരണയായത്.