ബാക്കു: അസർബൈജാൻ ഗ്രാൻഡ് പ്രീയിൽ മെഴ്സിഡസിന്റെ ജോർജ് റസ്സൽ ജേതാവ്. റെഡ് ബുള്ളിന്റെ മാക്‌സ് വെസ്റ്റാപ്പൻ രണ്ടാമതെത്തിയപ്പോൾ റെഡ് ബുള്ളിന്റെ തന്നെ ഐസാക് ഹാജർ മൂന്നാം സ്ഥാനവും സ്വന്തമാക്കി. നേരത്തേ പോൾ പൊസിഷൻ സ്വന്തമാക്കിയിരുന്ന ജോർജ് റസ്സൽ എതിരാളികളെ മുന്നേറാൻ അനുവദിക്കാതെയാണ് ആദ്യസ്ഥാനത്തേക്ക് കുതിച്ചത്.

To advertise here,

സീസണിലെ ജോർജ് റസ്സലിന്റെ മൂന്നാം ഗ്രാൻഡ് പ്രീ വിജയമാണിത്. നേരത്തേ ഓസ്ട്രേലിയൻ ഗ്രാൻഡ് പ്രീയിലും ഓസ്ട്രിയൻ ഗ്രാൻഡ് പ്രീയിലും മെഴ്സിഡസ് ഡ്രൈവർ വിജയിച്ചിരുന്നു. ഇക്കുറി പോൾ പൊസിഷൻ നേടാനായതാണ് താരത്തിന് അനുകൂലമായത്. യോഗ്യതാ മത്സരത്തിൽ മിന്നുന്ന പ്രകടനത്തോടെയാണ് ജോർജ് റസ്സൽ പോൾ പൊസിഷൻ സ്വന്തമാക്കിയിരുന്നത്. ജൂണിൽ നടന്ന ഓസ്ട്രിയൻ ഗ്രാൻഡ് പ്രീക്ക് ശേഷമുള്ള റസ്സലിന്റെ ആദ്യ പോൾ പൊസിഷനായിരുന്നു അസർബൈജാൻ ഗ്രാൻഡ് പ്രീയിലേത്. അതും വിജയത്തോടെ അവസാനിപ്പിക്കാനായത് റസ്സലിന് നേട്ടമായി.

ഫെരാരിയുടെ ചാർലിസ് ലെക്ലർക്ക് നാലാമതും മെഴ്സിഡസിന്റെ കിമി ആന്റണല്ലി അഞ്ചാമതും ഫിനിഷ് ചെയ്തു. ലൂയിസ് ഹാമിൽട്ടൺ ആറാമതാണ് ഫിനിഷ് ചെയ്തത്. റസ്സലിന്റെ ടീമംഗമായ കിമിക്ക് യോഗ്യതാ ഘട്ടത്തിൽ അപകടത്തെത്തുടർന്ന് സെഷൻ പൂർത്തിയാക്കാൻ സാധിക്കാതെ വരുകയും യോഗ്യതാ പോരാട്ടത്തിൽ ആന്റൊനെല്ലി 16-ാം സ്ഥാനത്തേക്ക് പിന്തള്ളപ്പെടുകയും ചെയ്തിരുന്നു.

ഫോർമുല വൺ കിരീടപ്പോരിൽ നിലവിൽ കിമി ആന്റണല്ലിയാണ് മുന്നിൽ. 302 പോയന്റാണ് കിമിക്കുള്ളത്. ജോർജ് റസ്സൽ രണ്ടാമതും ലൂയിസ് ഹാമിൽട്ടൺ മൂന്നാമതുമാണ്. റസ്സലിന് 236 പോയന്റും ഹാമിൽട്ടണ് 199 പോയന്റുമാണുള്ളത്. ലാൻഡോ നോറിസാണ് നാലാമത്.