പൊരുത്തങ്ങൾ ജാതകത്തിനപ്പുറം: ആരോഗ്യ പരിശോധനകൾ വെറുമൊരു നിബന്ധനയല്ല

കേരളീയ സമൂഹത്തിൽ വിവാഹം ഇന്നും കുടുംബങ്ങളുടെയും സമൂഹത്തിന്റെയും ഒത്തുചേരലിന്റെ വലിയൊരു ആഘോഷമാണ്. കാലം മാറുന്നതിനനുസരിച്ച് യുവതലമുറയുടെ ചിന്താഗതികളിലും മുൻഗണനകളിലും വലിയ മാറ്റങ്ങൾ വന്നുതുടങ്ങിയിരിക്കുന്നു. മുമ്പ്‌ വിവാഹാലോചനകളിൽ മുഖ്യപരിഗണന നൽകിയിരുന്നത് ജാതകപ്പൊരുത്തം, കുലമഹിമ, ജാതി, മതം, സാമ്പത്തിക പശ്ചാത്തലം എന്നിവയ്ക്കായിരുന്നു. എന്നാൽ, ഇന്നത്തെ കേരളീയ പശ്ചാത്തലത്തിൽ, രണ്ട് വ്യക്തികളുടെ മാനസികവും ശാരീരികവുമായ പൊരുത്തവും ജീവിതലക്ഷ്യങ്ങളിലെ പരസ്പര ധാരണയുമാണ് ദാമ്പത്യത്തിന്റെ വിജയം നിർണ്ണയിക്കുന്നത്.

നിഷേധിക്കാനാവാത്ത സത്യം

എച്ച്.ഐ.വി, രക്തഗ്രൂപ്പ്, മറ്റു പരിശോധനകൾ... വിവാഹത്തിന് മുമ്പുള്ള ആരോഗ്യ പരിശോധനകളെക്കുറിച്ചുള്ള ചർച്ചകൾ കേരളത്തിൽ സജീവമാകുമ്പോൾ, അതിനെ തെറ്റായ കണ്ണോടെ കാണുന്ന പ്രവണത മാറേണ്ടതുണ്ട്. എച്ച്.ഐ.വി പോലെയുള്ള ഗുരുതരമായ അണുബാധകൾ, ഹെപ്പറ്റൈറ്റിസ്, തലാസീമിയ പോലെയുള്ള ജനിതകരോഗങ്ങൾ എന്നിവ മുൻകൂട്ടി കണ്ടെത്തുന്നത് ഭാവിയിലെ വലിയ ദുരന്തങ്ങൾ ഒഴിവാക്കാൻ സഹായിക്കും. പ്രത്യേകിച്ച്, രക്തഗ്രൂപ്പുകളുടെ പൊരുത്തക്കേടുകൾ (Rh Factor issues) ഗർഭകാലത്തുണ്ടാക്കാവുന്ന ആരോഗ്യപ്രശ്നങ്ങൾ ചെറുക്കാനും ഇത്തരം പരിശോധനകൾ അത്യാവശ്യമാണ്. പരസ്പരമുള്ള സ്നേഹത്തിന്റെയോ വിശ്വാസത്തിന്റെയോ കുറവുകൊണ്ടല്ല, മറിച്ച് പങ്കാളിയോടും വരാൻ പോകുന്ന തലമുറയോടുമുള്ള ഉത്തരവാദിത്വത്തിന്റെ ഭാഗമായാണ് ആരോഗ്യ പരിശോധനകളെ കാണേണ്ടത്.

ശാരീരിക ആരോഗ്യത്തിന് മുൻതൂക്കം കൊടുക്കുമ്പോൾ മാനസികാരോഗ്യ ബുദ്ധിമുട്ടുകൾ മറച്ചുവെക്കേണ്ടതില്ല, വിഷാദരോഗം, ഉത്കണ്ഠ അല്ലെങ്കിൽ മുൻകാല ട്രോമകൾ എന്നിവയെക്കുറിച്ച് തുറന്നു സംസാരിക്കുന്നത് പരസ്പരം മനസ്സിലാക്കാനും മികച്ച പിന്തുണ നൽകാനും സഹായിക്കും

ജാതകപ്പൊരുത്തത്തിനപ്പുറം

യഥാർത്ഥ പൊരുത്തം തേടുമ്പോൾ പൊരുത്തം നോക്കേണ്ടത് ജാതകത്തിലല്ല, മറിച്ച് ജീവിതത്തോടുള്ള കാഴ്ചപ്പാടുകളിലാണ്. ദാമ്പത്യം വിജയിക്കാൻ വ്യക്തികളുടെ സ്വഭാവസവിശേഷതകളും മൂല്യങ്ങളും തമ്മിൽ പൊരുത്തപ്പെടേണ്ടതുണ്ട്. സാമ്പത്തിക കാര്യങ്ങളിലെ അച്ചടക്കം, പണം ചെലവഴിക്കുന്നതിലെ ശൈലി, ജീവിതത്തിലെ പ്രതിസന്ധികളെ നേരിടാനുള്ള മാനസിക കരുത്ത് എന്നിവയെല്ലാം മുൻകൂട്ടി ചർച്ച ചെയ്യപ്പെടേണ്ടതാണ്. അന്ധമായ വിശ്വാസങ്ങൾക്കും പാരമ്പര്യ വാശികൾക്കും അപ്പുറം, പരസ്പര ബഹുമാനത്തിലൂന്നിയ കൂട്ടായ്മയാണ് ആധുനികകാലത്തെ ദാമ്പത്യത്തിന് ആവശ്യം.

കരിയറും പാഷനും

പരസ്പരം താങ്ങാവുന്ന പങ്കാളികൾ കരിയറിന് മുൻഗണന നൽകുന്നവരാണ്. ഉപരിപഠനം, ഉയർന്ന ജോലികൾ, വിദേശ രാജ്യങ്ങളിലേക്കോ മറ്റിടങ്ങളിലേക്കോ ഉള്ള മൈഗ്രേഷൻ, അല്ലെങ്കിൽ നാട്ടിൽതന്നെ സ്വന്തമായി സംരംഭങ്ങൾ തുടങ്ങുക തുടങ്ങിയ ലക്ഷ്യങ്ങൾ പലർക്കുമുണ്ടാകാം. വിവാഹശേഷം പങ്കാളിയുടെ കരിയറിനെ പിന്തുണയ്ക്കാനും ഗാർഹിക ഉത്തരവാദിത്വങ്ങൾ തുല്യമായി പങ്കുവെക്കാനും തയ്യാറാകുന്നത് ഇന്നത്തെ കാലത്ത് ഒഴിച്ചുകൂടാനാവാത്ത കാര്യമാണ്. ഒരാളുടെ വളർച്ച മറ്റൊരാളുടെ തടസ്സമാകരുതെന്ന തിരിച്ചറിവാണ് പുതിയ കാലത്തെ ഏറ്റവും വലിയ പൊരുത്തം.

യുകെ, കാനഡ, മിഡിൽ ഈസ്റ്റ് എന്നിവിടങ്ങളിലേക്കുള്ള കുടിയേറ്റം അല്ലെങ്കിൽ ഐടി മേഖലയിലെ ജോലി സ്ഥലമാറ്റങ്ങൾ എന്നിവയെല്ലാം ദാമ്പത്യത്തെ സ്വാധീനിക്കുന്നു. വിവാഹശേഷം എവിടെ സ്ഥിരതാമസമാക്കണം, ഭാര്യയുടെയോ ഭർത്താവിന്റെയോ കരിയർ വളർച്ചയ്ക്കായി മറ്റൊരാൾ വിട്ടുവീഴ്ചകൾ ചെയ്യേണ്ടി വരുമോ എന്നീ കാര്യങ്ങളിൽ വ്യക്തമായ ധാരണ ആവശ്യമാണ്. അതുകൊണ്ട് തന്നെ പങ്കാളിയിൽനിന്നുള്ള പിന്തുണ അത്യന്താപേക്ഷിതമാണ്.

സാമ്പത്തിക സുതാര്യതയും ആസൂത്രണവും

പല ആധുനിക ദാമ്പത്യങ്ങളിലും വിള്ളലുകൾ വീഴുന്നത് സാമ്പത്തിക കാര്യങ്ങളിലെ സുതാര്യതയില്ലായ്മ കൊണ്ടാണ്. വിദ്യാഭ്യാസ വായ്പകൾ, വ്യക്തിഗത കടങ്ങൾ, കുടുംബത്തിന്റെ ബാധ്യതകൾ എന്നിവ വിവാഹത്തിന് മുമ്പുതന്നെ പരസ്പരം അറിയിച്ചിരിക്കണം. ഒരാൾ മാത്രം സമ്പാദിക്കുകയും സാമ്പത്തിക തീരുമാനങ്ങൾ എടുക്കുകയും ചെയ്യാതെ തുല്യ പങ്കാളിത്തം വഹിക്കുന്നത്‌ ഉറപ്പ് വരുത്തണം. സ്വർണ്ണത്തിനും ആഡംബര വിവാഹത്തിനും അമിത പ്രാധാന്യം നൽകാതെ വിവാഹച്ചെലവുകൾ ചുരുക്കി, ആ തുക ഭാവിയിലെ നിക്ഷേപങ്ങൾക്കായി മാറ്റിവെക്കുന്ന പോസീറ്റീവ് ചിന്ത ഈയിടയായി വർധിച്ച് വരുന്നുണ്ട്. ഒന്നിച്ചുള്ള കാര്യങ്ങളിൽ മാത്രം ശ്രദ്ധ ചെലുത്താതെ വ്യക്തിഗത സമ്പാദ്യങ്ങളോ നിക്ഷേപങ്ങളോ ശ്രദ്ധിക്കേണ്ടതുണ്ട്. ബാങ്ക് അക്കൗണ്ടുകൾ, വായ്പകൾ, പ്രതിമാസ ബജറ്റ് എന്നിവയെക്കുറിച്ച് വ്യക്തമായ ധാരണയുണ്ടാക്കണം. ഇരുവരുടെയും കരിയറിനും സാമ്പത്തിക സ്വാതന്ത്ര്യത്തിനും തുല്യബഹുമാനം കിട്ടുന്നുവെന്ന് ഉറപ്പ് വരുത്തേണ്ടത് പരസ്പരമുള്ള ഉത്തരവാദിത്വമാണ്.

കുടുംബത്തിന്റെ പ്രതീക്ഷകളും വ്യക്തിപരമായ തീരുമാനങ്ങളും

വിവാഹവേളയിലെ ആർഭാടങ്ങൾ, സ്വർണ്ണം, സാമൂഹിക പദവി എന്നിവയ്ക്കായി മാതാപിതാക്കൾ നടത്തുന്ന സമ്മർദ്ദങ്ങൾക്കിടയിൽപെട്ട് പലരും ബുദ്ധിമുട്ടാറുണ്ട്. എന്നാൽ, സമൂഹത്തിന്റെ കണ്ണിൽ നല്ലവരായിരിക്കാൻ സ്വന്തം ജീവിതത്തിന്റെ സാമ്പത്തികഭദ്രത തകർത്തെറിയുന്ന രീതി ഇന്ന് യുവജനങ്ങൾ ചോദ്യം ചെയ്തുതുടങ്ങിയിരിക്കുന്നു. വലിയ കടബാധ്യതകളോടെയുള്ള വിവാഹത്തേക്കാൾ, ലളിതവും സമാധാനപരവുമായ തുടക്കമാണ് പ്രധാനം. സ്വന്തം കാലിൽ തീരുമാനങ്ങൾ എടുക്കാനും കുടുംബത്തിന്റെ അനാവശ്യ ഇടപെടലുകളെ സ്നേഹത്തോടെ നിയന്ത്രിക്കാനുമുള്ള ആർജ്ജവം യുവതലമുറ കാണിക്കേണ്ടതുണ്ട്.

ഗാർഹിക ഉത്തരവാദിത്തങ്ങളിലെ തുല്യത

അടുക്കളയും വീട്ടുജോലികളും സ്ത്രീയുടെ മാത്രം ഉത്തരവാദിത്വമാണെന്ന പരമ്പരാഗത ചിന്താഗതി ആധുനിക വിവാഹങ്ങളിൽ പ്രായോഗികമല്ല. രണ്ടുപേരും ജോലി ചെയ്യുന്ന കുടുംബങ്ങളിൽ ഗാർഹിക ജോലികൾ തുല്യമായി പങ്കുവെക്കപ്പെടേണ്ടതുണ്ട്. പാചകം ചെയ്യുക, വീട് വൃത്തിയാക്കുക, കുട്ടികളെ പരിപാലിക്കുക തുടങ്ങിയ കാര്യങ്ങൾ ആരുടേയും ഔദാര്യമല്ല, മറിച്ച് അടിസ്ഥാന ജീവിത ആവശ്യങ്ങളാണ്. ഈ വിഷയത്തിലെ തുറന്ന ചർച്ചകൾ വിവാഹശേഷമുള്ള അനാവശ്യ തർക്കങ്ങൾ ഇല്ലാതാക്കും.

അതിരുകൾ നിശ്ചയിക്കലും കുടുംബബന്ധങ്ങളും

കൂട്ടുകുടുംബ വ്യവസ്ഥിതിയിൽനിന്ന് അണുകുടുംബങ്ങളിലേക്കുള്ള മാറ്റം ഇന്നും ചർച്ചകൾക്ക് വഴിവെക്കുന്ന കാര്യമാണ്. മാതാപിതാക്കളെയും ബന്ധുക്കളെയും ബഹുമാനിക്കുമ്പോൾതന്നെ, സ്വന്തം ദാമ്പത്യത്തിലേക്ക് അനാവശ്യമായ ഇടപെടലുകൾ അനുവദിക്കാതിരിക്കാനുള്ള അതിരുകൾ (Boundaries) നിശ്ചയിക്കാൻ ദമ്പതികൾ പഠിക്കണം. തീരുമാനങ്ങൾ എടുക്കുമ്പോൾ കുടുംബത്തിന്റെ സമ്മർദ്ദത്തേക്കാൾ, സ്വന്തം ജീവിതത്തിന്റെ യാഥാർത്ഥ്യങ്ങൾക്കാണ് മുൻഗണന നൽകേണ്ടത്

മാറിവരുന്ന ലോകത്ത് കേരളത്തിലെ വിവാഹസങ്കൽപ്പങ്ങളും പൊളിച്ചെഴുതപ്പെടേണ്ടിയിരിക്കുന്നു. പഴയകാല ചിന്താഗതികളെ അന്ധമായി പിന്തുടരുന്നതിന് പകരം, കാലഘട്ടത്തിന്റെ മാറ്റങ്ങൾ ഉൾക്കൊണ്ടുകൊണ്ട് യാഥാർത്ഥ്യബോധത്തോടെ ജീവിതത്തെ സമീപിക്കുന്നതാണ് പുതിയ കാലത്തെ ഏറ്റവും വലിയ പൊരുത്തം. ആരോഗ്യപരമായ സുരക്ഷിതത്വവും കരിയറിലെ പരസ്പര പിന്തുണയും ബഹുമാനവും അടിത്തറയാക്കുന്ന ബന്ധങ്ങൾക്ക് മാത്രമേ വെല്ലുവിളികളെ അതിജീവിക്കാൻ കഴിയൂ.