രാജ്യത്തെ സ്‌കൂട്ടർ വിൽപ്പനയിൽ വൻ കുതിപ്പ്. സൊസൈറ്റി ഓഫ് ഇന്ത്യൻ ഓട്ടോമൊബൈൽ മാനുഫാക്ചറേഴ്‌സ് (SIAM) പുറത്തുവിട്ട ഡാറ്റ പ്രകാരം 2026 ഒക്ടോബറിൽ 10 സ്‌കൂട്ടർ നിർമ്മാതാക്കൾ ചേർന്ന് 10.96 ലക്ഷം യൂണിറ്റുകളാണ് വിറ്റഴിച്ചത്. മുൻവർഷത്തെ അപേക്ഷിച്ച് ശക്തമായ 32 ശതമാനം വളർച്ചയാണ് ഈ രംഗത്ത് രേഖപ്പെടുത്തിയത്. ഒരു സാമ്പത്തിക വർഷത്തിൽ ആദ്യമായി 1 കോടി വിൽപ്പന എന്ന നേട്ടം കൈവരിക്കാൻ തയ്യാറെടുക്കുകയാണ് ഇന്ത്യയിലെ സ്‌കൂട്ടർ നിർമാതാക്കളെന്ന് മാധ്യമങ്ങൾ റിപ്പോർട്ടു ചെയ്യുന്നു.

To advertise here,

സെപ്റ്റംബറിൽ 10 ലക്ഷം യൂണിറ്റ് വിൽപ്പന എന്ന നേട്ടം കൈവരിക്കുന്നതിന് വെറും 4,424 യൂണിറ്റുകളുടെ കുറവ് മാത്രമാണ് ഉണ്ടായിരുന്നത്. ഏപ്രിൽ മാസം മുതൽ രാജ്യത്തെ സ്‌കൂട്ടർ വിൽപ്പനയിൽ വർധന രേഖപ്പെടുത്തുന്നുണ്ട്. കഴിഞ്ഞ സാമ്പത്തിക വർഷത്തെ റെക്കോർഡ് ആയ 81.1 ലക്ഷം യൂണിറ്റുകളുടെ 73 ശതമാനവും സ്‌കൂട്ടർ നിർമാതാക്കൾ ഇതിനകം കൈവരിച്ചുകഴിഞ്ഞു.

നേട്ടമായി ഇ-സ്‌കൂട്ടറുകളുടെ വർധിച്ച ഡിമാൻഡ് 

രാജ്യത്തെ മുൻനിര നിർമാതാക്കൾ പുതിയ മോഡലുകൾ പുറത്തിറക്കുന്നതും ഗ്രാമീണ മേഖലകളിലും ചെറുപട്ടണങ്ങളിലും സ്‌കൂട്ടറുകളുടെ ഡിമാൻഡ് സ്ഥിരമായി നിലനിൽക്കുന്നതും ഇലക്ട്രിക് സ്‌കൂട്ടറുകളുടെ ഡിമാൻഡ് വർധിക്കുന്നതും അടക്കമുള്ളവയാണ് സ്‌കൂട്ടർ വിൽപനയ്ക്ക് വേഗത കൂട്ടുന്നത്. ഒക്ടോബറിൽ2.24 ലക്ഷം ഇ-സ്‌കൂട്ടറുകൾ വിറ്റഴിക്കപ്പെട്ടിരുന്നു. ഇത് റെക്കോർഡ് വിൽപ്പനയും മുൻവർഷത്തെ അപേക്ഷിച്ച് 93 ശതമാനം കൂടുതലുമാണ്. സ്‌കൂട്ടർ വിൽപനയിൽ ഇ-സ്‌കൂട്ടറുകളുടെ പങ്ക് ഒക്ടോബറിൽ 20 ശതമാനമായി ഉയർന്നിരുന്നു.

