ഹ്യുണ്ടായിയുടെ ഇന്ത്യയിലെ വാഹന നിരയിലേക്ക് എത്താനൊരുങ്ങുന്ന ഏറ്റവും പുതിയ എസ്‌യുവി മോഡലായ ബയോൺ പ്രദർശിപ്പിച്ചു. ഒക്ടോബർ 26-ന് വിപണിയിൽ എത്തുന്ന ഈ വാഹനത്തിന്റെ ഡിസൈൻ, മെക്കാനിക്കൽ സംവിധാനങ്ങൾ, ഫീച്ചറുകൾ എന്നിവയാണ് ഹ്യുണ്ടായി ഇപ്പോൾ വെളിപ്പെടുത്തിയിരിക്കുന്നത്. മിഡ് സൈസ് എസ്‌യുവി ശ്രേണിയിലേക്ക് എത്തുന്ന ഈ വാഹനം ക്രെറ്റയ്ക്കും വെന്യുവിനും ഇടയിലായിരിക്കും സ്ഥാനം പിടിക്കുക.

To advertise here,

ഹ്യുണ്ടായിയുടെ ആർട്ട് ഓഫ് സ്റ്റീൽ ഡിസൈൻ ലാംഗ്വേജിൽ ഒരുങ്ങിയിട്ടുള്ള വാഹനമാണ് ബയോൺ. അൽപ്പം കർവിയായുള്ള ഡിസൈനിലാണ് ബയോൺ ഒരുങ്ങിയിട്ടുള്ളത്. ബമ്പറിൽ സ്ഥാനം പിടിച്ചിരിക്കുന്ന ഹെഡ്‌ലാമ്പ്, ബോണറ്റിനോട് ചേർന്നിരിക്കുന്ന എൽഇഡി ഡിആർഎൽ, വലിപ്പം കുറഞ്ഞ ഗ്രില്ലും എയർഡാമും, സ്‌കിഡ് പ്ലേറ്റിന് സമാനമായ ബമ്പറിന്റെ ലോവർ പാർട്ടും ചേർന്നാണ് മുൻഭാഗം അലങ്കരിച്ചിരിക്കുന്നത്.

തികച്ചും പുതുമയുള്ള ഡിസൈനിലാണ് അലോയി വീൽ ഒരുങ്ങിയിരിക്കുന്നത്. വീൽ ആർച്ചുകളും ക്ലാഡിങ്ങുകളും വശങ്ങളുടെ അലങ്കാരത്തിന് മിഴിവേകുന്നു. മറ്റു മോഡലുകളോടും ഉപമിക്കാൻ കഴിയാത്ത റിയർ പ്രൊഫൈലും ബയോണിനുണ്ട്. നേർത്ത ടെയ്ൽലാമ്പ്, ക്ലാഡിങ്ങുകൾ അലങ്കരിക്കുന്ന ഹാച്ച്‌ഡോർ, ബ്രഷ്ഡ് അലുമിനിയം എലമെന്റ് നൽകിയിട്ടുള്ള റിയർ ബമ്പർ എന്നിങ്ങനെ നീളും അലങ്കാരങ്ങൾ.

ബ്രസീലിൽ വിപണികളിലുള്ള ഐ 20 മോഡലിലേതിന് സമാനമാണ് ബയോണിന്റെ അകത്തളം. 12.5 ഇഞ്ച് വലിപ്പത്തിലുള്ള കണക്ടഡ് സ്‌ക്രീനാണ് ഇൻഫോടെയ്ൻമെന്റ് സിസ്റ്റമായും ഇൻസ്ട്രുമെന്റ് ക്ലസ്റ്ററായും നൽകിയിരിക്കുന്നത്. മോസ് കോഡ് ഡിസൈനിലുള്ള സ്റ്റിയറിങ് വീലാണ് ഇതിലുള്ളത്. വെർട്ടിക്കൽ പാനലിലാണ് ക്ലൈമറ്റ് കൺട്രോൾ സംവിധാനം ഒരുക്കിയിരിക്കുന്നത്. ഫിസിക്കൽ സ്വിച്ചുകളും ബട്ടണുകളും ഇതിൽ നൽകുന്നുണ്ട്.

നിരവധി സ്റ്റോറേജ് സ്‌പേസുകൾ ഇന്റീരിയറിൽ നൽകുന്നുണ്ട്. ഹ്യുണ്ടായി വെന്യുവിൽ ഉൾപ്പെടെ നൽകിയിട്ടുള്ള ഷിഫ്റ്റ് സെലക്ടറാണ് ഇതിലുള്ളത്. എ.ഐ. ജനറേറ്റീവ് വോയിസ് അസിസ്റ്റൻസ്, 70-ലധികം കണക്ടഡ് ഫീച്ചറുകൾ, ഓൺ ബോർഡ് നാവിഗേഷൻ, മികച്ച സീറ്റുകൾ, വ്യത്യസ്തമായ ഡിസൈനിൽ തീർത്തിരിക്കുന്ന ഡോർ പാഡുകൾ എന്നിങ്ങനെ നിരവധി ഫീച്ചറുകളാണ് ഈ വാഹനത്തിന്റെ ഇന്റീരിയറിൽ നിർമാതാക്കൾ ഒരുക്കിയിരിക്കുന്നത്.

മെക്കാനിക്കൽ സംവിധാനങ്ങളിലെ അനിശ്ചിതത്വവും ഹ്യുണ്ടായി നീക്കിയിട്ടുണ്ട്. ക്രെറ്റ ഉൾപ്പെടെയുള്ള മോഡലുകളിൽ നൽകിയിട്ടുള്ള 1.5 ലിറ്റർ നാച്വറലി ആസ്പിരേറ്റഡ് പെട്രോൾ എൻജിനാണ് ബയോണിൽ കരുത്തേകുക. ഇത് 115 എച്ച്പി പവറും 144 എൻ.എം. ടോർക്കുമേകും. ഈ വാഹനത്തിൽ ട്രാൻസ്മിഷൻ നൽകാൻ സി.വി.ടി. ഗിയർബോക്‌സും നൽകുന്നുണ്ട്. വില സംബന്ധിച്ചുള്ള വിവരങ്ങൾ ഒക്ടോബർ 26-നായിരിക്കും പ്രഖ്യാപിക്കുക.