മറ്റെല്ലാം മാറ്റിവെച്ച് കാടുകയറാം; കാട്ടിലൂടെയുള്ള യാത്രക്കായിതാ നാല് ദേശീയോദ്യാനങ്ങള്‍

കടുവകളുടെയും പുള്ളിപ്പുലികളുടെയും സാന്നിധ്യംകൊണ്ട് അനുഗൃഹീതമായ കാടകമാണ് കര്‍ണാടകയിലെ കുടക്, മൈസൂര്‍ ജില്ലകളിലായി സ്ഥിതിചെയ്യുന്ന നാഗര്‍ഹോളെ. ബ്രഹ്മഗിരി താഴ്വരയില്‍ കാവേരിയുടെ കൈവഴിയായ കബനീ നദിയുടെ കരയിലാണ് നാഗര്‍ഹോളെ. ഇരുന്നൂറിനടുത്ത് കടുവകള്‍ ഇവിടെയുണ്ടെന്നാണ് കണക്ക്. കാടിനെ അടുത്തറിയാനാഗ്രഹിക്കുന്നവര്‍ ഒരിക്കലെങ്കിലും നാഗര്‍ഹോളയിലെത്തിയേ മതിയാവൂ. സുന്ദരമായ പുല്‍മേടുകളും തടാകങ്ങളും കൊച്ച് അരുവികളുമൊക്കെ നിറഞ്ഞ, അതിശയിപ്പിക്കുന്ന വനമാണിത്. വിവിധ തരത്തിലുള്ള പക്ഷികള്‍, ആനകള്‍, കരടികള്‍, കാട്ടുപോത്ത്, കടുവ, പുലി, വിവിധയിനം മാനുകള്‍ കാട്ടുപന്നി തുടങ്ങി നാനാതരത്തിലുള്ള വന്യജീവികളുടെ ആവാസ കേന്ദ്രമാണ് ഈ ഉദ്യാനം. 1988-ല്‍ നിലവില്‍ വന്ന ഈ ദേശീയ ഉദ്യാനം രാജീവ് ഗാന്ധി നാഷണല്‍ പാര്‍ക്ക് എന്ന പേരിലും  അറിയപ്പെടുന്നു. 643 ചതുരശ്രകിലോമീറ്ററാണ് പാര്‍ക്കിന്റെ വിസ്തൃതി. നിരവധി ജലാശയങ്ങളാല്‍ സമ്പന്നമാണ് നാഗര്‍ഹോളെ നാഷണല്‍ പാര്‍ക്ക്. ഇലപൊഴിയും കാടുകളായതുകൊണ്ട് ഫെബ്രുവരി, മാര്‍ച്ച് മാസങ്ങളാണ് മൃഗങ്ങളെ അടുത്ത് കാണാന്‍ ഏറ്റവും ഉചിതമായ സമയം.  ഈ പാര്‍ക്കിന് രണ്ട് പ്രവേശന കവാടങ്ങളുണ്ട്. കബനിയിലും (കാരപുര) ഹുന്‍സൂരിന് സമീപത്തുള്ള വീരനഹള്ളിയിലുമാണ് ഈ കവാടങ്ങള്‍. വനം വകുപ്പ് നടത്തുന്ന മിനി ബസ് സഫാരി വീരനഹൊസഹള്ളി ഭാഗത്ത് നിന്നാണ് ആരംഭിക്കുന്നത്. കര്‍ണാടക ഗവണ്‍മെന്റുമായി സഹകരിച്ച് പ്രവര്‍ത്തിക്കുന്ന ജംഗിള്‍ ലോഡ്ജ് ആന്‍ഡ് റിസോര്‍ട്ട് ജീപ്പ് സഫാരികള്‍ നടത്തുന്നുണ്ട്. കബനി റിവര്‍ ലോഡ്ജിന്റെ പരിസരത്ത് നിന്ന് കബനി നദിയിലൂടെ ബോട്ടിങ്ങും നടത്താം.

