മാരുതി സുസുക്കി ഇന്ത്യ തങ്ങളുടെ ആദ്യ ഇലക്ട്രിക് വാഹനമായ ഇ-വിത്താരയുടെ കയറ്റുമതി ആരംഭിച്ചു. 2,900-ൽ അധികം യൂണിറ്റുകളാണ് കഴിഞ്ഞ മാസം കമ്പനി കയറ്റി അയച്ചത്. ഗുജറാത്തിലെ പിപാവാവ് തുറമുഖത്ത് നിന്ന് യുകെ, ജർമനി, നോർവേ, ഫ്രാൻസ്, ഡെൻമാർക്ക്, സ്വിറ്റ്‌സർലൻഡ്, നെതർലാൻഡ്‌സ്, സ്വീഡൻ, ഹംഗറി, ഐസ്‌ലാൻഡ്, ഓസ്ട്രിയ, ബെൽജിയം എന്നീ 12 യൂറോപ്യൻ രാജ്യങ്ങളിലേക്കാണ് യൂണിറ്റുകൾ അയച്ചത്. ഈ കയറ്റുമതിയുടെ തുടക്കം, ഇന്ത്യയെ ഇ-വിത്താരയുടെ ആഗോള ഉത്പാദന കേന്ദ്രമാക്കി മാറ്റാനുള്ള സുസുക്കിയുടെ ലക്ഷ്യത്തിലെ ഒരു പ്രധാന നാഴികക്കല്ലാണ്.

To advertise here,

ഓഗസ്റ്റ് 26-ന് പ്രധാനമന്ത്രി നരേന്ദ്ര മോദി ഗുജറാത്തിലെ നിർമാണശാലയിൽനിന്ന് ആദ്യത്തെ ഇ-വിത്താര ഫ്ലാഗ് ഓഫ് ചെയ്തിരുന്നു. 'മേക്ക് ഇൻ ഇന്ത്യ' സംരംഭത്തിന്റെ ബ്രാൻഡ് അംബാസഡറായി മാരുതി സുസുക്കിയെ അദ്ദേഹം പ്രശംസിക്കുകയും ചെയ്തു. മാരുതി സുസുക്കിയുടെ ഹൻസൽപുർ നിർമാണശാലയിൽ മാത്രമാണ് ഈ ബാറ്ററി ഇലക്ട്രിക് മോഡൽ നിർമിക്കുന്നത്. 

"യൂറോപ്പിലേക്ക് ഇ-വിത്താരയുടെ കയറ്റുമതി ആരംഭിച്ചത് ഞങ്ങൾക്ക് അഭിമാനകരവും നിർണായകവുമായ ഒരു നിമിഷമാണ് എന്ന് മാരുതി സുസുക്കി ഇന്ത്യ എംഡിയും സിഇഒയുമായ ഹിസാഷി ടകൂച്ചി പ്രസ്താവനയിൽ പറഞ്ഞു. 100-ൽ അധികം രാജ്യങ്ങളിലേക്ക് ഈ മോഡൽ കയറ്റുമതി ചെയ്യാനും ആഭ്യന്തര വിപണിയിലും വിൽക്കാനും കമ്പനിക്ക് പദ്ധതിയുണ്ട്.  

ഇ-വിത്താര 

മാരുതി സുസുക്കി ഇലക്ട്രിക് വാഹനങ്ങൾക്കായി വികസിപ്പിച്ചിട്ടുള്ള ഹാർടെക്ട്-ഇ പ്ലാറ്റ്‌ഫോമിലാണ് ഇ-വിത്താര ഒരുങ്ങിയിരിക്കുന്നത്. 49 കിലോവാട്ട്, 61 കിലോവാട്ട് എന്നീ രണ്ട് ബാറ്ററിപാക്ക് ഓപ്ഷനുകളിൽ ഇ-വിത്താര വിപണിയിൽ എത്തും. ഒറ്റത്തവണ ചാർജിൽ 500 കിലോമീറ്ററിൽ അധികം റേഞ്ച് ഉറപ്പാക്കുന്നുണ്ട്. എൽഎഫ്പി.(ലിഥിയം അയേൺ ഫോസ്‌ഫേറ്റ്) ബ്ലേഡ് ബാറ്ററിയാണ് ഇതിൽ ഉപയോഗിക്കുന്നത്.  

49 കിലോവാട്ട് ബാറ്ററി പാക്ക് ഓപ്ഷൻ ഇ-വിത്താരയിൽ 144 ബിഎച്ച്പി പവറും 189 എൻഎം ടോർക്കും ഉത്പാദിപ്പിക്കുന്ന സിംഗിൾ മോട്ടോറാണ് നൽകുന്നത്. 61 കിലോവാട്ട് ബാറ്ററി പാക്ക് വേരിയന്റിൽ 174 ബിഎച്ച്പി പവറും 189 എൻഎം ടോർക്കുമേകുന്ന മോട്ടോറും കരുത്തേകും. ഇ-വിത്തരായുടെ ഓൾ വീൽ ഡ്രൈവ് മോഡലിൽ സുസുക്കിയുടെ ഇ-ഓൾഗ്രിപ്പ് സംവിധാനത്തെ അടിസ്ഥാനമാക്കിയുള്ളതാണ്. 

ഇതിന്റെ റിയർ ആക്സിലിലും 65 ബിഎച്ച്പി പവർ ഉത്പാദിപ്പിക്കുന്ന മോട്ടോർ നൽകുന്നുണ്ട്. ഈ ഇരട്ട മോട്ടോർ മോഡൽ 184 ബിഎച്ച്പി പവറും 300 എൻഎം ടോർക്കുമാണ് ഉത്പാദിപ്പിക്കുന്നത്. ഏകദേശം 20 ലക്ഷം രൂപ എക്സ്-ഷോറൂം പ്രാരംഭ വിലയിൽ ഇ-വിത്താര അവതരിപ്പിക്കുമെന്നാണ് പ്രതീക്ഷിക്കുന്നത്. മഹീന്ദ്ര BE6, ഹ്യുണ്ടായ് ക്രെറ്റ ഇലക്ട്രിക്, എംജി ZS EV തുടങ്ങിയ മോഡലുകളായിരിക്കും പ്രധാന എതിരാളികൾ.