സ്‌കൂട്ടർ വിൽപ്പനയുടെ വിശദാംശങ്ങൾ

  • ഹോണ്ട കഴിഞ്ഞ മാസം റെക്കോർഡ് ആയ 4.17 ലക്ഷം യൂണിറ്റുകൾ വിറ്റഴിച്ചു.
  • ടിവിഎസ് എക്കാലത്തെയും ഉയർന്ന പ്രതിമാസ മൊത്തവിൽപ്പനയായ 2.93 ലക്ഷം യൂണിറ്റുകൾ രേഖപ്പെടുത്തുകയും 24 ശതമാനത്തിൽ നിന്ന് ഉയർന്ന് 27 ശതമാനം വിപണി വിഹിതം നേടുകയും ചെയ്തു.
  • ഐക്യൂബ് (iQube), ഓർബിറ്റർ (Orbiter) എന്നിവ പുതിയ പ്രതിമാസ ഉയർന്ന നിരക്കായ 69,797 യൂണിറ്റുകളിൽ എത്തി.
  • 1.22 ലക്ഷം സ്‌കൂട്ടറുകളും 11 ശതമാനം വിഹിതവുമുള്ള സുസുക്കി മൂന്നാം സ്ഥാനത്താണ്.
  • അവെനിസ് (Avenis), ബർഗ്മാൻ സ്ട്രീറ്റ് (Burgman Street) എന്നിവയ്ക്ക് മുന്നിൽ ആക്‌സസ് 125 തന്നെയാണ് അവരുടെ ഏറ്റവും കൂടുതൽ വിറ്റഴിക്കപ്പെടുന്ന ഉൽപ്പന്നം.
  • സുസുക്കിയുടെ ഏക ഇവിയായ ഇ-ആക്‌സസ് (e-Access) 534 യൂണിറ്റുകൾ വിറ്റഴിക്കപ്പെട്ടു
  • ഹീറോ കഴിഞ്ഞ മാസം 1,00,437 സ്‌കൂട്ടറുകൾ വിറ്റഴിച്ചു.
  • ഐസിഇ (ICE) സ്‌കൂട്ടറുകളുടെ 69,224 യൂണിറ്റുകളും വീഡ (Vida) ഇ-സ്‌കൂട്ടറുകളുടെ 30,065 യൂണിറ്റുകളും ഇതിൽ ഉൾപ്പെടുന്നു.
  • ടിവിഎസിനെപ്പോലെ ഹീറോയും ഇ-സ്‌കൂട്ടറുകൾക്കായുള്ള വർദ്ധിച്ചുവരുന്ന ആവശ്യകതയിൽ നിന്ന് വലിയ നേട്ടം കൊയ്യുന്നുണ്ട്.
  • ബജാജും 87 ശതമാനം വർധനവോടെ 65,384 യൂണിറ്റുകൾ വിറ്റ് പുതിയ പ്രതിമാസ ഉയർന്ന വിൽപ്പന കൈവരിച്ചു.
  • ഇതിൽ 64,134 ചേതക് (Chetaks), 1,250 യുലു വെർ 3.0x (Yulu Ver 3.0x) ഇ-ബൈക്കുകൾ ഉൾപ്പെടുന്നു.
  • നിലവിലെ കലണ്ടർ വർഷത്തിൽ അടുത്തിടെ 3 ലക്ഷത്തിലധികം യൂണിറ്റുകൾ ഡെലിവറി ചെയ്ത ആതർ (Ather), 33,786 യൂണിറ്റുകളുമായി ഏഴാം സ്ഥാനത്താണ്.
  • ആമ്പിയർ (Ampere) ഇ-സ്‌കൂട്ടറുകളുടെ നിർമ്മാതാക്കളായ ഗ്രീവ്‌സ് ഇലക്ട്രിക് മൊബിലിറ്റി (Greaves Electric Mobility) കഴിഞ്ഞ മാസം 15,885 യൂണിറ്റുകളുടെ പുതിയ പ്രതിമാസ വിൽപ്പന കൈവരിച്ചു
  • ഇൻഡിയുടെ (Indie) 7,544 യൂണിറ്റുകൾ റിവർ (River) വിറ്റഴിച്ചു.
  • അപ്രീലിയ (Aprilia), വെസ്പ (Vespa) സ്‌കൂട്ടറുകൾ വിപണനം ചെയ്യുന്ന പിയാജിയോ (Piaggio), 4,539 യൂണിറ്റുകളുടെ വിൽപ്പനയോടെ പത്താം സ്ഥാനത്തുണ്ട്.