ആംഡ് ഫോഴ്‌സസ് മെഡിക്കൽ സർവീസസ് (എ.എഫ്.എം.എസ്.), മെഡിക്കൽ ഓഫീസർ (ഷോർട്ട് സർവീസ് കമ്മിഷൻ-എസ്.എസ്.സി.) തസ്തികയിലേക്ക് അപേക്ഷിക്കാം. ഒഴിവുകൾ: പുരുഷന്മാർ- 75, സ്ത്രീകൾ- 25. കമ്മിഷൻ ചെയ്യപ്പെടുന്നവർ കരസേന/നാവികസേന/വ്യോമസേന എന്നിവയിൽ രാജ്യത്തെ/വിദേശത്തെ ഏതു ഭാഗത്തും സേവനമനുഷ്ഠിക്കാൻ ബാധ്യസ്ഥനാണ്.

To advertise here,

പ്രാരംഭ നിയമന കാലാവധി അഞ്ചുവർഷമാണ്. അതിനുശേഷവും തുടരാൻ ആഗ്രഹിക്കുന്നവർക്ക് ഒഴിവുകളുടെയും അന്ന് നിലനിൽക്കുന്ന നയം, യോഗ്യതാ മാനദണ്ഡങ്ങൾ എന്നിവയ്ക്കും വിധേയമായി രണ്ടു കാലയളവുകളിലായി ഒൻപതുവർഷത്തേക്കുകൂടി (ആദ്യത്തേത് അഞ്ചുവർഷവും രണ്ടാമത്തേത് നാലുവർഷവും) തുടർനിയമനം ലഭിക്കാം.

അപേക്ഷകർ അവരുടെ അവസാന എം.ബി.ബി.എസ്. (പാർട്ട്-I & II) പരീക്ഷ പരമാവധി രണ്ട് ചാൻസിൽ ജയിച്ചിരിക്കണം. 2024-ലോ 2025-ലോ നീറ്റ് പി.ജി. അഭിമുഖീകരിച്ചിരിക്കണം. 2025 ജൂലായ് 31-നോ മുൻപോ ഇന്റേൺഷിപ്പ് പൂർത്തിയാക്കിയിരിക്കണം. ബിരുദാനന്തരബിരുദമുള്ള സിവിലിയൻ ഡോക്ടർമാർക്കും അപേക്ഷിക്കാം. അവർ വീണ്ടും നീറ്റ് പി.ജി. പരീക്ഷ അഭിമുഖീകരിക്കേണ്ടതില്ല. നേരത്തേ നീറ്റ് പി.ജി.യിൽ അവർ നേടിയ സ്‌കോർ കണക്കിലെടുക്കും.

ഏതെങ്കിലും സംസ്ഥാന മെഡിക്കൽ കൗൺസിൽ/എൻ.എം.സി./എം.സി.ഐ.യിൽനിന്ന് സ്ഥിരമായ രജിസ്‌ട്രേഷൻ നേടിയിരിക്കണം.

എം.ബി.ബി.എസ്. ബിരുദം ഉണ്ടെങ്കിൽ 30 വയസ്സിനും (ജനനം 1997 ജനുവരി രണ്ടിനോ ശേഷമോ), പി.ജി. ബിരുദം ഉണ്ടെങ്കിൽ 35 വയസ്സിനും (ജനനം 1992 ജനുവരി രണ്ടിനോ ശേഷമോ) താഴെയായിരിക്കണം 2026 ഡിസംബർ 31-ലെ പ്രായം. join.afms.gov.in വഴി മാർച്ച് നാലുവരെ അപേക്ഷിക്കാം.

അപേക്ഷാ ഫീ 200 രൂപ ഓൺലൈനായി അടയ്ക്കണം. ശമ്പളം, പ്രമോഷൻ, ഡിപ്പാർട്ട്‌മെന്റൽ പെർമനന്റ് കമ്മിഷൻ, പി.ജി./സൂപ്പർ സ്‌പെഷ്യാലിറ്റി കോഴ്‌സുകൾക്കുള്ള വ്യവസ്ഥ എന്നിവയുടെ വിശദാംശങ്ങൾ വിജ്ഞാപനത്തിൽ.