പുസ്തകം തുറന്നുവെച്ച് പരീക്ഷയെഴുതിയാൽ എന്തു സംഭവിക്കും? കോപ്പിയടിയാണോ ഓപ്പൺ ബുക്ക് എക്‌സാം

പരീക്ഷാഹാളിൽ ചോദ്യപ്പേപ്പറിനൊപ്പം പാഠപുസ്തകം കൂടി തന്ന് 'ഇത് നോക്കി എഴുതിക്കോളൂ' എന്ന് അധ്യാപകർ പറയുന്ന രംഗമായിരിക്കും എം.ജി സർവകലാശാല ഓപ്പൺ ബുക്ക് പരീക്ഷ നടത്തുമെന്ന് പ്രഖ്യാപിച്ചതോടെ പലരും മനസിൽ കണ്ടിരിക്കുക. അടുത്ത അധ്യയന വർഷം മുതൽ നാല് വർഷ ബിരുദം നടപ്പാക്കുന്നതോടെ ഇന്റേണൽ പരീക്ഷകൾ പുസ്തകം നോക്കി എഴുതുന്ന മാതൃകയിലാകുമെന്നാണ് സർവകലാശാല അറിയിച്ചിരിക്കുന്നത്. കേരളത്തിന് അത്ര പരിചിതമല്ലെങ്കിലും ദേശീയ രാജ്യാന്തര തലത്തിലെ നിരവധി സർവകലാശാലകളിലും കോളേജുകളിലും ഇന്ന് ഓപ്പൺ ബുക്ക് പരീക്ഷാ രീതി നിലവിലുണ്ട്. ഡൽഹി, പോണ്ടിച്ചേരി, ജാമിയ മില്ലിയ, ബനാറസ്, അണ്ണാ, ഗുവാഹട്ടി സർവകലാശാലകളും നാഷണൽ ലോ സ്‌കൂളുമെല്ലാം ഓപ്പൺ ബുക്ക് പരീക്ഷ നടത്തിയവരിൽ ഉൾപ്പെടുന്നു

പാഠപുസ്തകം തുറന്നുവെച്ച് വെറുതേ ഉത്തരം പകർത്തുന്നതല്ല ഓപ്പൺ ബുക്ക് പരീക്ഷ. ക്ലാസ് മുറിയിൽ നിന്നും പാഠപുസ്തകത്തിൽ നിന്നും നിങ്ങൾ ആർജിച്ച അറിവിന്റെ അളവുകോലാണത്. കേവലം ഏതെങ്കിലും ഒരു പേജിൽ നിന്ന് അതേപടി പകർത്തി എഴുതാൻ പാകത്തിനുള്ള ചോദ്യമോ ഉത്തരമോ ഇവിടെ പ്രതീക്ഷിക്കരുത്. വിശകലന രീതിയിൽ പല ഭാഗങ്ങളിൽ നിന്നായി പാഠഭാഗങ്ങൾ റഫർ ചെയ്ത് ഉത്തരങ്ങളിൽ അവ പ്രയോഗിക്കുന്നതാണ് വാസ്തവത്തിൽ ഓപ്പൺബുക്ക് പരീക്ഷ. അതായത് ഏതെങ്കിലുമൊരു പാഠപുസ്തകം കാണാപ്പാഠം പഠിച്ചാൽ പോലും കാര്യമില്ലെന്ന് സാരം. മുൻപ് പരീക്ഷയ്ക്ക് ആവശ്യമായ പാഠഭാഗങ്ങൾ പഠിച്ച് ആ ചോദ്യങ്ങൾക്കുത്തരം നൽകിയാൽ മതിയെങ്കിൽ ഓപ്പൺ ബുക്ക് പരീക്ഷയ്ക്ക് ആ വിഷയം അരച്ച് കലക്കി കുടിക്കേണ്ടി വരും. 

പരീക്ഷയ്ക്ക് ക്ലാസ് നോട്ടുകൾ, പാഠപുസ്തകങ്ങൾ അല്ലെങ്കിൽ മറ്റ് അംഗീകൃത മെറ്റീരിയലുകൾ എന്നിവ റഫർ ചെയ്ത് ഉത്തരമെഴുതാൻ അനുവദിക്കുന്ന രീതിയാണ് ഓപ്പൺ ബുക്ക് പരീക്ഷ. കാമ്പസിലോ (പേപ്പർ അടിസ്ഥാനത്തിലോ കമ്പ്യൂട്ടർ അധിഷ്ഠിത പരീക്ഷയായോ) ഓൺലൈനിലോ (വീട്ടിൽ നിന്ന് എഴുതാം) ഓപ്പൺ-ബുക്ക് പരീക്ഷകൾ നടത്താം. ഒന്നോ രണ്ടോ ദിവസമെടുത്ത് എഴുതേണ്ട ഓപ്പൺ ബുക്ക് പരീക്ഷകളും ഇന്ന് നിലവിലുണ്ട്. പഠനം ഉപരിപ്ലവമാകാതെ പ്രയോഗത്തിന് കൂടി പ്രാധാന്യം നൽകുക എന്ന ലക്ഷ്യമാണ് ഓപ്പൺ പരീക്ഷയ്ക്ക് പിന്നിൽ. 

കാണാപ്പാഠം പഠിച്ചാൽ നോ രക്ഷ

വിദ്യാർഥികൾക്ക് അവരുടെ പാഠപുസ്തകങ്ങൾ, ക്ലാസ് നോട്ടുകൾ, മറ്റ് പഠന സാമഗ്രികൾ എന്നിവ പരീക്ഷാ സമയത്ത് ഉപയോഗിക്കാം. ചോദ്യങ്ങൾ ഒരിക്കലും നേരിട്ടുള്ളവയായിരിക്കില്ല എന്നതാണ് ഓപ്പൺ ബുക്ക് പരീക്ഷയുടെ ഏറ്റവും വലിയ പ്രത്യേകത. നിങ്ങൾക്ക് വിഷയത്തിൽ എത്രമാത്രം അറിവുണ്ട്, എത്രത്തോളം ആ വിഷയം മനസിലാക്കിയിട്ടുണ്ട് എന്ന് കൃത്യമായി അളക്കപ്പെടും. ചുരുക്കത്തിൽ കാണാപ്പാഠം എന്നതിനപ്പുറം ആ അറിവ് നിങ്ങളെ എത്രമാത്രം സ്വാധീനിച്ചിട്ടുണ്ടെന്നും അത് നിങ്ങൾ എങ്ങനെ മനസിലാക്കി എന്നുമാണ് ചോദ്യകർത്താവ് നിരീക്ഷിക്കുക. പഠിച്ചത് പ്രായോഗിക രീതിയിൽ ഉപയോഗിക്കാൻ വിദ്യാർഥിക്ക് കഴിവുണ്ടോ എന്നതും ഇവിടെ കൃത്യമായി വിലയിരുത്തപ്പെടും. വിദ്യാർഥിക്ക് ഭാവിയിൽ ഇത് ഏറെ ഗുണം ചെയ്യും. പാഠഭാഗങ്ങൾ നന്നായി മനസിലാക്കി റഫർ ചെയ്യാവുന്ന രീതിയിൽ കുറിപ്പുകൾ സൂക്ഷിക്കുന്നവർക്ക് ഓപ്പൺ ബുക്ക് പരീക്ഷ അൽപം കൂടി ഗുണകരമാകും. കാണാപ്പാഠം പോലെ തന്നെ പുസ്തകങ്ങളുമായി യാതൊരു ബന്ധവുമില്ലാതെ ഒരു ഭാഗ്യപരീക്ഷണം നടത്തിക്കളയാമെന്ന ധാരണയിൽ പരീക്ഷാ ഹാളിലെത്തുന്നവർക്കും പരീക്ഷ അത്ര സുഖകരമായിരിക്കില്ല. പാഠപുസ്തകങ്ങളുമായി നിരന്തര ബന്ധമുള്ള ഒരു വിദ്യാർഥിക്കേ ഓപ്പൺബുക്ക് പരീക്ഷയിൽ മികച്ച പ്രകടനം നടത്താനാകൂ. വിഷയത്തെക്കുറിച്ച് വിദ്യാർഥികളുടെ ആശയങ്ങൾ വ്യക്തമല്ലെങ്കിൽ കേസ് സ്റ്റഡി അടിസ്ഥാനമാക്കിയുള്ളതും ക്രിയാത്മകവുമായ ചോദ്യങ്ങൾക്ക് ഉത്തരം നൽകുക എന്നത് പ്രയാസകരമാകും.

ടൈം മാനേജ്‌മെന്റ് പ്രധാനം

ഓപ്പൺ ബുക്ക് പരീക്ഷയിൽ വിദ്യാർഥികൾക്ക് ഏറ്റവും വലിയ പ്രതിസന്ധി കൃത്യമായ സമയം പാലിക്കുക എന്നതാണ്. ഒരു പ്രത്യേക ഭാഗത്ത് നിന്നോ പുസ്തകത്തിൽ നിന്നോ ചോദ്യങ്ങൾ ഇല്ലാത്തതിനാൽ ലഭിച്ച വിവരങ്ങൾ കൃത്യമായി അടുക്കിപ്പെറുക്കാൻ വിദ്യാർഥിക്ക് കഴിഞ്ഞില്ലെങ്കിൽ  സമയം പ്രശ്‌നമാകും. പരന്ന വായന വേണമെന്ന് സാരം. ആവശ്യത്തിന് റഫറൻസ് കൈയിൽ കരുതുന്ന ഒരു വിദ്യാർഥിയെ സംബന്ധിച്ച് പരീക്ഷാസമ്മർദം അൽപം കുറയ്ക്കാമെന്നതാണ് മറ്റൊരു പ്രത്യേകത. ഡാറ്റയെ എങ്ങനെ കുറഞ്ഞ സമയത്തിനുള്ളിൽ സമഗ്രമായി സംയോജിപ്പിക്കാമെന്നത് വിദ്യാർഥികളെ സംബന്ധിച്ച് വെല്ലുവിളിയാകും. സാധാരണ എഴുത്ത് പരീക്ഷയിൽ ഓർമയാണ് പരീക്ഷിക്കപ്പെടുന്നതെങ്കിൽ ഓപ്പൺ ബുക്ക് പരീക്ഷയിൽ നാം ആർജിച്ച അറിവാണ് വിലയിരുത്തപ്പെടുക. 

അധ്യാപകർക്ക് കടുപ്പമേറും

കൃത്യമായ ചോദ്യങ്ങളും അതിനുള്ള ഉത്തരങ്ങളും അല്ലാത്തതിനാൽ തന്നെ അധ്യാപകർക്ക് പരീക്ഷാ മൂല്യനിർണയം അത്ര എളുപ്പമായിരിക്കില്ല. ഉത്തരസൂചിക വെച്ച് പോലും ചിലപ്പോൾ മൂല്യനിർണയം സാധിക്കില്ല. കുറഞ്ഞ സമയത്തിനുള്ളിൽ കൂടുതൽ വിശകലനരീതി ആയതിനാൽ തന്നെ സിലബസിന്റെ മുക്കും മൂലയും ചോദ്യക്കടലാസിൽ ഉൾപ്പെടുത്തുക എന്നതും ചോദ്യങ്ങൾ നിർമിക്കുക എന്നതും അധ്യാപകർക്ക് അൽപം ശ്രമകരമായ ജോലിയായിരിക്കും എന്നും വിലയിരുത്തലുകളുണ്ട്. വെറുതെ ഏതെങ്കിലും ചോദ്യങ്ങൾ ചോദിക്കുക എന്നതിനപ്പുറം പ്രായോഗികതയിലൂന്നിയായിരിക്കണം ചോദ്യം ഫ്രെയിം ചെയ്യേണ്ടത്. വിദ്യാർഥിയുടെ കാര്യക്ഷമതയെയും ബുദ്ധിവൈഭവവും അളക്കപ്പെടുന്നതിനാൽ തന്നെ ഏകീകൃത മാനദണ്ഡം മാർക്കിടലിനായി പരിഗണിക്കുന്നതും ശ്രമകരമാണ്. അധ്യാപന ശൈലിയിൽ മാത്രമല്ല പരീക്ഷാ നടത്തിപ്പിലും അധ്യാപകർ മാറ്റം കൊണ്ടുവരേണ്ടതായുണ്ട്. കൃത്യമായ മൂല്യനിർണയ മാനദണ്ഡങ്ങൾ രൂപപ്പെടുത്തുക എന്നതും സുപ്രധാനമാണ്.

