തലശ്ശേരി : തലശ്ശേരി-മാഹി ബൈപാസില്‍ കൊളശ്ശേരി ടോള്‍ ബൂത്തില്‍ പണം നല്‍കാത്തത് ചോദ്യംചെയ്തതിന് ജീവനക്കാരെ സംഘംചേര്‍ന്ന് മര്‍ദിച്ചു. ടോള്‍ ബൂത്ത് ഓപ്പറേറ്റര്‍ കുട്ടിമാക്കൂല്‍ സ്വദേശി പി. ആദര്‍ശ് (27), ലൈന്‍ മാനേജ്‌മെന്റ് സര്‍വീസ് ജീവനക്കാന്‍ കൊളശ്ശേരി കളരിമുക്ക് ദിലീപ് (44), സുരക്ഷാ ജീവനക്കാന്‍ അനില്‍ കുമാര്‍ (27) എന്നിവര്‍ക്കാണ് മര്‍ദനമേറ്റത്. വെള്ളിയാഴ്ച രാത്രി എട്ടോടെയാണ് സംഭവങ്ങള്‍ക്ക് തുടക്കം.
കാറിലെത്തിയ നാലുപേരടങ്ങിയ സംഘം വലിയ വാഹനം ടോള്‍ഗേറ്റ് കടന്നുപോകുന്നതിനിടെ വേഗത്തില്‍ മറികടന്നു. ആ സംഭവം ജീവനക്കാര്‍ ചോദ്യംചെയ്തതത് വാക്കേറ്റത്തിന് ഇടയായി. തുടര്‍ന്ന് പണം നല്‍കാതെ കാറുമായി നാലംഗസംഘം അവിടെനിന്ന് പോയി. പിന്നീട് 9.45 ഓടെ 20 ഓളം പേര്‍ സംഘംചേര്‍ന്ന് ടോള്‍ബൂത്തിലേക്ക് എത്തുകയും അനില്‍ കുമാറിനെയും ദിലീപിനെയും മര്‍ദിക്കുകയുമായിരുന്നു. ഓഫീസിലേക്ക് കയറിയ സംഘം ആദര്‍ശിനെയും മര്‍ദിച്ചു.
ആദര്‍ശിന് തലയ്ക്കും കൈക്കും ദിലീപിന് മുഖത്തും അനില്‍കുമാറിന് ഇടുപ്പിനുമാണ് പരിക്കേറ്റത്. ഇവര്‍ തലശ്ശേരി ജനറല്‍ ആസ്പത്രിയില്‍ ചികിത്സതേടി. സംഭവത്തില്‍ ഒരു മൊബൈല്‍ ഫോണ്‍, പേടിഎം സ്വയിപ്പിങ് മെഷിന്‍ എന്നിവ തകര്‍ത്തിട്ടുണ്ടെന്നും ജീവനക്കാര്‍ക് ശമ്പളം കൊടുക്കാന്‍ വെച്ചിരുന്ന 1,30,000 രൂപ കാണാതായതായും ടോള്‍ മാനേജര്‍ കെ. അനില്‍ കുമാര്‍ പറഞ്ഞു. കെ. അനില്‍ കുമാറിന്റെ പരാതിയില്‍ തലശ്ശേരി പോലീസ് അന്വേഷണം ആരംഭിച്ചു.
Content Highlights: thalassery mahe bypass toll plaza employees attacked
Published: 04 May 2025, 07:34 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented