തമിഴ്നാട്ടിലെ ‘കുട്ടി കേരളം’; 150 വർഷം പഴക്കമുള്ള മലയാളത്താൻപട്ടിയുടെ കഥ

തമിഴ്നാട്ടിലെ മധുര ജില്ലയിൽ അധികമാർക്കും അറിയാത്ത ഒരു കുഞ്ഞു ഗ്രാമമുണ്ട്, 'മലയാളത്താൻപട്ടി'. പേര് കേൾക്കുമ്പോൾ ഈ ഗ്രാമത്തിന് മലയാളികളുമായി എന്തെങ്കിലും ബന്ധമുണ്ടോയെന്ന് സംശയം തോന്നാം. അതിനെല്ലാമുള്ള ഉത്തരം ഇവിടെയെത്തിയാൽ ലഭിക്കും. മലയാളം സംസാരിക്കുന്ന, കേരളത്തിന്റെ പാരമ്പര്യം പിന്തുടരുന്ന ഒരിടം. മധുര മീനാക്ഷി ക്ഷേത്രത്തിൽ നിന്നും 12 കിലോമീറ്റർ അകലെയുള്ള 'മലയാളത്താൻപട്ടി'യെ ഒരു മലയാളി ഗ്രാമമെന്ന് വിശേഷിപ്പിക്കാം. മലയാളത്തനിമ കാത്തുസൂക്ഷിക്കുന്ന ഈ ഗ്രാമത്തിന് ഒന്നര നൂറ്റാണ്ടിലേറെ പഴക്കമുള്ള ഒരു ചരിത്രം പറയാനുണ്ട്, തമിഴ്നാട്ടിൽ ഒരു മലയാളി ഗ്രാമം പിറന്ന കഥ.