പഠനത്തിന്റെ പുതിയ തലങ്ങൾ

ഒരു വിഷയം എത്രമാത്രം ഗ്രഹിച്ചു എന്ന് വിലയിരുത്തുമ്പോൾ പഠനത്തിന്റെ മറ്റൊരു തലം കൂടിയാണ് വിദ്യാർഥികൾക്ക് മുന്നിൽ തുറക്കപ്പെടുന്നത്. ഉയർന്ന നിലവാരത്തിലുള്ള പരീക്ഷകളിലൂടെ വിദ്യാർഥികളുടെ നിലവാരവും ഉയരും. വെറുതേ എന്തെങ്കിലും പഠിക്കുക എന്നതിനപ്പുറം വിഷയം ഉൾക്കൊണ്ട് പഠിക്കാൻ വിദ്യാർഥികൾ നിർബന്ധിതരാവും. കോപ്പിയടി പോലുള്ള കള്ളത്തരങ്ങൾക്ക് സ്‌കോപ്പില്ലെന്നതും ഓപ്പൺ ബുക്ക് പരീക്ഷയുടെ പ്രത്യേകതയാണ്. വിദ്യാർഥികളിൽ വിമർശനാത്മക ചിന്തയും വിശകലന കഴിവുകളും വർധിപ്പിക്കാൻ ഓപ്പൺബുക്ക് പരീക്ഷകൾ സഹായകമാണ്. ചുരുക്കത്തിൽ അധ്യാപകർക്കും വിദ്യാർഥികൾക്കും പഠനനിലവാരമുയർത്താനുള്ള അവസരമാണിത്. മാർക്കിനായി പഠിക്കുന്നതിനപ്പുറം വിവിധ അക്കാദമിക് കഴിവുകളുള്ള വിദ്യാർഥികൾക്ക് ഓപ്പൺ ബുക്ക് പരീക്ഷകളിൽ നിന്ന് പ്രയോജനം നേടാം. വിദ്യാർഥികളിൽ നൈപുണ്യശേഷി വളർത്താനും ഈ രീതിക്ക് കഴിയും. ക്ലാസിൽ പഠിച്ച കാര്യങ്ങൾ യഥാർത്ഥ ജീവിത സാഹചര്യങ്ങളിലേക്ക് പ്രയോഗിക്കാനുള്ള ശേഷിയും വിദ്യാർഥി ആർജിക്കും. ചോദ്യങ്ങൾ സ്വയം ചോദിച്ചും ഉത്തരങ്ങൾ കണ്ടെത്തിയും പഠനം വിശകലനാത്മകമാക്കുമ്പോഴാണ് ഓപ്പൺബുക്ക് പരീക്ഷാരീതി വിജയകരമാവുക.

 

പ്രൊഫ. എന്‍.പി. ഹാഫിസ് മുഹമ്മദ്

 "ഓർമ്മശക്തി അളക്കുന്ന സാധാരണ പരീക്ഷാരീതി അശാസ്ത്രീയമാണെന്ന് തെളിയിക്കപ്പെട്ടിട്ടുണ്ട്. അതുകൊണ്ട് തന്നെ ഓപ്പൺബുക്ക് പരീക്ഷ പോലെ ക്രിയാത്മകമായ രീതികൾ അവലംബിക്കേണ്ടത് അത്യാവശ്യമാണ്. പുതിയ പരീക്ഷണമായതുകൊണ്ട് തന്നെ ഓപ്പൺബുക്ക് പരീക്ഷാ രീതിയെ വിമർശനബുദ്ധ്യാ കാണുന്നവരുണ്ടാകാം. പക്ഷേ, ലോകത്തിന്റെ പലഭാഗങ്ങളിലും ഇത് ഫലപ്രദമായി നടത്തുന്നു. വിദ്യാർഥികൾ അറിവിനെ എങ്ങനെ അപഗ്രഥിക്കുന്നു എന്നാണിവിടെ പരിശോധിക്കപ്പെടുന്നത്. പക്ഷേ, കുട്ടികൾക്കും അധ്യാപകർക്കും ഒരുപോലെ പരിശീലനവും അവബോധവും നൽകാതെ ഓപ്പൺബുക്ക് പരീക്ഷാരീതി പരീക്ഷിക്കുന്നത് ഫലവത്താവില്ല. ചോദ്യങ്ങളെ വൈയക്തികവത്കരിക്കാനും, അവയുടെ രീതിശാസ്ത്രം മാറ്റാനും സാധിക്കുന്ന അധ്യാപകർക്കായിരിക്കും ഓപ്പൺബുക്ക് പരീക്ഷാ രീതി ഫലവത്തായി പ്രയോജനപ്പെടുത്താൻ സാധിക്കുക. ഈ രീതി അത്ര പരിചിതമല്ലാത്ത അധ്യാപകരാണ് ചോദ്യങ്ങളിടുന്നതെങ്കിൽ പക്ഷേ ഗുണത്തേക്കാളേറെ ദോഷം ചെയ്യും. ഓരോ വ്യക്തിയും വ്യത്യസ്ത രീതിയിലാണ് പരീക്ഷ എഴുതുക എന്നതുകൊണ്ട് ഉത്തരങ്ങളിൽ പൊതുതാരതമ്യ അവലോകനം സാധ്യമല്ല. ചോദ്യോത്തരങ്ങൾ കൈകാര്യം ചെയ്യുന്നതിൽ അധ്യാപകർക്ക് തീവ്രമായ പരിശീലനം നൽകേണ്ടതുണ്ട്. തുടക്കത്തിൽ പല പ്രശ്‌നങ്ങളുണ്ടായേക്കാമെങ്കിലും വിദ്യാഭ്യാസമേഖലയിൽ കാതലായ മാറ്റങ്ങളുണ്ടാക്കാൻ ഈ മാറ്റം കൊണ്ട് സാധിക്കും. ഹൈസ്‌കൂൾ, ഹയർസെക്കൻഡറി ക്ലാസുകളിൽ കൂടി ഈ  രീതി നടപ്പാക്കുകയാണെങ്കിൽ കുട്ടികളുടെ സമ്മർദം, അവർ അനുഭവിക്കുന്ന സംഘർഷം ഒരുപരിധിവരെ കുറയ്ക്കാനാകും. ഓരോ കുട്ടിയും ഞാനെഴുതുന്നത് ശരിയായിരിക്കുമെന്ന സ്വതന്ത്രബോധത്തോടെ ഉത്തരമെഴുതും. പക്ഷേ, ഇത് വിജയകരമാകണമെങ്കിൽ അധ്യാപകരുടെ സഹകരണം, പ്രാവീണ്യം, നൈപുണ്യം എന്നിവ ഉറപ്പാക്കേണ്ടതുണ്ട്."

വിദ്യാർഥികൾക്ക് ഗുണകരമോ?

സാധാരണ പരീക്ഷകളിൽ ഓർമ്മ മാത്രമാണ് പരിശോധിക്കപ്പെടുന്നത്. എന്നാൽ ഉന്നതവിദ്യാഭ്യാസ രംഗത്ത് ഫലപ്രദമായി ഉപയോഗിക്കുന്ന ബ്ലൂംസ് ടാക്സോണമി രീതി അടിസ്ഥാനപ്പെടുത്തി ഓർമ (Memory), മനസ്സിലാക്കൽ (Understand), പ്രയോഗിക്കൽ (Apply), വിശകലനം ചെയ്യൽ (Analyse), വിലയിരുത്തൽ (Evaluation), ക്രിയാത്മകത (Create) എന്നീ ആറ് കാര്യങ്ങളാണ് ഓപ്പൺ ബുക്ക് പരീക്ഷയിൽ പരിശോധിക്കപ്പെടുക. പഠനത്തിലൂടെ വിമർശനാത്മക ചിന്തയും പ്രശ്‌നപരിഹാര കഴിവുകളും പ്രോത്സാഹിപ്പിക്കുന്ന രീതിയാണ് ബ്ലൂംസ് ടാക്സോണമി. ഓപ്പൺ ബുക്ക് പരീക്ഷകൾ പൊതുവേ മാനസിക സമ്മർദം കുറഞ്ഞ പരീക്ഷാരീതിയായാണ് പരിഗണിക്കപ്പെടുന്നത്. എന്നിരുന്നാലും എല്ലാ വിഷയങ്ങൾക്കും വിഷയങ്ങൾക്കും ഈ രീതി അനുയോജ്യമാകണമെന്നില്ല. എൻജിനിയറിങ്, സയൻസ്, മെഡിസിൻ, നിയമം എന്നീ വിഷയങ്ങൾക്കാണ് മാനവിക വിഷയങ്ങളേക്കാൾ ഫലപ്രദമെന്ന് പഠനങ്ങൾ പറയുന്നു. ശരിയായ ചോദ്യരൂപകല്പന, വിദ്യാർഥികളുടെ തയ്യാറെടുപ്പ് എന്നിവ സുപ്രധാനമാണ്. പ്രായോഗിക വശങ്ങളിൽ ശ്രദ്ധ കേന്ദ്രീകരിച്ചുള്ള ഉയർന്ന നിലവാരമുള്ള ചോദ്യങ്ങൾ ശരാശരി വിദ്യാർഥികൾ എങ്ങനെ കൈകാര്യം ചെയ്യുമെന്നതും വെല്ലുവിളിയാണ്.

അത്ര എളുപ്പമല്ല

"കേന്ദ്രസർവകലാശാലകളിലും പുറംരാജ്യങ്ങളിലും വിജയകരമായി പിന്തുടരുന്ന രീതിയാണെങ്കിലും കേരളത്തിലെ സർവകലാശാലകളെ സംബന്ധിച്ച് ഓപ്പൺ ബുക്ക് പരീക്ഷയിലേക്കുള്ള പരിവർത്തനം അത്ര എളുപ്പമല്ല. ഇന്റേണൽപരീക്ഷകളിലാണ് എം.ജി സർവകലാശാല ആദ്യമായി മാറ്റം പരീക്ഷിക്കുന്നത്. ഇതുവരെ പരിചയിച്ച അധ്യാപനരീതിയും പഠനരീതിയും വെച്ച് ഓപ്പൺബുക്ക് പരീക്ഷയെ സമീപിക്കാനാവില്ല. ഓപ്പൺബുക്ക് പരീക്ഷകളോട് നോ പറയാതെ നിലവിലെ പഠനാന്തരീക്ഷത്തിൽ ഫലപ്രദമായി എങ്ങനെ പ്രയോഗിക്കാമെന്നാണ് ആലോചന വേണ്ടത്. 

ഡോ. ടി.പി.സേതുമാധവന്‍

'വിദേശ സർവകലാശാലകളിൽ ദശാബ്ദങ്ങളായി പിന്തുടരുന്ന പരീക്ഷാ രീതിയാണ് ഓപ്പൺ ബുക്ക് എക്‌സാം. സയൻസ്, എൻജിനിയറിങ്, ടെക്‌നോളജി, മാത്തമാറ്റിക്‌സ് വിഷയങ്ങളിലാണ് കൂടുതലായും ഈ രീതി കണ്ടുവന്നിരുന്നത്. നേരിട്ട് ഉത്തരങ്ങൾ ലഭിക്കാവുന്ന തരത്തിലുള്ള ചോദ്യങ്ങൾ ഉണ്ടാവില്ല. കേരള പബ്ലിക് സർവീസ് കമ്മീൻ നടത്തുന്ന ചില ഡിപ്പാർട്‌മെന്റൽ പരീക്ഷകൾക്ക് വർഷങ്ങളായി ഓപ്പൺബുക്ക് പരീക്ഷാരീതി നിലവിലുണ്ട്. കാണാപ്പാഠം പഠിച്ച് പരീക്ഷ എഴുതുന്ന സമ്പ്രദായത്തേക്കാൾ ഓപ്പൺ ബുക്ക് എക്‌സാം അത്ര എളുപ്പമല്ലെങ്കിൽ കൂടി വിദ്യാർഥികൾക്ക് ഗുണകരമാകും. ബിരുദതലത്തിൽ ഈ പരീക്ഷാ രീതി നടപ്പിലാക്കുന്നത് പ്രതീക്ഷാവഹമാണ്. പക്ഷേ, സർവകലാശാലകൾക്ക് കൃത്യമായ ഒരു പ്രവർത്തന പദ്ധതി ഉണ്ടായിരിക്കേണ്ടതുണ്ട്. ചോദ്യങ്ങളുടെ പതിവ് പാറ്റേണുകൾ പൂർണമായി മാറ്റേണ്ടി വരും. പുസ്തകം റഫർ ചെയ്ത് എങ്ങനെ പരീക്ഷ എഴുതാനുള്ള സ്‌കിൽ കുട്ടികളിൽ വികസിപ്പിക്കാനായി മോക്ക് ടെസ്റ്റുകളും മറ്റും നൽകണം. പരീക്ഷയ്ക്ക് കൊണ്ടുവരാവുന്നതും കൊണ്ടുവരരുതാത്തതുമായ പുസ്തകങ്ങൾ ഏതെല്ലാമെന്ന നിർദേശം നൽകണം."
- ഡോ.ടി. പി സേതുമാധവൻ