2024-ല്‍ ഗൂഗിളില്‍ ഇന്ത്യക്കാര്‍ തിരഞ്ഞത് എന്തൊക്കെയാണ്? 2024 അവസാനിക്കാനിരിക്കെ ഈ വര്‍ഷത്തെ ടോപ് ട്രെന്‍ഡിങ് സെര്‍ച്ച് ടേമുകള്‍ ഏതൊക്കെയാണന്ന വിവരങ്ങള്‍ പുറത്തുവിട്ടിരിക്കുകയാണ് ഗൂഗിള്‍. ഐ.പി.എല്ലാണ് ഇന്ത്യക്കാര്‍ ഈ വര്‍ഷം ഏറ്റവും കൂടുതല്‍ തിരഞ്ഞതെന്നാണ് ഗൂഗിള്‍ പറയുന്നത്. ഇന്ത്യക്കാരുടെ ക്രിക്കറ്റ് അഭിനിവേശം വ്യക്തമാക്കുന്നതാണിത്.
ഓവറോള്‍ സെര്‍ച്ചില്‍ 'ഇന്ത്യന്‍ പ്രീമിയര്‍ ലീഗ്' ആണ് ഒന്നാമതുള്ളത്. ഐ.പി.എല്ലിന് തൊട്ടുപിന്നാലെ 'ട്വന്റി20 വേള്‍ഡ് കപ്പ്', 'ഭാരതീയ ജനതാ പാര്‍ട്ടി', '2024 ഇലക്ഷന്‍ റിസള്‍ട്ട്‌സ്', '2024 ഒളിമ്പിക്‌സ്' എന്നിവയെക്കുറിച്ചെല്ലാമാണ് ഇന്ത്യയില്‍നിന്ന് ഏറ്റവും കൂടുതല്‍ തിരഞ്ഞത്.
സിനിമകളില്‍ ഏറ്റവും കൂടുതല്‍ പേര്‍ തിരഞ്ഞത് രാജ്കുമാര്‍ റാവുവും ശ്രദ്ധാകപൂറും അഭിനയിച്ച 'സ്ത്രീ 2' എന്ന സിനിമയെക്കുറിച്ചാണ്. 'കല്‍ക്കി 2898 എ.ഡി', '12th ഫെയില്‍', 'ലാപതാ ലേഡീസ്' എന്നിവയാണ് സിനിമകളിലെ പട്ടികയില്‍ തൊട്ടുപിറകിലുള്ളത്.
ഗൂഗിളിന്റെ 'ഹം ടു സെര്‍ച്ച്' ഫീച്ചര്‍ ഉപയോഗിച്ച് ഏറ്റവും കൂടുതല്‍ പേര്‍ തിരഞ്ഞ പാട്ട് 'നാദാനിയാന്‍' ആണ്. മലയാളസിനിമയായ ആവേശത്തിലെ 'ഇല്ലൂമിനാറ്റി'യാണ് പാട്ടുകളുടെ പട്ടികയില്‍ മൂന്നാമതുള്ളത്.
2024-ല്‍ ഇന്ത്യയില്‍നിന്ന് ഏറ്റവും കൂടുതല്‍പേര്‍ തിരഞ്ഞ വ്യക്തി ഗുസ്തി താരം വിനേഷ് ഫോഗട്ട് ആണ്. രാഷ്ട്രീയനേതാക്കളായ നിതീഷ് കുമാര്‍, ചിരാഗ് പാസ്വാന്‍, ക്രിക്കറ്റ് താരം ഹര്‍ദിക്ക് പാണ്ഡ്യ, പവന്‍ കല്യാണ്‍ എന്നിവരാണ് ഈ പട്ടികയില്‍ വിനേഷ് ഫോഗട്ടിന് പിന്നിലുള്ളവര്‍.
'Meaning' സെര്‍ച്ചില്‍ 'All Eys on Rafah' എന്നതിന്റെ അര്‍ഥമാണ് ഏറ്റവും കൂടുതല്‍പേര്‍ തിരഞ്ഞത്. 'അകായ്', 'സെര്‍വിക്കല്‍ കാന്‍സര്‍' എന്നീ വാക്കുകളാണ് ഇതില്‍ തൊട്ടുപിന്നിലുള്ളത്.
'Near me' സെര്‍ച്ചില്‍ വായു ഗുണനിലവാര സൂചികയെക്കുറിച്ചായിരുന്നു ഏറ്റവും കൂടുതല്‍ തിരച്ചിലുണ്ടായത്. 'AQI Near me' എന്നതായിരുന്നു ഈ വിഭാഗത്തിലെ ഒന്നാമതെത്തിയ സെര്‍ച്ച് ടേം. തൊട്ടുപിന്നില്‍ മലയാളികളുടെ ഓണസദ്യയുമുണ്ട്. തൊട്ടടുത്ത് ലഭിക്കുന്ന ഓണസദ്യയെക്കുറിച്ചാണ് പലരും ഗൂഗിളില്‍ തിരഞ്ഞത്.
ഈവര്‍ഷം ഇന്ത്യക്കാര്‍ ഏറ്റവും കൂടുതല്‍ തിരഞ്ഞ 'റെസിപി' ഒരു കോക്ടെയിലിനെക്കുറിച്ചായിരുന്നു. 'പോണ്‍ സ്റ്റാര്‍ മാര്‍ട്ടിനി' എന്ന കോക്ടെയിലിന്റെ റെസിപിയാണ് ഇന്ത്യയില്‍നിന്ന് ഏറ്റവും കൂടുതല്‍പേര്‍ 2024-ല്‍ തിരഞ്ഞത്. മാങ്ങ അച്ചാറാണ് ഈ പട്ടികയില്‍ രണ്ടാമതുള്ളതെന്നതും ശ്രദ്ധേയമാണ്.
Content Highlights: google year in search india 2024 results
Published: 10 Dec 2024, 09:01 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented