സ്പേസ് എക്സിന്റെ സ്റ്റാർഷിപ്പ് പേടകത്തെ വിജയകരമായി ഭൂമിയിൽ തിരിച്ചിറക്കി. 'ചോപ്സ്റ്റിക് ആംസ്' എന്നറിയപ്പെടുന്ന ഈ യന്ത്രക്കൈകൾ ഉപയോഗിച്ചായിരുന്നു പേടകത്തെ പിടിച്ചെടുത്തത്. ബഹിരാകാശത്തുനിന്ന് മടങ്ങിയെത്തിയ സ്റ്റാർഷിപ്പ് പേടകത്തെ ഇത്തരത്തിൽ ആദ്യമായാണ് ആകാശത്തുവെച്ച് പിടിച്ചെടുക്കുന്നത്. വിക്ഷേപണം കഴിഞ്ഞ് 22 മണിക്കൂറുകൾക്ക് ശേഷമാണ് പേടകം ടെക്സസിലെ സ്റ്റാർബേസ് വിക്ഷേപണ കേന്ദ്രത്തിൽ തിരിച്ചെത്തിയത്. ദൗത്യത്തിന് പിന്നിൽ പ്രവർത്തിച്ച സ്പേസ് എക്സ് ടീമിനെ കമ്പനി മേധാവി ഇലോൺ മസ്ക് അഭിനന്ദിച്ചു.

To advertise here,

സ്റ്റാർഷിപ്പിന്റെ പൂർണമായ പുനരുപയോഗക്ഷമത തെളിയിക്കുന്നതാണ് ശനിയാഴ്ചത്തെ നേട്ടമെന്ന് സ്‌പേസ് എക്‌സ് അധികൃതർ പറഞ്ഞു. കുറഞ്ഞ ചെലവിൽ അതിവേഗം റോക്കറ്റുകൾ വീണ്ടും ഉപയോഗിക്കാൻ ഈ സാങ്കേതികവിദ്യ നിർണായകമാണ്.

എന്നാൽ വെള്ളിയാഴ്ച ടെക്സസിൽനിന്നുള്ള വിക്ഷേപണത്തിന് പിന്നാലെ ആദ്യഘട്ട ബൂസ്റ്റർ പൊട്ടിത്തെറിച്ചതോടെ രണ്ട് ഘട്ടങ്ങളും വിജയകരമായി തിരിച്ചുപിടിക്കുകയെന്ന കമ്പനിയുടെ ലക്ഷ്യം പൂർത്തിയായില്ല. ബൂസ്റ്ററിന്റെ ഗൈഡൻസ് സംവിധാനം റോക്കറ്റ് ശരിയായ സ്ഥാനത്തല്ലെന്ന് തിരിച്ചറിഞ്ഞതിനെത്തുടർന്ന് സ്വയം നിയന്ത്രിതമായി കടലിലേക്ക് വഴിതിരിച്ചുവിടുകയും സ്വയം നശിപ്പിക്കുകയും ചെയ്യുകയായിരുന്നു. സംഭവത്തിൽ അന്വേഷണം തുടരുകയാണ്.

വിക്ഷേപണ ശേഷം ബൂസ്റ്ററിൽ നിന്ന് കൃത്യമായി വേർപെട്ട സ്റ്റാർഷിപ്പിന്റെ മുകൾഭാഗത്തെ പേടകം ഭ്രമണപഥത്തിൽ എത്തുകയും 26 സ്റ്റാർലിങ്ക് ഉപഗ്രഹങ്ങളെ വിജയകരമായി വിക്ഷേപിക്കുകയും ചെയ്തു.

വെള്ളിയാഴ്ചത്തെ ബൂസ്റ്റർ വീണ്ടെടുക്കൽ പരാജയപ്പെട്ടെങ്കിലും ഇതിന് മുമ്പ് മൂന്ന് തവണ ബൂസ്റ്ററുകളെ വിജയകരമായി പിടിച്ചെടുക്കാൻ സ്‌പേസ് എക്‌സിന് കഴിഞ്ഞിരുന്നു.

ഭൂമിയെ 14 തവണ ചുറ്റിയ ശേഷമാണ് സ്റ്റാർഷിപ്പ് തിരിച്ചെത്തിയത്. ഏകദേശം 265 കിലോമീറ്റർ (165 മൈൽ) ഉയരത്തിലായിരുന്നു ഇതിന്റെ ഭ്രമണപഥം. മുൻ ദൗത്യത്തിൽ ഒന്നോ രണ്ടോ തവണ മാത്രമാണ് ഭൂമിയെ ചുറ്റാൻ പേടകത്തിന് കഴിഞ്ഞിരുന്നത്.

പേടകത്തിലെ നിർണായകമായ ഹീറ്റ് ഷീൽഡ് ഉൾപ്പെടെയുള്ള സംവിധാനങ്ങളെല്ലാം മികച്ച രീതിയിൽ പ്രവർത്തിച്ചതായാണ് പ്രാഥമിക വിലയിരുത്തലെന്ന് സ്‌പേസ് എക്‌സ് അറിയിച്ചു.

2023 മുതൽ പൂർണ വലുപ്പത്തിലുള്ള സ്റ്റാർഷിപ്പ് നടത്തിയ പതിനഞ്ചാമത്തെ പരീക്ഷണ വിക്ഷേപണമാണിത്. എന്നാൽ ഭ്രമണപഥത്തിലെത്തിയ രണ്ടാമത്തെ ദൗത്യം മാത്രമാണിത്. 124 മീറ്റർ (407 അടി) ഉയരമുള്ള സ്റ്റാർഷിപ്പ് ലോകത്തിലെ ഏറ്റവും വലുതും ശക്തിയേറിയതുമായ റോക്കറ്റാണ്. ചന്ദ്രനിലേക്കും ചൊവ്വയിലേക്കുമുള്ള യാത്രകൾ ലക്ഷ്യമിട്ടാണ് ഇത് വികസിപ്പിക്കുന്നത്. അടുത്ത ഏതാനും മാസങ്ങൾക്കുള്ളിൽ ഫ്ലോറിഡയിലെ കെന്നഡി സ്പേസ് സെന്ററിൽനിന്നും സ്റ്റാർഷിപ്പ് വിക്ഷേപണങ്ങൾ ആരംഭിക്കാനാണ് സ്‌പേസ് എക്‌സിന്റെ പദ്ധതി.