'ദേവരും ഞാനേ... ദൈവവും ഞാനേ...'; കാന്താരയിലെ പഞ്ചുരുളിക്കോലത്തെ തേടി തുളുമണ്ണിലേക്ക്

വന്യമായ താളമുയര്‍ന്നപ്പോള്‍ കിരീടമണിഞ്ഞ് മുഖത്ത് ചായംപൂശി കുരുത്തോലകൊണ്ട് കാല്‍പ്പാദങ്ങള്‍ക്കുമീതേ വേഷം ചമച്ച് പഞ്ചുരുളി വരവായി. ആദ്യം ദേവസ്ഥാനത്തിനുചുറ്റും വലംവെച്ചു. ഭണ്ഡാരികുടുംബത്തിലെ മൂത്ത കാരണവര്‍ അരിയും ദക്ഷിണയും നല്‍കി. ദക്ഷിണ ഏറ്റുവാങ്ങിയശേഷം ദേവസ്ഥാനത്തിനുമുന്‍പില്‍ പ്രാര്‍ഥിച്ചു. ദേശത്തെ എല്ലാ ദൈവങ്ങളെയും പ്രാര്‍ഥിച്ചു. തുളുനാട്ടിലെ പതിനാറ് ജാതിവിഭാഗത്തില്‍പ്പെടുന്നവരെയും വണങ്ങി. കോലം കെട്ടിയാടാന്‍ അനുവാദം ചോദിച്ചു. പതിഞ്ഞ താളത്തില്‍ തുടങ്ങിയ വാദ്യഘോഷങ്ങള്‍ പൊടുന്നനെ ദ്രുതതാളം കൈവരിച്ചു. തോറ്റത്തിനൊപ്പം വന്യമായ രീതിയില്‍ പഞ്ചുരുളി പകര്‍ന്നാടി. അലറിവിളിച്ചു. നാലുദിക്കിലേക്കും തിരിഞ്ഞ് ദൈവം തന്റെ പൂര്‍വകഥ വിവരിച്ചു. തുളുനാട്ടില്‍നിന്ന് മലയിറങ്ങിവന്ന കഥ... തലമുറകളായി പകര്‍ന്നാടുന്ന ജന്മവൃത്താന്തം, പഞ്ചുരുളിയുടെ ഐതിഹ്യം... നിഗൂഢത നിറഞ്ഞ കഥകള്‍... എല്ലാം തോറ്റത്തിലുണ്ടായിരുന്നു.

മലയിറങ്ങി വന്ന ദൈവം

തെയ്യങ്ങളുടെ പുരാവൃത്തങ്ങള്‍ ഇന്ന് അനായാസം ലഭ്യമാകുമെങ്കിലും ഭൂതക്കോലങ്ങളുടെ കാര്യങ്ങള്‍ വ്യത്യസ്തമാണ്. തുളുഭാഷയിലാണ് ഭൂതത്തോറ്റങ്ങള്‍ ചിട്ടപ്പെടുത്തിയിരിക്കുന്നത്. കോലം ആടിക്കഴിഞ്ഞ് അവസാനം മൊഴിയുന്ന ഭാഷയും തുളുവിലാണ്. നാടും കാടും അതിരുതീര്‍ക്കാതിരുന്ന കാലത്ത് മഴയെയും ഇടിമിന്നലിനെയും വരെ ആരാധിച്ചിരുന്ന മനുഷ്യര്‍, വന്യമൃഗങ്ങള്‍ക്കും അതേസ്ഥാനം കല്പിച്ചുപോന്നിരുന്നു. പുലിയും നരിയും നാഗവും പന്നിയുമെല്ലാം അവിടെ തെയ്യക്കോലങ്ങളായി അവതരിച്ചു. തുളുനാട്ടിലും കാസര്‍കോടിന്റെ ചില പ്രദേശങ്ങളിലുമാണ് പഞ്ചുരുളി കെട്ടിയാടാറ്. കുപ്പേ പഞ്ചുരുളി, അണ്ണപ്പ പഞ്ചുരുളി, വര്‍ണാറ പഞ്ചുരുളി, മലാറ പഞ്ചുരുളി എന്നീ കോലങ്ങളാണുള്ളത്. ഭണ്ഡാരി തറവാട്ടില്‍ അയിത്തപ്പ കെട്ടിയാടുന്നത് കുപ്പേ പഞ്ചുരുളിയായിരുന്നു. ആദ്യം പഞ്ചുരുളി തോറ്റമുണര്‍ന്നെത്തും. പിന്നീട് വേഷധാരിയായെത്തും. അതിനുശേഷമാണ് കല്ലുരുട്ടി വരുന്നത്. പിന്നെ ഇരുവരും ഒരുമിച്ചെത്തും. പുലര്‍ച്ചെ ഉഗ്രമൂര്‍ത്തികളായ ഗുളികനും റാവു ഗുളികനും ദേവസ്ഥാനത്ത് ഉറഞ്ഞാടും.

വന്യമായ താളത്തില്‍ നാഗസ്വരമുയര്‍ന്നു. താസെയുടെ ശബ്ദം നടുക്കുമാറുയര്‍ന്നു. പഞ്ചുരുളി ഇരുകൈകളിലും തീനാളങ്ങള്‍ ഏറ്റുവാങ്ങി, അലറിവിളിച്ച് നാഗത്തറയിലെത്തി തൊഴുതു. പഞ്ചുരുളിയുടെ പിന്നാലെ കല്ലുരുട്ടിയെത്തി. ചേലചുറ്റി മുഖത്ത് ചായംതേച്ച് കല്ലുരുട്ടി ദേവസ്ഥാനത്തെ വലംവെച്ചു. ഉഗ്രരൂപിണിയാണ് കല്ലുരുട്ടി. അയിത്തപ്പയുടെ ഭാര്യാസഹോദരനാണ് കല്ലുരുട്ടിയായി വരുന്നത്. നാലുദിക്കുകളെയും വന്ദിച്ചു. വന്യമായ രീതിയില്‍ കല്ലുരുട്ടി പകര്‍ന്നാടി. പഞ്ചുരുളിയുടെ സഹോദരി വേഷത്തില്‍ ചിലപ്പോള്‍ എത്തുന്ന ഭൂതക്കോലമാണത്.

തോറ്റങ്ങളാല്‍ മുഖരിതമായ ആട്ടത്തിനൊടുവില്‍ വരാഹ (പന്നി) വേഷത്തില്‍ പഞ്ചുരുളിയും കല്ലുരുട്ടിയും ഒരുമിച്ചെത്തി. മനോഹരവും നിഗൂഢവുമായി പകര്‍ന്നാടുന്ന കോലങ്ങള്‍ മൂന്ന് ലോകങ്ങളുടെ കഥപറഞ്ഞു. കൃഷിഭൂമിയുടെ മണ്ഡലമായ ഗ്രാമ്യം. തരിശുഭൂമിയും വനങ്ങളും ഉള്‍പ്പെടുന്ന ജംഗലയും ആരണ്യവും. ആത്മാക്കളും ദൈവങ്ങളും വസിക്കുന്ന ഭൂതലോകം. ഈ മൂന്ന് ലോകങ്ങളും തമ്മിലുള്ള ധാര്‍മികമായ ബന്ധത്തെ വിവരിക്കുന്ന ഐതിഹ്യം തോറ്റമായുയര്‍ന്നു. പാടനങ്ങള്‍ എന്ന് വിളിക്കപ്പെടുന്ന പഴയ തുളുവിലെ പാരായണങ്ങളിലൂടെ ഓരോ കോലപ്രതിഷ്ഠയുടെയും ഉദ്ഭവവും ഐതിഹ്യവും എട്ടുദിക്കും പൊട്ടുമാറുച്ചത്തില്‍ പഞ്ചുരുളി വിവരിച്ചുകൊണ്ടിരുന്നു. ആടിയുറഞ്ഞെത്തുന്ന കോലങ്ങള്‍ കൈകൂപ്പിനിന്ന ഭക്തരിലേക്ക് ഇറങ്ങിച്ചെന്ന് അവരെ അനുഗ്രഹിക്കുന്നു. നേരം പുലരാന്‍ ഇനി നാഴികകള്‍ മാത്രം ബാക്കി. പഞ്ചുരുളിയും കല്ലുരുട്ടിയും ദേവസ്ഥാനത്തിന് മുന്നില്‍നിന്നു. അവരോട് ആകുലതകള്‍ ഓരോന്നായി പറയുന്ന കുടുംബാംഗങ്ങള്‍. പ്രതിവിധികള്‍ ഓരോന്നായി ദൈവം അവര്‍ക്ക് നല്‍കി. 

രോഗവും മൃത്യുവും അസ്ഥിരമാക്കിയ ഭൗതികലോകത്തെ സംരക്ഷിച്ച് നിര്‍ത്തുന്ന അദൃശ്യമായ ലോകത്തെ ദേവതകളത്രേ അവര്‍. തിരിച്ചുപോരാന്‍ സമയമായിരിക്കുന്നു. ഏവരെയും അനുഗ്രഹിക്കുകയായിരുന്നു കോലങ്ങള്‍. നിഗൂഢതനിറഞ്ഞ പഞ്ചുരുളിയിലെ  ആചാരങ്ങളെക്കുറിച്ച് അന്നാട്ടുകാര്‍ക്കുപോലും കാര്യമായ അറിവില്ലായിരുന്നു. 'വേണ്ടത് മാത്രം എടുക്കുക' -അതു പറഞ്ഞ് ഞങ്ങളെ യാത്രയാക്കിയ പഞ്ചുരുളി, അയിത്തപ്പ എന്ന മനുഷ്യനായിരുന്നോ, അതോ തുളുനാട്ടിലെ മണ്ണിലുറഞ്ഞാടിയ ദൈവമോ?  

കാന്താര
 

Kantara movie poster | Photo: twitter.com/hombalefilms

മണ്ണും മനുഷ്യനും മിത്തും കൂടിച്ചേര്‍ന്ന മാന്ത്രികത. അതാണ് റിഷബ് ഷെട്ടി സംവിധാനം ചെയ്ത് മുഖ്യവേഷത്തിലെത്തിയ കാന്താര എന്ന കന്നഡ ചിത്രം. മൂന്ന് കാലഘട്ടങ്ങളുടെ കഥപറയുന്ന കാന്താരയുടെ പ്രമേയം തുളുനാട്ടിലെ ഭൂതക്കോലമായ പഞ്ചുരുളിയെക്കുറിച്ചാണ്. നിഗൂഢമായ കാട് എന്നാണ് കാന്താരയുടെ അര്‍ത്ഥം. കാന്താരയില്‍ ഉറഞ്ഞാടുന്ന ഭൂതക്കോലത്തിന്റെ അതേരൂപമായിരുന്നു പാവൂര്‍ കോടി തറവാട്ടില്‍ കെട്ടിയാടിയ പഞ്ചുരുളിക്കും. എന്നാല്‍, കാന്താര ചിത്രത്തിലേതുപോലുള്ള വന്യമായ പകര്‍ന്നാട്ടം പഞ്ചുരുളിയില്‍ കാണാനാകില്ല. തുളുനാട്ടിലെത്തിയ പഞ്ചുരുളി രാജാക്കന്മാരെ സംരക്ഷിച്ചുപോന്നുവെന്നും പറയപ്പെടുന്നു. കാന്താര സിനിമയില്‍ ദൈവത്തിന് പകരം ഭൂമി വിട്ടുകൊടുത്ത രാജാവിന്റെ കഥ ഈ പശ്ചാത്തലത്തിലായിരിക്കും ഉള്‍ച്ചേര്‍ത്തിരിക്കുന്നത്

(മാതൃഭൂമി യാത്രയില്‍ പ്രസിദ്ധീകരിച്ചത്‌)

+5