അതീവ സുരക്ഷാ ക്രമീകരണങ്ങൾ ഏർപ്പെടുത്തിയാണ് മെറ്റ, ഗൂഗിൾ, ആപ്പിൾ തുടങ്ങിയ ടെക് ഭീമന്മാർ പ്രവർത്തിക്കുന്നത്. സൈബർ ലോകത്തെ ഈ വമ്പൻ പ്രതിരോധത്തിന് കോടിക്കണക്കിന് രൂപയാണ് ഓരോ കമ്പനിയും ചെലവഴിക്കുന്നത്. പതിയിരിക്കുന്ന അപകടങ്ങളും സുരക്ഷാവീഴ്ചകളും ചൂണ്ടിക്കാണിക്കുന്ന ടെക്കികളെ ഗൂഗിൾ അടക്കമുള്ള മുൻനിര കമ്പനികൾ അനുമോദിക്കുകയും പാരിതോഷികം നൽകുകയും ചെയ്യാറുമുണ്ട്. ഗൂഗിളിന്റെ സുരക്ഷാപാളിച്ചകൾ ശ്രദ്ധയിൽപെടുത്തി പരിഹാരം നിർദേശിക്കുന്നവർക്കുള്ള വി.ആർ.പി പുരസ്‌കാരം (ഗൂഗിൾ ക്ലൗഡ് വൾനറബിലിറ്റി റിവാർഡ് പ്രോഗ്രാം) നേടിയിരിക്കുകയാണ് മലയാളി വിദ്യാർഥി കെ.എൽ. ശ്രീറാമും സുഹൃത്ത് ശിവനേഷ് അശോകും. ഗൂഗിൾ ക്ലൗഡ് വൾനറബിലിറ്റി റിവാർഡ് പ്രോഗ്രാമിന്റെ രണ്ടും മൂന്നും നാലും സ്ഥാനം കരസ്ഥമാക്കിയ ഇവർക്ക് 1,33,000 ഡോളറാണ് (1.06 കോടി രൂപ) സമ്മാനത്തുകയായി ലഭിക്കുക.

To advertise here,

'സെർച്ച് എൻജിൻ, വെബ്സൈറ്റുകൾ, ആപ്പുകൾ തുടങ്ങി ഗൂഗിൾ സേവനങ്ങളിൽ ഏതിലെങ്കിലും സുരക്ഷാവീഴ്ച കണ്ടെത്തിയാൽ നമുക്കത് അറിയിക്കാം. സുരക്ഷാവീഴ്ച ആർക്കു വേണമെങ്കിലും എപ്പോൾ വേണമെങ്കിലും റിപ്പോർട്ട് ചെയ്യാം. ഗൂഗിൾ ഡെവലപ്പർമാർ ആ ബഗ് പരിഹരിക്കുകയും പാരിതോഷികം നൽകുകയും ഗൂഗിൾ ഹാൾ ഓഫ് ഫെയിം ലിസ്റ്റിൽ പേര് പ്രസിദ്ധീകരിക്കുകയും ചെയ്യും. ഈ രീതിയിൽ റിപ്പോർട്ട് ചെയ്ത റിപ്പോർട്ടുകൾ അടിസ്ഥാനപ്പെടുത്തി ഗൂഗിൾ ക്ലൗഡ് വൾനറബിലിറ്റി റിവാർഡ് പ്രോഗ്രാം എന്ന പേരിൽ ഒരു ലേഖനമത്സരം ഗൂഗിൾ സംഘടിപ്പിച്ചിരുന്നു. മത്സരത്തിൽ രണ്ടും മൂന്നും നാലും സ്ഥാനങ്ങളാണ് ഞങ്ങൾക്ക് ലഭിച്ചത്'- ശ്രീറാം പറയുന്നു.

ഗൂഗിൾ ഹാൾ ഓഫ് ഫെയിം 
എത്തിക്കൽ ഹാക്കർമാരുടെയും ടെക്കികളുടെയും കരിയറിലെ അഭിമാനനേട്ടമാണ് ഗൂഗിൾ ഹാൾ ഓഫ് ഫെയിം നേട്ടം. പട്ടികയിലിടം പിടിക്കുക അത്ര എളുപ്പമല്ലെന്നത് തന്നെയാണ് ഈ അംഗീകാരത്തിന്റെ ഏറ്റവും വലിയ ആകർഷണീയത. ആപ്പിൾ, മെറ്റ, ഗൂഗിൾ തുടങ്ങി മിക്ക ഐ.ടി. ഭീമന്മാരും ടെക്കികൾക്ക് ഈ അംഗീകാരം നൽകാറുണ്ട്. ഗൂഗിളിന്റെ ഏതെങ്കിലും സേവനങ്ങളിൽ സുരക്ഷാ വീഴ്ചകളോ സാങ്കേതികപ്പിഴവോ ചൂണ്ടിക്കാണിച്ച് അത് കമ്പനിയെ അറിയിക്കുന്നവർക്കുള്ളതാണ് ഗൂഗിൾ ഹാൾ ഓഫ് ഫെയിം. ഇതുകൂടാതെ വലിയൊരു തുക പാരിതോഷികമായും കമ്പനികൾ നൽകാറുണ്ട്. സുരക്ഷാവീഴ്ചകളുടെ കാഠിന്യമനുസരിച്ചാണ് ഹാൾ ഓഫ് ഫെയിം ലിസ്റ്റിൽ പേരും കാഷ് പ്രൈസും നിശ്ചയിക്കപ്പെടുക. 

അപകടത്തിന്റെ കാഠിന്യവും നിലവാരവും അനുസരിച്ച് റാങ്കിങ്ങിലും പാരിതോഷികമായി ലഭിക്കുന്ന തുകയിലും വ്യത്യാസമുണ്ടാകും. അതായത് ഏറ്റവും വലിയ പിഴവ് ചൂണ്ടിക്കാണിച്ചയാളാകും ലിസ്റ്റിൽ ഒന്നാമൻ. 2022-ൽ മാത്രം 2,900-ലധികം സുരക്ഷാ പ്രശ്‌നങ്ങളാണ് ഇത്തരത്തിൽ കണ്ടെത്തുകയും പരിഹരിക്കുകയും ചെയ്തത്. ഏകദേശം 12 മില്യൺ യു.എസ്. ഡോളറാണ് (ഏകദേശേം 98.4 കോടി രൂപ) ഗൂഗിൾ ഇതിന് മാത്രമായി ചെലവിട്ടത്. 2022-ലെ ഗൂഗിൾ ഹാൾ ഓഫ് ഫെയിം ഗൂഗിൾ വി.ആർ.പി. റാങ്കിങ്ങിൽ ആഗോള തലത്തിൽ 17-ാം സ്ഥാനവും ഇന്ത്യയിൽ ഒന്നാം സ്ഥാനക്കാരനുമാണ് ശ്രീറാം. വിദ്യാർഥിയായിരിക്കെയാണ് ഈ നേട്ടമെന്നതും ശ്രീറാമിനെ ശ്രദ്ധേയനാക്കുന്നു. പത്തിലേറെ തവണയാണ് ശ്രീറാം ഗൂഗിളിലെ സുരക്ഷാവീഴ്ചകൾ റിപ്പോർട്ട് ചെയ്തത്. 

placeholder
.
ഗൂഗിൾ ഹാൾ ഓഫ് ഫെയിം പട്ടിക

ഗൂഗിൾ ക്ലൗഡ് വൾനറബിലിറ്റി റിവാർഡ് പ്രോഗ്രാം (VRP Prizes)

