എളുപ്പം പണക്കാരനാകാം, ഭാഗ്യപരീക്ഷണവും സ്വന്തമായുണ്ടാക്കിയെടുത്ത സ്‌കില്ലും എന്തിന് വെറുതേ കളയണം, അത് കാശാക്കിക്കൂടേ എന്നൊക്കെ ചിന്തിക്കുന്ന യുവാക്കൾ വളർത്തിയ വലിയ ശ്യംഖലക്കാണ് സർക്കാർ പൂട്ടിടുന്നത്. ചെറുതല്ല, ലോകത്തിലെ ഏറ്റവും വേഗത്തിൽ വളരുന്ന ഓൺലൈൻ മണി ഗെയിമിങ് കമ്മ്യൂണിറ്റികളിൽ ഒന്നാണ് ഇന്ത്യ. ഇവരെല്ലാം കൂടി സർക്കാരിന്  നികുതിയായി അടക്കുന്നത് 20000 കോടി രൂപയിലധികമാണ്. ഇന്ത്യൻ സമ്പദ് വ്യവസ്ഥയുടെ കൂടി ഭാഗമായി മാറിയ അഡിക്ടീവ് ഓൺലൈൻ മണി ഗെയിമുകൾക്കാണ് കേന്ദ്രസർക്കാർ നിയമം മൂലം കൂച്ചുവിലങ്ങിടുന്നത്. അതിൽ തന്നെയുണ്ട്, വിഷയത്തിന്റെ ഗൗരവം. ഇന്ററാക്ടീവ് എന്റർടൈൻമെന്റ് ആൻഡ് ഇന്നൊവേഷൻ കൗൺസിലിന്റെ കണക്കനുസരിച്ച് ഏതാണ്ട് രണ്ട് ലക്ഷം കോടിയുടെ ആസ്തിയും ഒരു ലക്ഷത്തിലേറെ പേർ ജോലി എടുക്കുന്നതുമായി മേഖലയാണിത്. എന്നാൽ യുവാക്കളെ കാർന്നുതിന്നുന്ന വിപത്തിനെ തുരത്താൻ ആ നഷ്ടം കണക്കിലെടുക്കേണ്ടതില്ലെന്ന തീരുമാനമാണ് ഇത്തരമൊരു നിയമത്തിലേക്ക് എത്തിച്ചത്.

To advertise here,

രാജ്യത്തെ 18-25 പ്രായത്തിലുള്ള യുവാക്കളിൽ നാൽപത് ശതമാനത്തോളം പേർ ഇത്തരം ഓൺലൈൻ മണി ഗെയിമുകൾ കളിക്കുന്നുണ്ടെന്നാണ് കണക്ക്.  തീവ്രവാദ ഗ്രൂപ്പുകൾ ഉൾപ്പടെ കള്ളപ്പണം വെളുപ്പിക്കാനായി ഇത്തരം കമ്പനികളെ ഉപയോഗിക്കുന്നതായുള്ള എൻഐഎ കണ്ടെത്തലും ഇതോടൊപ്പം ചേർത്തുവായിക്കേണ്ടതുണ്ട്.  ഒരിക്കൽ ആ വഴിക്ക് പോയാൽ, രസം പിടിച്ചാൽ തിരിച്ചുവരവില്ല.  വർധിക്കുന്ന ആത്മഹത്യ, യുവാക്കളുടെ ലഹരി ഉപയോഗം, പണം തട്ടിപ്പ്, കള്ളപ്പണം വെളുപ്പിക്കൽ തുടങ്ങി അഡിക്ടീവ് ഓൺലൈൻ മണി ഗെയിമുകൾക്ക്  പിന്നിലെ അപകടങ്ങൾ കൂടി കണക്കിലെടുത്താണ് സർക്കാരിന്റെ കടുത്ത നിലപാട്. ലക്ഷങ്ങൾ കടബാധ്യതയായി ആത്മഹത്യ ചെയ്തവരുടെ കണക്കിൽ കേരളത്തിൽനിന്ന് മാത്രം ഇരുപതോളം പേരുണ്ട്.

