ഉദ്ഘാടനസമയത്ത് തന്നെ വാർത്തകളിൽ ഇടംപിടിച്ച ഒന്നാണ് ഇന്ത്യയുടെ അടൽ ടണൽ. ഇപ്പോഴിതാ മറ്റാർക്കും അവകാശപ്പെടാനാവാത്ത പുത്തൻ നേട്ടം കൈവരിച്ചിരിക്കുകയാണ് ഈ തുരങ്കം. 10000 അടി ഉയരത്തിന് മുകളിൽ സ്ഥിതി ചെയ്യുന്ന ലോകത്തിലെ ഏറ്റവും നീളം കൂടിയ ഹൈവേ തുരങ്കപാത എന്ന ​ലോകറെക്കോർഡാണ് അടൽ ടണിനെ തേടിയെത്തിയിരിക്കുന്നത്.

To advertise here,

റോഹ്താങ്ങിൽ സ്ഥിതി ചെയ്യുന്ന ടണൽ മണാലിയെ ലഹൗളുമായാണ് ബന്ധിപ്പിക്കുന്നത്. 9.02 കിലോ മീറ്ററാണ് തുരങ്കത്തിന്റെ നീളം. വേൾഡ് ബുക്ക് ഓഫ് റെക്കോർഡ്സിൽനിന്ന് ഇതുമായി ബന്ധപ്പെട്ട സർട്ടിഫിക്കറ്റ് ലഭിച്ചുവെന്ന് ബോർഡർ റോഡ് ഓർ​ഗനൈസേഷൻ വക്താവ് പറഞ്ഞു. പ്രതിരോധ മന്ത്രാലയവും ഇക്കാര്യം സ്ഥിരീകരിച്ചിട്ടുണ്ട്.

placeholder
ബോർഡർ റോഡ് ഓർ​ഗനൈസേഷൻ ഡയറക്ടർ ജനറൽ ലെഫ്. ജനറൽ രാജീവ് ചൗധരി അടൽ ടണലിന് ലഭിച്ച ലോക റെക്കോർഡ് സർട്ടിഫിക്കറ്റ് ഏറ്റുവാങ്ങുന്നു | ഫോട്ടോ: പി.ടി.ഐ
ബോർഡർ റോഡ് ഓർ​ഗനൈസേഷൻ ഡയറക്ടർ ജനറൽ ലെഫ്. ജനറൽ രാജീവ് ചൗധരി അടൽ ടണലിന് ലഭിച്ച ലോക റെക്കോർഡ് സർട്ടിഫിക്കറ്റ് ഏറ്റുവാങ്ങുന്നു | ഫോട്ടോ: പി.ടി.ഐ​

ഹിമാലയത്തിലെ എഞ്ചിനീയറിങ് വിസ്മയമായാണ് തുരങ്കത്തെ കണക്കാക്കുന്നത്. ഏത് കാലാവസ്ഥയിലും ഉൾനാടുകളിലേക്കും ഇന്ത്യയുടെ മറ്റുഭാ​ഗങ്ങളിലേക്കും  എത്താൻ കഴിയുന്ന തരത്തിലാണ് തുരങ്കം നിർമിച്ചിരിക്കുന്നത്. കൂടാതെ സ്പിതി, ലഹൗൾ ജില്ലകളിൽ വൻ മാറ്റമാണ് ഈ പാത ഉണ്ടാക്കിയിരിക്കുന്നത്.

ടണലിന്റെ തെക്കുഭാ​ഗത്തെ കവാടം മണാലിക്കടുത്ത് 9840 അടി ഉയരത്തിലാണ് സ്ഥിതിചെയ്യുന്നത്. ലഹൗളിനടുത്തുള്ള സിസുവിലാണ് വടക്കൻ കവാടം. 10,171 അടി ഉയരമുണ്ട് ഈ ഭാ​ഗത്തിന്. സുരക്ഷിതയാത്ര ഉറപ്പാക്കുന്നതിനൊപ്പം ഈ തുരങ്കം മണാലിക്കും കീലോംഗിനും ഇടയിലുള്ള ദൂരം 46 കിലോമീറ്ററായി കുറയ്ക്കുകയും ചെയ്തു. നേരത്തേയുള്ളതിൽ നിന്ന് രണ്ട് മണിക്കൂറിലധികമാണ് യാത്രാസമയ ലാഭം.

placeholder
അടൽ ടണലിന്റെ ഉൾവശം | ഫോട്ടോ: എ.എൻ.ഐ
അടൽ ടണലിന്റെ ഉൾവശം | ഫോട്ടോ: എ.എൻ.ഐ

3200 കോടി മുതൽമുടക്കിലാണ് തുരങ്കം നിർമിച്ചത്. 4ജി ഇന്റർനെറ്റ് സൗകര്യമുള്ള ലോകത്തിലെ തന്നെ ആദ്യ ടണലാണിത്. ഓരോ 60 മീറ്ററിലും സിസിടിവി ക്യാമറകളും ഓരോ 150 മീറ്ററിലും എമർജൻസി വാതിലുകളുമുണ്ട്.

Content Highlights: World Book of Records, Atal Tunnel, World’s Longest Highway Tunnel above 10,000 ft