ഗൂഗിൾ ക്ലൗഡിന്റെ സുരക്ഷാരീതി മെച്ചപ്പെടുത്തുന്നതിനും ഉപയോക്താക്കൾക്ക് മികച്ച സേവനം ലഭ്യമാക്കുന്നതിനും ഗവേഷകരെ പ്രോത്സാഹിപ്പിക്കുന്നതിനായാണ് ഗൂഗിൾ വൾനറബിലിറ്റി റിവാർഡ് പ്രോഗ്രാം സംഘടിപ്പിക്കുന്നത്. ഗൂഗിൾ ഡൊമെയ്‌നുകളിലെ പാളിച്ചകൾ കണ്ടെത്തുകയും അതിനുള്ള പരിഹാരം നിർദ്ദേശിക്കുകയും ചെയ്ത് ഹാൾ ഓഫ് ഫെയിം പട്ടികയിൽ ഉൾപ്പെട്ടവർക്കായി സംഘടിപ്പിക്കുന്ന ലേഖന മത്സരമാണിത്. കണ്ടെത്തിയ വീഴ്ച, പരിഹാരം, മറ്റ് മാർഗനിർദേശങ്ങൾ, ഡെമോൺസ്‌ട്രേഷൻ എന്നിവയാണ് ലേഖനത്തിൽ നൽകേണ്ടത്. വിജയികൾക്ക് നിശ്ചിത തുകയാണ് പാരിതോഷികമായി ലഭിക്കുക. ശ്രീറാമും സുഹൃത്തും 2022-ൽ ഗൂഗിളിൽ ബഗ് റിപ്പോർട്ട് ചെയ്തിരുന്നു. 20,000 യു.എസ്. ഡോളറാണ് അന്ന് സമ്മാനമായി ലഭിച്ചത്. ആ സുരക്ഷാവീഴ്ചയും അനുബന്ധകാര്യങ്ങളുമാണ് വി.ആർ.പിയിൽ ശ്രീറാം നൽകിയത്. ഗൂഗിൾ ക്ലൗഡിന്റെ മറ്റ് ഉപയോക്താക്കളുടെ വിവരങ്ങൾ കാണാനും എഡിറ്റ് ചെയ്യാനും ഫുൾ അക്കൗണ്ട് ടേക്ക് ഓവർ ചെയ്യാനും സാധിക്കുന്ന ബഗ്ഗുകളാണ് ശ്രീറാമും സുഹൃത്തും കണ്ടെത്തി പരിഹരിച്ചത്. 

ഗൂഗിളിന്റെ വിവിധ പ്ലാറ്റ്‌ഫോമുകളിലെ സുരക്ഷാവീഴ്ചകൾ കണ്ടെത്തുന്നതുമായി ബന്ധപ്പെട്ട ഗവേഷണ പ്രബന്ധങ്ങളാണ് ഇരുവരേയും വി.ആർ.പി. പ്രൈസിന് അർഹരാക്കിയത്. ഗൂഗിൾ ഡാറ്റാ സെന്ററുകളിലെ കംപ്യൂട്ട് എഞ്ചിൻ വിർച്വൽ മെഷീനുകളിലേക്ക് ഹാക്കർക്ക് കടന്നുകയറാൻ സാധിക്കുന്ന സുരക്ഷാവീഴ്ചയെ കുറിച്ചും അത് കണ്ടെത്തുന്നതിനെ കുറിച്ചുമുള്ള പ്രബന്ധമാണ് ആദ്യത്തേത്. രണ്ടാം സമ്മാനമാണ് ഇതിന് ലഭിച്ചത്. 60 ലക്ഷത്തിലേറെ രൂപയാണ് ഇതിൽ ഇരുവർക്കും സമ്മാനമായി ലഭിക്കുക. 

ഗൂഗിളിന്റെ ക്ലൗഡ് വർക്ക് സ്റ്റേഷനിലേക്ക് കടന്നുകയറാനും ഉപഭോക്താവിന്റെ വിവരങ്ങൾ ചോർത്താനും  ഹാക്കർക്ക് സാധിക്കുമായിരുന്ന സുരക്ഷാ പഴുത് കണ്ടെത്തിയതിനെ കുറിച്ചുള്ള പ്രബന്ധമായിരുന്നു രണ്ടാമത്തേത്. മൂന്നാം സമ്മാനമായി 25 ലക്ഷത്തിലേറെ രൂപയാണ് ഇതിന്  ലഭിച്ചത്. 

സമാനമായി ഗൂഗിളിന്റെ വെർട്ടെക്‌സ് എ.ഐ. ഉപഭോക്താവിന്റെ വിവരങ്ങൾ ചോർത്താനാകുന്ന സുരക്ഷാ പ്രശ്‌നങ്ങൾ കണ്ടെത്തുന്നതുമായി ബന്ധപ്പെട്ട പ്രബന്ധത്തിനാണ് നാലാം സമ്മാനം. 25 ലക്ഷത്തിലേറെ ഇതിനും ലഭിച്ചു.

ലണ്ടനിലെ ഗൂഗിൾ ആസ്ഥാനത്ത് സംഘടിപ്പിച്ച അന്താരാഷ്ട്ര കോൺഫറൻസിൽ പങ്കെടുക്കാനും ശ്രീറാമിന് അവസരം ലഭിച്ചിരുന്നു. സാങ്കേതികപ്പിഴവ് ചൂണ്ടിക്കാണിക്കുന്നവരിൽനിന്ന് തിരഞ്ഞെടുക്കപ്പെട്ട നൂറ് പേർക്കായിരുന്നു അവസരം. ഹിന്ദുസ്ഥാൻ കോളേജ് ചെന്നൈ ബി.ടെക്. കമ്പ്യൂട്ടർ സയൻസ് വിദ്യാർഥിയായ ശ്രീറാം സൈബർ സെക്യൂരിറ്റി മേഖലയിൽ സുഹൃത്തുക്കൾക്കൊപ്പം സ്‌ക്വാഡ്രൻ ലാബ് (Squadron Lab)എന്ന സ്റ്റാർട്ടപ്പും നടത്തുന്നുണ്ട്. കന്യാകുമാരി സ്വദേശി കൃഷ്ണമൂർത്തിയുടെ ലിജിയുടേയും മകനാണ്. രണ്ട് സഹോദരങ്ങളുണ്ട്.

എന്താണ് എത്തിക്കൽ ഹാക്കിങ്? 

അതീവ സുരക്ഷിതമെന്ന് നമ്മൾ കുരുതുന്ന വെബ്‌സൈറ്റുകളിൽ പോലും ഹാക്കർമാർ നുഴഞ്ഞുകയറി വിവരങ്ങൾ ചോർത്തിയേക്കാം. എന്നാൽ, ഇവരെ പ്രതിരോധിക്കുന്നതിനായി സുരക്ഷ ഉറപ്പാക്കാൻ നിയമപരമായി തന്നെ ,സോഫ്റ്റ്​വെയറിലോ ഹാർഡ്​വെയറിലോ രഹസ്യമായി കയറി വീഴ്ചകൾ കണ്ടെത്തുകയും പരിഹരിക്കുകയും ചെയ്യുന്നവരാണ് എത്തിക്കൽ ഹാക്കർമാർ. ഇങ്ങനെ കണ്ടെത്തുന്ന സുരക്ഷാവിഴ്ചകൾ തെറ്റായ കാര്യങ്ങൾക്ക് ഉപയോഗിക്കാതെ ഉത്തരവാദിത്തപ്പെട്ടവരോട് വെളിപ്പെടുത്തലാണ് ഇവരുടെ ജോലി. പുറത്തുനിന്ന് ഏതെങ്കിലും തരത്തിലുള്ള സൈബർ ആക്രമണങ്ങൾ നേരിടുന്നതിനുള്ള ചെറു പഴുതുപോലും എത്തിക്കൽ ഹാക്കർമാർ കണ്ടെത്തും.