തിരുവനന്തപുരം: മിനിമം മാർക്ക് വേണ്ടെന്നുവെച്ചതോടെ, എസ്.എസ്.എൽ.സി. പരീക്ഷയിൽ ഗുണനിലവാരം ഉറപ്പാക്കാൻ ഈ വർഷം ചോദ്യങ്ങൾ കടുപ്പിക്കേണ്ടിവരും. വാരിക്കോരി മാർക്കിടുന്ന പഴയരീതി ആവർത്തിക്കാതിരിക്കാനും അർഹരായവർ വിജയിച്ചുവരുന്നുണ്ടെന്ന് ഉറപ്പാക്കാനുമാണിത്. മിനിമം മാർക്ക് നടപ്പാക്കുന്നതിനുമുന്നോടിയായി മൂന്നുതരത്തിലുള്ള ചോദ്യഘടന നിശ്ചയിച്ചായിരുന്നു കഴിഞ്ഞ എസ്.എസ്.എൽ.സി. പരീക്ഷ. നൂറുമാർക്കുള്ള പരീക്ഷയിൽ എളുപ്പമുള്ളവ-30 ശതമാനം, ശരാശരി-50 ശതമാനം, കടുപ്പമുള്ളവ-20 ശതമാനം എന്നിങ്ങനെയായിരുന്നു ചോദ്യഘടന. ഇതോടെ, കടുപ്പമുള്ള 20 ശതമാനം മാർക്കിനുള്ള ഉത്തരംകൂടി കൃത്യമായി എഴുതുന്നവർക്കേ മുഴുവൻവിഷയങ്ങൾക്കും എ പ്ലസ് ലഭിക്കൂവെന്നായി. 2025-’26 അധ്യയനവർഷത്തെ പത്താംക്ലാസ് ഫലത്തിൽ എ പ്ലസുകാരുടെ എണ്ണം പകുതിയായി കുറഞ്ഞു. മുൻവർഷത്തെ 61,449-ൽനിന്ന് 30,514 ആയി.

To advertise here,

ഈ അധ്യയനവർഷം മിനിമം മാർക്ക് ഒഴിവാക്കിയെങ്കിലും ഇതേ ചോദ്യഘടന പിന്തുടർന്നാൽ നിലവാരം ഏറക്കുറെ ഉറപ്പാക്കാനാവുമെന്ന് ചൂണ്ടിക്കാണിക്കപ്പെടുന്നു. മിനിമം മാർക്ക് ഏർപ്പെടുത്തിയ 2024-’25 അധ്യയനവർഷം മുതൽക്കേ ഹൈസ്കൂൾ ക്ലാസുകളിൽ ഈയൊരു സമീപനം സ്വീകരിച്ചിരുന്നതായി അധികൃതർ പറഞ്ഞു.

2025-’26-ലേത് പുതിയ സ്കൂൾ പാഠ്യപദ്ധതി വന്നശേഷമുള്ള ആദ്യ എസ്.എസ്.എൽ.സി. പരീക്ഷയായിരുന്നു. ‌പാഠ്യപദ്ധതി മാറിയെങ്കിലും വിജയശതമാനം കാര്യമായി കുറഞ്ഞില്ല. 4,14,290 വിദ്യാർഥികൾ പരീക്ഷയെഴുതിയതിൽ 4,10,456 പേർ വിജയിച്ചു.-99.07 ശതമാനം. മുൻവർഷത്തെ ഫലം 99.5 ശതമാനമായിരുന്നു.