ബുഡാപെസ്റ്റ്: ടോട്ടൽ ചെസ് വേൾഡ് ചാമ്പ്യൻഷിപ്പ് ടൂർ പൈലറ്റ് ടൂർണമെന്റിൽ പുതിയ വിവാദത്തിന് തിരികൊളുത്തി ലോക ഒന്നാം നമ്പർ താരം മാഗ്നസ് കാൾസൺ. ചൊവ്വാഴ്ച കസാക്കിസ്ഥാന്റെ ബിബിസാര അസൗബയേവയ്ക്കെതിരായ ഫാസ്റ്റ് ക്ലാസിക് ഗെയിം കളിക്കാതെ കാൾസൺ പിന്മാറിയതാണ് വിവാദമായത്.
ബ്ലിറ്റ്സ്, റാപ്പിഡ് മത്സരങ്ങളിലൂടെ അന്നത്തെ ദിവസത്തെ വിജയം ഉറപ്പിച്ചതിന് പിന്നാലെയാണ് കാൾസൺ ഫാസ്റ്റ് ക്ലാസിക് മത്സരത്തിൽ നിന്ന് വിട്ടുനിൽക്കാൻ തീരുമാനിച്ചത്. കളിക്കാതെ ഉപേക്ഷിക്കുന്ന മത്സരങ്ങൾ റേറ്റിങ് കണക്കുകൂട്ടലിൽ ഉൾപ്പെടുത്താത്തതിനാൽ, ഈ പിന്മാറ്റം കാൾസന്റെ ക്ലാസിക്കൽ റേറ്റിങ്ങിനെ ബാധിച്ചില്ല.
ആദ്യ മൂന്ന് ബ്ലിറ്റ്സ് ഗെയിമുകളും വിജയിക്കുകയും നാലാമത്തേത് സമനിലയിലാക്കുകയും ചെയ്ത കാൾസൺ, രണ്ട് റാപ്പിഡ് ഗെയിമുകളിലും വിജയം നേടിയിരുന്നു. ഇതോടെ കാൾസൺ 11.5-0.5 എന്ന നിലയിൽ വ്യക്തമായ ലീഡ് സ്വന്തമാക്കി. ഫാസ്റ്റ് ക്ലാസിക് ഗെയിമിൽ ആകെ എട്ട് പോയിന്റുകൾ മാത്രമാണ് അവശേഷിച്ചിരുന്നത് എന്നതിനാൽ, അസൗബയേവയ്ക്ക് അന്നത്തെ മത്സരത്തിൽ വിജയിക്കാനുള്ള സാധ്യത അസ്തമിച്ചിരുന്നു.
കാൾസൺ പിന്മാറിയതോടെ ഫാസ്റ്റ് ക്ലാസിക് മത്സരത്തിൽ അസൗബയേവയെ വിജയിയായി പ്രഖ്യാപിച്ചു. എങ്കിലും 11.5-8.5 എന്ന സ്കോറിന് കാൾസൺ അന്നത്തെ മത്സരം സ്വന്തമാക്കി.
വെള്ള കരുക്കളുമായി കളിക്കേണ്ടിയിരുന്ന കാൾസൺ, നോർവീജിയൻ ബ്രോഡ്കാസ്റ്ററായ ടി.വി 2-നോടാണ് തന്റെ തീരുമാനത്തിന് പിന്നിലെ കാരണം വിശദീകരിച്ചത്. മത്സരഫലത്തിൽ യാതൊരു മാറ്റവും വരുത്താൻ കഴിയാത്ത ഒരു കളി കളിക്കുന്നതിൽ അർഥമില്ലെന്ന് അദ്ദേഹം പറഞ്ഞു: 'ഞാൻ മനസ്സിലാക്കിയതനുസരിച്ച് മത്സരം അവസാനിച്ചുകഴിഞ്ഞു, ഇനി ക്ലാസിക്കൽ ഗെയിം ഉണ്ടാകില്ല. കളിക്കാൻ എത്താതിരുന്നാലുള്ള ഏക പ്രത്യാഘാതം തികച്ചും ഉപയോഗശൂന്യമായ ഒരു ഗെയിം നഷ്ടപ്പെടും എന്നതാണ്. ഒരു ലോക ചാമ്പ്യൻഷിപ്പിൽ പോയിന്റുകൾക്കും മറ്റും വേണ്ടിയാണ് കളിക്കുന്നതെങ്കിൽ എനിക്കത് മനസ്സിലാക്കാൻ സാധിക്കും. എന്നാൽ, മത്സരഫലം തീരുമാനിക്കപ്പെട്ടശേഷം കളിക്കുന്ന ഗെയിമുകൾ റേറ്റിങ്ങിനായി പരിഗണിക്കരുത്. എപ്പോഴും അങ്ങനെയാണ് ഉണ്ടായിട്ടുള്ളത്. ഇവിടെ അവർ കാര്യങ്ങൾ വ്യത്യസ്തമായി ചെയ്യാനാണ് ആഗ്രഹിക്കുന്നതെങ്കിൽ, ഈ വിഷയത്തിൽ ഇതാണ് എന്റെ തീരുമാനം,' കാൾസൺ വ്യക്തമാക്കി.
ബുഡാപെസ്റ്റ് ടൂർണമെന്റിലെ ഫാസ്റ്റ് ക്ലാസിക് ഫോർമാറ്റിൽ നേരിട്ട മോശം പ്രകടനത്തിന് പിന്നാലെയാണ് 35 കാരനായ കാൾസന്റെ ഈ തീരുമാനം. അഞ്ച് ദിവസം നീണ്ടുനിന്ന ഗ്രൂപ്പ് ഘട്ടത്തിൽ കളിച്ച 10 ഗെയിമുകളിൽ ഒന്നിൽ പോലും വിജയിക്കാൻ അദ്ദേഹത്തിന് സാധിച്ചിരുന്നില്ല. ഒൻപത് ഗെയിമുകൾ സമനിലയിൽ പിരിഞ്ഞപ്പോൾ, അർമേനിയയുടെ ഹെയ്ക് മാർട്ടിറോസ്യാനെതിരെ പരാജയപ്പെടുകയും ചെയ്തു.
ഈ മോശം പ്രകടനം കാൾസന്റെ 21.8 എലോ പോയിന്റുകൾ നഷ്ടപ്പെടുത്തുകയും, ലൈവ് ക്ലാസിക്കൽ റേറ്റിങ് 2801.2-ലേക്ക് താഴുകയും ചെയ്തു. ഗ്രൂപ്പ് സി-യിൽ അഞ്ചാം സ്ഥാനത്തായ അദ്ദേഹം 2800 റേറ്റിംഗ് പോയിന്റുകൾക്ക് താഴേക്ക് വീഴുന്നതിന്റെ വക്കിലെത്തിയിരുന്നു. ഗ്രൂപ്പ് ഘട്ടത്തിനിടെ അമേരിക്കൻ ഗ്രാൻഡ്മാസ്റ്റർ ഫാബിയാനോ കരുവാന ക്ലാസിക്കൽ റേറ്റിംഗിൽ കാൾസനെ മറികടന്ന് ലോക ഒന്നാം നമ്പർ സ്ഥാനത്തെത്തുന്നതിന് തൊട്ടരികിലെത്തുകയും ചെയ്തിരുന്നു.
അസൗബയേവയ്ക്കെതിരായ മത്സരത്തിൽ നിന്ന് പിന്മാറിയതോടെ മറ്റൊരു റേറ്റിങ് നഷ്ടം കൂടി ഒഴിവാക്കാൻ കാൾസന് സാധിച്ചു. മത്സരം സമനിലയിലായിരുന്നെങ്കിൽ 3.5 റേറ്റിങ് പോയിന്റുകളും, പരാജയപ്പെട്ടിരുന്നെങ്കിൽ 8.5 പോയിന്റുകളും അദ്ദേഹത്തിന് നഷ്ടമാകുമായിരുന്നു. എന്നാൽ, അന്നത്തെ ദിവസത്തെ വിജയിയെ തീരുമാനിച്ചതിനുശേഷം ക്ലാസിക്കൽ റേറ്റിങ്ങിന് പരിഗണിക്കാത്ത ഒരു ഗെയിം കളിക്കുന്നതിലുള്ള എതിർപ്പ് കൊണ്ടാണ് താൻ പിന്മാറിയതെന്നാണ് കാൾസന്റെ വിശദീകരണം.
ഫിഡെയുടെ റേറ്റിംഗ് ചട്ടങ്ങൾ പ്രകാരം, കളിക്കാതെ ഉപേക്ഷിക്കുന്ന മത്സരങ്ങൾ റേറ്റിംഗ് കണക്കുകൂട്ടലിൽ ഉൾപ്പെടുത്തില്ല. അതിനാൽ, അസൗബയേവയ്ക്ക് ടൂർണമെന്റ് പോയിന്റുകൾ ലഭിച്ചെങ്കിലും ഇരു താരങ്ങളുടെയും ക്ലാസിക്കൽ റേറ്റിംഗിനെ ഇത് ബാധിച്ചില്ല.
ക്ലാസിക്കൽ ചെസ്സിന്റെ വേഗതയേറിയ ഒരു രൂപമാണ് ഫാസ്റ്റ് ക്ലാസിക്. ഇതിൽ താരങ്ങൾക്ക് 45 മിനിറ്റ് സമയമാണ് തുടക്കത്തിൽ ലഭിക്കുക; ഓരോ നീക്കത്തിന് ശേഷവും 30 സെക്കൻഡ് വീതം അധികമായി ലഭിക്കും. ബുഡാപെസ്റ്റിലെ ടോട്ടൽ ചെസ് വേൾഡ് ചാമ്പ്യൻഷിപ്പ് ടൂർ പൈലറ്റിന്റെ ഭാഗമായാണ് ഈ ഫോർമാറ്റ് അവതരിപ്പിച്ചത്. സാധാരണ ക്ലാസിക്കൽ ചെസ്സിൽ നിന്ന് വ്യത്യസ്തമായി കുറഞ്ഞ സമയപരിധി മത്സരങ്ങളെ കൂടുതൽ വേഗത്തിലാക്കുന്നുണ്ടെങ്കിലും, സമ്മർദഘട്ടങ്ങളിൽ സമയം കൃത്യമായി വിനിയോഗിച്ച് തീരുമാനങ്ങളെടുക്കാൻ താരങ്ങൾ നിർബന്ധിതരാകുന്നു.
Content Highlights: Magnus Carlsen withdrew from the Fast Classic game against Bibisara Assaubayeva in Budapest., Carlsen had already secured the day's win through blitz and rapid matches with an 11.5-0.5 lead., He termed the remaining game 'useless' as the overall match result was already decided., The withdrawal protected his classical rating from further potential point losses.
Published: 18 Nov 2026, 02:57 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented