പൊള്ളുന്ന ചൂടില്‍നിന്നും കാടിന്റെ ശീതളച്ഛായ തേടി സഞ്ചാരികള്‍ സകുടുംബം എത്തിയപ്പോള്‍ കോഴിക്കോട് കോടഞ്ചേരിയിലെ തുഷാരഗിരി തിരക്കില്‍ വീര്‍പ്പുമുട്ടി. ഞായറാഴ്ച മാത്രം ഇവിടെ എത്തിയത് 2900 പേര്‍. പ്രവേശനഫീസനത്തില്‍ മാത്രം ലഭിച്ചത് ഒരു ലക്ഷത്തി മുപ്പതിനായിരം രൂപ.
ഫെസിലിറ്റേഷന്‍ സെന്ററിന്റെ പാര്‍ക്കിങ് ഗ്രൗണ്ട് നിറഞ്ഞ്, വാഹനങ്ങള്‍ ഒരു കിലോമീറ്ററോളം ദൈര്‍ഘ്യത്തില്‍ റോഡിന്റെ വശങ്ങളില്‍ പാര്‍ക്ക് ചെയ്തു. ഇത് അല്പനേരം ഗതാഗതക്കുരുക്കിനിടയാക്കി. പെരുന്നാളിന്റെ അവധിദിനങ്ങള്‍ മുന്നില്‍ക്കണ്ട് കച്ചവടക്കാര്‍ കൂടുതല്‍ സാധനങ്ങള്‍ കരുതിയെങ്കിലും ഹോട്ടലുകള്‍ ഉള്‍പ്പെടെ തിരക്കില്‍ കാലിയായി. കാനനയാത്ര മൂന്നുമണിക്ക് അവസാനിപ്പിച്ചു.
ചാലിപ്പുഴ വറ്റിയതോടെ വെള്ളച്ചാട്ടങ്ങള്‍ നിലച്ചെങ്കിലും സഞ്ചാരികള്‍ കുറയുന്നില്ല. ഒന്നാം വെള്ളച്ചാട്ടത്തിന് താഴെ പ്രകൃതിയൊരുക്കിയ തടാകത്തില്‍ മുങ്ങിക്കുളിക്കാന്‍ സഞ്ചാരികളുടെ തിരക്കായിരുന്നു. അവധിദിനങ്ങളില്‍ തുഷാരഗിരിയില്‍ ഉണ്ടാകുന്ന തിരക്ക് നിയന്ത്രിക്കാന്‍ വേണ്ടത്ര ഗൈഡുകളും ജീവനക്കാരും ഇവിടെയില്ല. വനസംരക്ഷണ സമിതിയുടെ കീഴിലുള്ള 15 പേര്‍ വിവിധയിടങ്ങളില്‍ നിലയുറപ്പിക്കുമ്പോള്‍ ടിക്കറ്റ് കൗണ്ടര്‍, പാര്‍ക്കിങ് ഏരിയ എന്നിവിടങ്ങളില്‍ തിരക്ക് നിയന്ത്രിക്കാന്‍ ജീവനക്കാരുടെ കുറവുണ്ടായി.
ഡി.ടിപി.സി.യുടെ കീഴില്‍ പാര്‍ക്കിങ്ങിന് പരിമിതസൗകര്യമേ ഉള്ളൂ. ഡി.ടി.പി.സി. കരാര്‍ നല്‍കി ഇവിടെ പ്രവര്‍ത്തിച്ചിരുന്ന ഹോട്ടല്‍ രണ്ടുമാസമായി അടച്ചിട്ടിരിക്കയാണ്.
കൂടുതല്‍സ്ഥലം കണ്ടെത്തി പാര്‍ക്കിങ്ങിന് മതിയായ സൗകര്യമൊരുക്കണമെന്നും അടച്ചിട്ടിരിക്കുന്ന ഹോട്ടല്‍ തുറന്നുപ്രവര്‍ത്തിക്കണമെന്നും വിനോദസഞ്ചാരികള്‍ ആവശ്യപ്പെടുന്നു.
Content Highlights: thusharagiri waterfalls kozhikode
Published: 24 Apr 2023, 04:47 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented