കല്പറ്റ: വയനാട് ഡി.സി.സി. ട്രഷറര് എന്.എം. വിജയന്റെ മരണത്തില് ആത്മഹത്യാപ്രേരണാക്കുറ്റം ചുമത്തപ്പെട്ട കോണ്ഗ്രസ് നേതാക്കള്ക്ക് താത്കാലികാശ്വാസം. സുല്ത്താന് ബത്തേരി എം.എല്.എ ഐ.സി. ബാലകൃഷ്ണന്, വയനാട് ഡി.സി.സി പ്രസിഡന്റ് എന്.ഡി. അപ്പച്ചന് എന്നിവരെ ജനുവരി 15 വരെ അറസ്റ്റുചെയ്യരുതെന്ന് കോടതി വാക്കാല് നിര്ദേശം നല്കിയതായി പ്രതിഭാഗം അഭിഭാഷകന് ടി.എം. റഷീദ് മാധ്യമങ്ങളോട് പറഞ്ഞു. മുന്കൂര് ജാമ്യാപേക്ഷ പരിഗണിച്ച പ്രിന്സിപ്പല് സെഷന്സ് കോടതിയാണ് പോലീസിന് നിര്ദേശം നല്കിയത്.
വ്യാഴാഴ്ചയാണ് മുന്കൂര് ജാമ്യാപേക്ഷ നല്കിയത്. വെള്ളിയാഴ്ച കേസ് പരിഗണിച്ച കോടതി 15-ന് കേസ് ഡയറി ഹാജരാക്കാന് പോലീസിനോട് ആവശ്യപ്പെട്ടു. അതുവരെ അറസ്റ്റുചെയ്യരുതെന്ന് വാക്കാല് നിര്ദേശവും നല്കി. 15-ന് വിശദമായ വാദം കേള്ക്കും. അന്ന് കോടതി രേഖകള് പരിശോധിക്കും. അതിന് ശേഷമേ കോടതി കേസിന്റെ മെറിറ്റിലേക്ക് കടക്കുകയുള്ളൂവെന്നും പ്രതിഭാഗം അഭിഭാഷകന് ടി.എം. റഷീദ് മാധ്യമപ്രവര്ത്തകരോട് പറഞ്ഞു.
എന്.എം.വിജയനും മകന് ജിജേഷും ആത്മഹത്യ ചെയ്ത കേസിലാണ് ഐ.സി. ബാലകൃഷ്ണന് എം.എല്.എ, വയനാട് ഡി.സി.സി. പ്രസിഡന്റ് എന്.ഡി. അപ്പച്ചന്, ഡി.സി.സി. മുന് ട്രഷറര് കെ.കെ. ഗോപിനാഥ്, അന്തരിച്ച മുന് ഡി.സി.സി. പ്രസിഡന്റ് പി.വി. ബാലചന്ദ്രന് എന്നിവരെ പ്രതികളാക്കി പോലീസ് കേസെടുത്തത്. കെ.പി.സി.സി. പ്രസിഡന്റിന് നല്കാന് വിജയന് എഴുതിയ കത്തില് ഇവരുടെ പേരുകള് പരാമര്ശിച്ചിരുന്നു. പോലീസ് അന്വേഷണത്തില് ലഭിച്ച മൊഴികളും നേതാക്കളെ പ്രതിചേര്ക്കുന്നതിലേക്ക് നയിച്ചതായാണ് വിവരം.
Content Highlights: Congress leaders in Wayanad get interim relief from arrest until January 15
Published: 10 Jan 2025, 03:47 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented