കാതുകളിൽ തെയ്യത്തിന്റെ ചെണ്ടമേളവും മനസ്സിൽ വിളക്കിന്റെ വെളിച്ചവുമായി ഒരു പുതിയ കാർഷികോത്സവം കൂടി എത്തിക്കഴിഞ്ഞു- തുലാം മാസത്തിലെ പത്താമത്തെ ദിവസമായ 'പത്താമുദയം'! മലയാള കലണ്ടർ പ്രകാരം തുലാം മാസത്തിലെ പത്താമത്തെ ദിവസമായ ഇന്ന് (ഒക്ടോബർ 27) പത്താമുദയമായി ആഘോഷിക്കുന്നു.

To advertise here,

കന്നിക്കൊയ്ത്ത് കഴിഞ്ഞ് വയലുകളൊക്കെ ഒരുങ്ങി നിൽക്കുന്ന സമയത്താണ് വടക്കൻ കേരളത്തിൽ ഈ മനോഹരമായ ഉത്സവം ആഘോഷിക്കുന്നത്. പ്രകൃതിയെയും സൂര്യദേവനെയും വണങ്ങുന്ന, ഒരുപാടേറെ കഥകളും ആചാരങ്ങളുമുള്ള ഒരു സുദിനമാണിത്.

പത്താമുദയ ദിവസം രാവിലെ സൂര്യദേവനെയാണ് പ്രധാനമായി ആരാധിക്കുന്നത്. വീടുകളിൽ പൂജാമുറിയിലും ഉമ്മറത്തും അഞ്ച് തിരിയിട്ട നിലവിളക്ക് കൊളുത്തി വെക്കും. സൂര്യന്റെ ആദ്യ കിരണങ്ങൾ വീഴുന്ന നേരത്ത്, പ്രകൃതിക്ക് നന്ദി പറഞ്ഞുകൊണ്ട് അരിയും മലരും അവിലും ഒക്കെ ദൈവത്തിന് നിവേദിക്കുന്നു. ഇത് ഐശ്വര്യവും സമാധാനവും നൽകുമെന്നാണ് വിശ്വാസം.


കർഷകർക്ക് ഈ ദിവസം വളരെ പ്രധാനപ്പെട്ടതാണ്. അടുത്ത വിളവെടുപ്പിനായുള്ള രണ്ടാംവട്ട കൃഷിപ്പണികൾ ആരംഭിക്കുന്നത് ഈ ദിവസമാണ്. ചിലയിടങ്ങളിൽ കന്നുകാലികൾക്ക് നന്ദി പറയുന്ന 'കാലിച്ചൂട്ട്' എന്ന ചടങ്ങും ഇതിന്റെ ഭാഗമായി നടക്കാറുണ്ട്.

 

തെയ്യക്കാലത്തിന്റെ വരവ്!

ഇനിയുള്ള ദിവസങ്ങളിൽ നമ്മുടെ കാവുകളിലും തറവാടുകളിലും തെയ്യങ്ങളുടെ ചിലമ്പൊലി ശബ്ദം കേൾക്കാം. പത്താമുദയത്തോടെയാണ് മലബാറിൽ ഔദ്യോഗികമായി തെയ്യക്കാലത്തിന് തുടക്കം കുറിക്കുന്നത്.

ഈ വർഷം ഒരു പ്രത്യേകത കൂടിയുണ്ട്! ഒട്ടേറെ വർഷങ്ങൾക്ക് ശേഷം മാത്രം നടക്കുന്ന വലിയ 'പെരുങ്കളിയാട്ടങ്ങൾ' (ഉദാഹരണത്തിന്: എരമം കുറ്റൂർ മുച്ചിലോട്ട് ഭഗവതി ക്ഷേത്രം, പയ്യന്നൂർ എടാട്ട് ഏടനാട് തിരുവർക്കാട് ഭഗവതി ക്ഷേത്രം എന്നിവടങ്ങളിൽ) ഈ സീസണിലാണ് നടക്കുന്നത്. 'വയനാട്ടുകുലവൻ' തെയ്യങ്ങളും ഇത്തവണ ഒട്ടേറെ കാവുകളിൽ അരങ്ങേറുന്നുണ്ട്.

പ്രകൃതിയെ സ്നേഹിക്കാനും മണ്ണിൽ പൊന്നുവിളയിക്കുന്ന കർഷകരെ ബഹുമാനിക്കാനും നമ്മെ പഠിപ്പിക്കുന്ന ഉത്സവമാണിത്. പ്രകൃതിയെ ഒരു ദോഷവും വരുത്താതെ കാത്തുസൂക്ഷിക്കുമെന്ന് ഉറപ്പുനൽകുന്ന ഒരു നല്ല നാളുകൂടിയാണ് പത്താമുദയം.