ഇന്ത്യയിലെ ജനപ്രിയ സ്കൂട്ടറായ ആക്ടീവയുടെ 125 സിസി മോഡലിന്റെ വില ഉയര്ത്തുന്നതായി നിര്മാതാക്കളായ ഹോണ്ട അറിയിച്ചു. 68,042 രൂപ മുതല് 75,042 രൂപ വരെയാണ് ആക്ടീവ 125-ന്റെ പുതിയ എക്സ്ഷോറൂം വില. ഈ സ്കൂട്ടറിന്റെ മൂന്ന് വേരിയന്റിനും 552 രൂപ വരെയാണ് വില ഉയര്ത്തിയിരിക്കുന്നതെന്നാണ് റിപ്പോര്ട്ട്.
ഡ്രം, അലോയി ആന്ഡ് ഡിസ്ക് എന്നീ രണ്ട് ഓപ്ഷനുകളാണ് ആക്ടീവ 125-നുള്ളത്. ബിഎസ്-6 എന്ജിനിലേക്ക് മാറിയ ഹോണ്ടയുടെ ആദ്യ സ്കൂട്ടറും ആക്ടീവ 125 ആയിരുന്നു. കഴിഞ്ഞ സെപ്റ്റംബര് മാസത്തില് പുതിയ എന്ജിനൊപ്പം ലുക്കിലും കാര്യമായ മാറ്റങ്ങള് വരുത്തിയാണ് ബിഎസ്-6 എന്ജിന് മോഡല് അവതരിപ്പിച്ചത്.
വലിയ ഗ്രൗണ്ട് ക്ലിയറന്സും ഫ്ളോര് സ്പേസും വലിയ സീറ്റും നല്കുന്ന പുതിയ ഫ്രെയിമിലാണ് ആക്ടീവ 125 ഒരുങ്ങിയിരിക്കുന്നത്. എല്ഇഡി ഹെഡ്ലാമ്പ്, എല്ഇഡി പൊസിഷന് ലൈറ്റ്, സെമി-ഡിജിറ്റല് ഇന്സ്ട്രുമെന്റ് കണ്സോള്, മെറ്റല് ബോഡി, സൈഡ് സ്റ്റാന്ഡ് എന്ജിന് കട്ട് ഓഫ് എന്നീ സംവിധാനങ്ങളും ഇതിലുണ്ട്.
ആക്ടീവ 125 അലോയി വീല് മോഡലില് ഡിസ്ക് ബ്രേക്കും അടിസ്ഥാന മോഡലിലില് ഡ്രം ബ്രേക്കിനൊപ്പം കോംബി ബ്രേക്കിങ്ങ് സംവിധാനവും സുരക്ഷയൊരുക്കും. ടിവിഎസ് എന്ടോര്ക്ക്, സുസുക്കി ആക്സസ്, ഹീറോ ഡെസ്റ്റിനി തുടങ്ങിയ സ്കൂട്ടറുകളുമായാണ് ആക്ടീവ 125 നിരത്തുകളില് ഏറ്റുമുട്ടാനൊരുങ്ങുന്നത്.
ഫ്യുവല് ഇഞ്ചക്ഷന് സംവിധാനമുള്ള 124 സിസി സിംഗിള് സിലിണ്ടര് എന്ജിനാണ് ആക്ടീവയില് പ്രവര്ത്തിക്കുന്നത്. ഇത് എട്ട് ബിഎച്ച്പി പവറും 10.3 എന്എം ടോര്ക്കുമേകും. ഹോണ്ട ഇക്കോ ടെക്നോളജി, സ്മാര്ട്ട് പവര്, എസിജി സ്റ്റാര്ട്ടര് തുടങ്ങിയ സംവിധാനങ്ങളും ഈ വാഹനത്തില് നല്കിയിട്ടുണ്ട്.
Content Highlights: Honda Increased Activa 125 Price; New Price Begins From 68,042 Onwards
Published: 17 Apr 2020, 03:40 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..


Most Commented