ഹല്‍ദ്വാനി: ദേശീയ ഗെയിംസില്‍ കേരളത്തിന് വീണ്ടും മെഡല്‍നേട്ടം. സൈക്ലിങ്ങില്‍ അദ്വൈത് ശങ്കറും പുരുഷന്മാരുടെ നീന്തലില്‍ സജന്‍ പ്രകാശും വെള്ളി നേടി. 15 കിലോമീറ്റര്‍ സ്‌ക്രാച്ച് റേസിലാണ് അദ്വൈത് രണ്ടാമതെത്തിയത്. 200 മീറ്റര്‍ വ്യക്തിഗത മെഡ്ലെയിലായിരുന്നു സജന്റെ വെള്ളി. രണ്ടു മിനിറ്റ് 8.17 സെക്കന്റില്‍ മലയാളി താരം മത്സരം പൂര്‍ത്തിയാക്കി. കര്‍ണാടകയുടെ ഷോണ്‍ സുരജിത് ഗാംഗുലി സ്വര്‍ണവും ഗുജറാത്തിന്റെ ആര്യന്‍ നെഹ്‌റ വെങ്കലവും നേടി.
നീന്തലില്‍ ഈ ഗെയിംസില്‍ തന്റെ നാലാം മെഡല്‍ നേട്ടമാണ് സജന്‍ ആഘോഷിച്ചത്. നേരത്തെ 200 മീറ്റര്‍ ബട്ടര്‍ഫ്‌ളൈയില്‍ സ്വര്‍ണവും 100 മീറ്റര്‍ ബട്ടര്‍ഫ്‌ളൈ, 200 മീറ്റര്‍ ഫ്രീസ്റ്റെല്‍ എന്നീ വിഭാഗങ്ങളില്‍ വെങ്കലവും നേടിയിരുന്നു. ഇതോടെ നാല് ഗെയിമുകളില്‍നിന്നായി സജന്റെ ആകെ മെഡല്‍നേട്ടം മുപ്പതായി.
അതേസമയം, പുരുഷന്മാരുടെ ഫുട്‌ബോളില്‍ കേരളം സെമി ഫൈനലിലെത്തി. അവസാന ഗ്രൂപ്പ് മത്സരത്തില്‍ നിലവിലെ ജേതാക്കളായ സര്‍വീസസിനെ തോല്‍പ്പിച്ചാണ് കേരളം സെമിയിലെത്തിയത്. എതിരില്ലാത്ത മൂന്ന് ഗോളിനായിരുന്നു കേരളത്തിന്റെ വിജയം. ഇതോടെ ഗ്രൂപ്പ് ബിയില്‍ ആറു പോയിന്റുമായി കേരളം രണ്ടാമതെത്തി. ഡല്‍ഹിയാണ് ഗ്രൂപ്പ് ചാമ്പ്യന്‍മാര്‍.
ആദ്യ മത്സരത്തില്‍ മണിപ്പൂരിനെ തോല്‍പ്പിച്ച കേരളം രണ്ടാം മത്സരത്തില്‍ ഡല്‍ഹിയോട് തോറ്റിരുന്നു. ഇതോടെ സര്‍വീസസിനെതിരായ മത്സരത്തില്‍ കേരളത്തിന് ജയം അനിവാര്യമായി. കേരളത്തിനായി മധ്യനിര താരം ആദില്‍ ഇരട്ട ഗോള്‍ നേടി. ബേബിള്‍ സിവേരിയുടെ വകയായിരുന്നു മൂന്നാം ഗോള്‍.
Content Highlights: national games update
Published: 03 Feb 2025, 06:03 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented