ന്യൂയോർക്ക്: ടെന്നീസ് ചരിത്രത്തിലെ ഏറ്റവും ഉയർന്ന സമ്മാനത്തുക പ്രഖ്യാപിച്ച് യുഎസ് ഓപ്പൺ. ഇത്തവണ കളിക്കാർക്കായി ആകെ 10.8 കോടി യുഎസ് ഡോളർ (ഏകദേശം 1,030 കോടി ഇന്ത്യൻ രൂപ) ആണ് യുഎസ് ഓപ്പൺ ടെന്നീസ് ടൂർണമെന്റിൽ സമ്മാനത്തുകയായി മാറ്റിവെച്ചിരിക്കുന്നത്. 2025-ൽ നൽകിയ ഒമ്പത് കോടി ഡോളറിനേക്കാൾ (ഏകദേശം 858.8 കോടി രൂപ) 20 ശതമാനം വർധനവാണ് ഇത്തവണ രേഖപ്പെടുത്തിയിരിക്കുന്നത്. തുടർച്ചയായ രണ്ടാം വർഷമാണ് സമ്മാനത്തുകയിൽ 20 ശതമാനം വർധനവുണ്ടാകുന്നത്. ഇതോടെ കഴിഞ്ഞ രണ്ട് വർഷത്തിനിടെ സമ്മാനത്തുകയിൽ ആകെ 44 ശതമാനത്തിന്റെ വർധനവാണുണ്ടായത്.

To advertise here,

സിംഗിൾസ് ജേതാക്കൾക്ക് റെക്കോർഡ് തുക

പുരുഷ-വനിതാ സിംഗിൾസ് വിഭാഗങ്ങളിലെ ചാമ്പ്യന്മാർക്ക് ചരിത്രത്തിലെ ഏറ്റവും ഉയർന്ന സമ്മാനത്തുകയാണ് ഇത്തവണ ലഭിക്കുക. വിജയികളാകുന്നവർക്ക് 55 ലക്ഷം യുഎസ് ഡോളർ വീതം (ഏകദേശം 52.48 കോടി രൂപ) ലഭിക്കും. റണ്ണേഴ്‌സ് അപ്പിന് 28 ലക്ഷം യുഎസ് ഡോളർ (ഏകദേശം 26.73 കോടി രൂപ) ലഭിക്കുമ്പോൾ, ആദ്യ റൗണ്ടിൽ പുറത്താകുന്ന കളിക്കാർക്ക് പോലും 1.4 ലക്ഷം യുഎസ് ഡോളർ (ഏകദേശം 1.34 കോടി രൂപ) സമ്മാനമായി ലഭിക്കും. ഇത് കഴിഞ്ഞ വർഷത്തെ അപേക്ഷിച്ച് 27.27 ശതമാനം കൂടുതലാണ്.

പ്രധാന ഡ്രോയിലേക്ക് യോഗ്യത നേടാനുള്ള ക്വാളിഫയിങ് റൗണ്ടുകളിൽ മത്സരിക്കുന്നവർക്കും സമ്മാനത്തുക വർധിപ്പിച്ചിട്ടുണ്ട്. ആദ്യ ക്വാളിഫയിങ് റൗണ്ടിൽ പുറത്താകുന്നവർക്ക് 32,000 യുഎസ് ഡോളറും (ഏകദേശം 30.60 ലക്ഷം രൂപ), ഫൈനൽ ക്വാളിഫയിങ് റൗണ്ടിൽ പുറത്താകുന്നവർക്ക് 66,000 യുഎസ് ഡോളറും (ഏകദേശം 63 ലക്ഷം രൂപ) ലഭിക്കും.

ഡബിൾസ് സമ്മാനത്തുക

പുരുഷ-വനിതാ ഡബിൾസ് കിരീടം നേടുന്ന ടീമുകൾക്ക് 10 ലക്ഷം യുഎസ് ഡോളർ (ഏകദേശം 9.53 കോടി രൂപ) വീതം പങ്കിട്ടു നൽകും. മിക്‌സഡ് ഡബിൾസ് ചാമ്പ്യന്മാർക്കും 10 ലക്ഷം യുഎസ് ഡോളർ (ഏകദേശം 9.53 കോടി രൂപ) തന്നെയാണ് സമ്മാനത്തുകയായി പ്രഖ്യാപിച്ചിരിക്കുന്നത്.

(ശ്രദ്ധിക്കുക: യുഎസ് ഡോളറിൽ നിന്നുള്ള രൂപയുടെ മൂല്യം 1 യുഎസ് ഡോളർ എന്നത് 95.46 ഇന്ത്യൻ രൂപ എന്ന ഏകദേശ നിരക്കിലാണ് ഇവിടെ കണക്കാക്കിയിരിക്കുന്നത്).