ആനകളുടെയും കടുവകളുടെയും ബന്ദിപ്പുര്‍

കടുവകളും ആനകളുമുള്‍പ്പെടെയുള്ള വന്യമൃഗങ്ങളുടെ സ്വൈര്യവിഹാരത്തിന് ആവാസവ്യവസ്ഥയൊരുക്കി അരനൂറ്റാണ്ടോളമായി നിലനിര്‍ക്കുന്ന ദേശീയോദ്യാനമാണ് ബന്ദിപ്പൂര്‍. ഇന്ത്യയിലെത്തന്നെ വലിയ കടുവസങ്കേതങ്ങളിലൊന്നാണിത്. കര്‍ണാടകത്തില്‍ ഡി. ദേവരാജ് അരശ് മുഖ്യമന്ത്രിയായിരുന്നകാലത്ത് ബന്ദിപ്പൂര്‍ ടൈഗര്‍ പ്രോജക്ട് ആയാണ് ഈ വന്യജീവിസങ്കേതത്തിന് തുടക്കംകുറിച്ചത്. അന്ന് കേന്ദ്രം ഭരിച്ചിരുന്ന ഇന്ദിരാഗാന്ധി സര്‍ക്കാരിന്റെ തീരുമാനത്തിന്റെ ഭാഗമായിരുന്നു ഇത്. 1973-ലാണ് ഈ വനമേഖലയെ ടൈഗര്‍ പ്രോജക്ടിലുള്‍പ്പെടുത്തി അന്നത്തെ മുഖ്യമന്ത്രി പ്രഖ്യാപിച്ചത്. കടുവകളുടെ സംരക്ഷണമായിരുന്നു ലക്ഷ്യം. പിന്നീട് കടുവസങ്കേതത്തിന്റെ രൂപവും ഭാവവും മാറി.

1985-ല്‍ ബന്ദിപ്പൂര്‍ കടുവസങ്കേതത്തെ ദേശീയോദ്യാനമായി പ്രഖ്യാപിച്ചു. പതിറ്റാണ്ടുകള്‍ പിന്നിട്ടതോടെ ഈ വനമേഖലയില്‍ കടുവകളുടെ എണ്ണവും പെരുകി. കാട്ടാനകളുടെ വിഹാരരംഗം കൂടിയാണ് ഇപ്പോള്‍ ബന്ദിപ്പൂര്‍. 1,500-ഓളം ആനകള്‍ ഇവിടെയുണ്ടെന്നാണ് ഏകദേശകണക്ക്. കടുവകളുടെയും ആനകളുടെയും എണ്ണം ഓരോ കൊല്ലവും കൂടിവരുകയാണ്. ഏഷ്യന്‍ ആനകള്‍ക്ക് ഏറ്റവും ഇഷ്ടപ്പെട്ട ജീവിത പരിസ്ഥിതിയാണ് ബന്ദിപ്പൂര്‍ വനമേഖലയിലേത്. ഓരോ ഏഴ് ചതുരശ്ര കിലോമീറ്റര്‍ വനഭാഗത്തും രണ്ട് കാട്ടാനയും ഒരു കടുവയും ഒരു പുള്ളിപ്പുലിയും വിഹരിക്കുന്നുണ്ടെന്നാണ് കണക്ക്. വനാതിര്‍ത്തിയിലെ ജനവാസമേഖലകളിലേക്കും ചിലപ്പോള്‍ വന്യജീവികളെത്തുന്നു. ഇത് ജനങ്ങള്‍ക്ക് വലിയ ഭീഷണി സൃഷ്ടിക്കുന്നുമുണ്ട്. നാഗര്‍ഹോളെ വനമേഖലയോടുചേര്‍ന്നാണ് ബന്ദിപ്പൂര്‍ ദേശീയോദ്യാനത്തിന്റെ കിടപ്പ്. വയനാട് വന്യജീവിസങ്കേതം ബന്ദിപ്പൂരിന്റെ അതിര്‍ത്തി പങ്കിടുന്നതാണ്. തമിഴ്‌നാട്ടിലെ മുതുമലൈ വന്യജീവിസങ്കേതമാണ് ബന്ദിപ്പൂരിന്റെ മറ്റൊരു അതിര്. കാടിനെയും കാട്ടുമൃഗങ്ങളെയും അടുത്തറിയാനായി എത്തുന്ന സഞ്ചാരികളുടെ ഇഷ്ടസങ്കേതംകൂടിയാണിത്. കടുവകളെ കണ്ട് കാട്ടിലൂടെ യാത്രതരപ്പെടുന്ന ടൈഗര്‍ സഫാരിയും ഇവിടെ വനംവകുപ്പ് സഞ്ചാരികള്‍ക്കായി ഒരുക്കിയിട്ടുണ്ട്.