ജക്കാര്‍ത്ത: ഏഷ്യാകപ്പ് ഹോക്കിയില്‍ നിലവിലെ ചാമ്പ്യന്‍മാരായ ഇന്ത്യക്ക് വന്‍തോല്‍വി. ഏഷ്യന്‍ ഗെയിംസ് ചാമ്പ്യന്മാരായ ജപ്പാനാണ് രണ്ടാം മത്സരത്തില്‍ ഇന്ത്യയെ കീഴ്‌പ്പെടുത്തിയത്‌.

To advertise here,

രണ്ടിനെതിരേ അഞ്ചുഗോളുകള്‍ക്കാണ് ഇന്ത്യയുടെ തോല്‍വി. ആദ്യമത്സരത്തില്‍ പാകിസ്താനോട് സമനില വഴങ്ങിയ ഇന്ത്യയുടെ നോക്കൗട്ട് സാധ്യതയും ഇതോടെ മങ്ങി. 

ജപ്പാന് വേണ്ടി കൊസെയ് കവാബെ രണ്ട് ഗോളടിച്ചപ്പോള്‍ കെന്‍ നാഗയോഷിയും റ്യോമ ഊക്കയും കോജി യമസകിയും ലക്ഷ്യം കണ്ടു. പവന്‍ രാജ്ഭര്‍, ഉത്തംസിങ് എന്നിവരാണ് ഇന്ത്യയുടെ ഗോളുകള്‍ നേടിയത്. പ്രമുഖ താരങ്ങളുടെ അഭാവം ഇന്ത്യയ്ക്ക് തിരിച്ചടിയായി.

പൂള്‍ എയില്‍ ഇന്ത്യ ഇപ്പോള്‍ മൂന്നാം സ്ഥാനത്താണ്. വ്യാഴാഴ്ചത്തെ ജപ്പാന്‍ - പാകിസ്താന്‍ മത്സരഫലത്തെ ആശ്രയിച്ചിരിക്കുന്നു ഇന്ത്യയുടെ മുന്നോട്ടുപോക്ക്. അന്ന് ഇന്ത്യ ഇന്‍ഡൊനീഷ്യയെയും നേരിടും.

മറ്റൊരു മത്സരത്തില്‍ പാകിസ്താന്‍ എതിരില്ലാത്ത 13 ഗോളുകള്‍ക്ക് ആതിഥേയരായ ഇന്‍ഡൊനീഷ്യയെ നാണംകെടുത്തി.