കാസർകോട്: ട്രെയിനിലെ ഹവാല പണം പൊട്ടിക്കലിൽ കൂടുതൽ വിവരങ്ങൾ പുറത്ത്. സൗദി റിയാലുമായി ട്രെയിനിൽ യാത്ര ചെയ്യുകയായിരുന്ന ഉമ്മർ ബാവ നിരവധി ഹവാല ഇടപാടുകൾ നടത്തിയതായി കണ്ടെത്തി. ആറുമാസത്തിനിടെ ഒട്ടേറെ തവണ ഇയാൾ പണവുമായി കാസർകോടേക്ക് എത്തിയെന്നും റെയിൽവേ പോലീസ് കണ്ടെത്തി. ഈ മാസം മാത്രം അഞ്ച് തവണയാണ് ഇത്തരത്തിൽ പണം കൊണ്ടുവന്നത്. കാസർകോട് ചൗക്കി സ്വദേശിയായ ഒരാൾക്കാണ് ഇയാൾ പണം കൈമാറിയതെന്നും വിവരമുണ്ട്.

To advertise here,

അതേസമയം ഉമ്മർ ബാവയുടെ കൈവശമുണ്ടായിരുന്ന ഹവാല പണം പൊട്ടിച്ചത് മലപ്പുറം സ്വദേശികളാണെന്നാണ് പോലീസ് സംശയിക്കുന്നത്. ഉമ്മർ ബാവ പണവുമായി കാസർകോടേക്ക് യാത്ര തുടങ്ങിയത് മലപ്പുറത്തുനിന്നാണ്. അവിടെ നിന്ന് തന്നെയാകും വിവരം പൊട്ടിക്കൽ സംഘത്തിന് ചോർന്നുകിട്ടയതെന്നും പോലീസ് സംശിയിക്കുന്നു.

ഒക്ടോബർ 20-നായിരുന്നു ട്രെയിനിൽ വെച്ച് ഹവാല പൊട്ടിക്കൽ നടന്നത്. മലപ്പുറം മൂന്നിയൂർ സ്വദേശിയായ ഉമ്മർ ബാവയുടെ 25,000 സൗദി റിയാലാണ് സംഘം തട്ടിയെടുത്തത്. ഏകദേശം പത്ത് ലക്ഷം ഇന്ത്യൻ രൂപയ്ക്ക് തുല്യമാണ് ഇത്. വേരാവൽ എക്‌സ്പ്രസിൽ വെച്ച് പുലർച്ചെയായിരുന്നു സംഭവം. ഡാൻസാഫ് സംഘം എന്ന വ്യാജേനെ എത്തിയ നാലംഗ സംഘം ഉമ്മർ ബാവയെ ട്രെയിനിൽ നിന്ന് ഇറക്കിയാണ് പണം കവർന്നത്.