ഓൺലൈൻ ലോട്ടറിയടക്കമുള്ള എല്ലാ ഓൺലൈൻ ബെറ്റിങ്, ഗ്യാംബ്ലിങ് പരിപാടികൾ നിരോധിക്കുന്ന  നിയമം വരുന്നതോടെ ഓൺലൈൻ ഫാന്റസി സ്പോർട്സുകൾ, പോക്കർ, റമ്മി, മറ്റ് കാർഡ് ഗെയിമുകൾ, ഓൺലൈൻ ലോട്ടറി എന്നിവയെല്ലാം നിരോധിക്കപ്പെടും. ഇനി ഇതൊന്നും ബാധകമല്ലെന്ന തരത്തിൽ വീണ്ടും ഇത്തരം ഗെയിമുകൾക്ക് പിന്നാലെ പോയെന്നിരിക്കട്ടെ സംഗതി ജാമ്യമില്ലാ കുറ്റമാകും.  പ്രവർത്തനം അവസാനിപ്പിച്ചതായി ഇതിനോടകം ഡ്രീം ഇലവൻ അടക്കം പലകമ്പനികളും അറിയിച്ചു കഴിഞ്ഞു. സുപ്പി, പോകർബാസി, മൈ 11 സർക്കിൾ, വിൻസോ കമ്പനികളും പ്രവർത്തനം അവസാനിപ്പിച്ചുകഴിഞ്ഞു.  

നിരോധിച്ചശേഷവും ഇത്തരം സൈറ്റുകൾ പ്രത്യക്ഷപ്പെടുകയോ ഇത്തരം ഗെയിമുകൾക്ക് സൗകര്യമൊരുക്കുകയോ ചെയ്താൽ മൂന്നുവർഷംവരെ തടവോ ഒരു കോടി രൂപവരെ പിഴയോ അല്ലെങ്കിൽ രണ്ടും കൂടിയോ ശിക്ഷ അനുഭവിക്കേണ്ടതായി വരും. ഇനി പരസ്യം. ഓൺലൈൻ ഗെയിമുമായി ബന്ധപ്പെട്ട് ഏതെങ്കിലും തരത്തിലുള്ള പരസ്യങ്ങൾ നൽകിയാൽ അതിനും ശിക്ഷയുണ്ട്.  രണ്ടുവർഷം വരെ തടവോ 50 ലക്ഷം രൂപ വരെ പിഴയോ രണ്ടും കൂടിയോ ശിക്ഷയായി ലഭിക്കാം. ഇനി ഏറ്റവും പ്രധാനപ്പെട്ട കാര്യം, ഇത്തരം ഗെയിമുകളുമായി ബന്ധപ്പെട്ട് എന്തെങ്കിലും പണമിടപാടുകൾ ശ്രദ്ധയിൽപെട്ടാൽ മൂന്നുവർഷം വരെ തടവോ ഒരു കോടി രൂപ വരെ പിഴയോ രണ്ടും കൂടിയോ ശിക്ഷ ലഭിക്കും. കുറ്റകൃത്യങ്ങൾ ആവർത്തിച്ചാൽ മൂന്ന് മുതൽ അഞ്ച് വർഷം വരെ തടവും രണ്ട് കോടി വരെ പിഴയും ലഭിക്കും.

പണ്ട് ഇന്റർനെറ്റ് ഉപയോഗം വ്യാപകമാക്കാൻ ചിലകമ്പനികൾ സൗജന്യ നെറ്റ് ഓഫർ കൊടുത്ത പോലെ തുടക്കത്തിൽ സൗജന്യമായി നൽകി പതിയെ പതിയെ ആളുകളിലേക്ക് ഇറങ്ങിയാണ് ഇത്തരം മണിഗെയിമുകൾ കളംപിടിച്ചത്. ജനപ്രിയ നായകർ പരസ്യത്തിലൂടെ വൻപ്രചാരം നൽകിയതോടെ വിശ്വാസ്യതയും വർധിച്ചു. യുവാക്കൾക്കിടയിൽ അതിവേഗം വളർന്ന ഇത്തരം കമ്പനികളെ പെട്ടെന്ന് അറുത്തുമാറ്റുക എന്നത് അത്ര എളുപ്പമല്ല. അഡിക്ടീവ് സ്വഭാവം തന്നെയാണ് വില്ലൻ. പെട്ടെന്നുള്ള നിർത്തലാക്കൽ ഉപയോക്താക്കളെ എങ്ങനെ ബാധിക്കുമെന്നതും അതിനെന്ത് നടപടിയെടുക്കണമെന്നും സർക്കാർ ആലോചിക്കേണ്ടതുണ്ട്.

 

In Short | India bans fantasy sports, poker, rummy, online lottery and all money-based gaming platforms under strict new legislation. To curb rising threats like youth suicides, money laundering, drug abuse, the government is enforcing a nationwide crackdown—even on an industry paying over ₹20,000 crore in taxes.