ജക്കാര്‍ത്ത: വമ്പന്‍ ജയം ആവശ്യമായിരുന്ന മത്സരത്തില്‍ താരങ്ങള്‍ അവസരത്തിനൊത്തുയര്‍ന്നപ്പോള്‍ ഇന്‍ഡൊനീഷ്യയെ എതിരില്ലാത്ത 16 ഗോളുകള്‍ക്ക് തകര്‍ത്ത് ഇന്ത്യന്‍ ഹോക്കി ടീം ഏഷ്യാ കപ്പ് ഹോക്കി ടൂര്‍ണമെന്റിന്റെ സൂപ്പര്‍ ഫോറില്‍. നോക്കൗട്ടിലേക്ക് മുന്നേറാന്‍ 15 ഗോള്‍ വ്യത്യാസത്തില്‍ ജയിക്കേണ്ടിയിരുന്ന ഇന്ത്യ തകര്‍പ്പന്‍ പ്രകടനമാണ് പുറത്തെടുത്തത്. ഇന്ത്യയുടെ ജയത്തോടെ പാകിസ്താന്‍ നോക്കൗട്ടിലെത്താതെ പുറത്തായി. 

To advertise here,

പൂള്‍ എയില്‍ ഇന്ത്യയും പാകിസ്താനും നാലു പോയന്റ് വീതം നേടി ജപ്പാനു പിന്നിലായിരുന്നു. ഇതോടെ സൂപ്പര്‍ ഫോറിലേക്ക് മുന്നേറാന്‍ ഗോള്‍ വ്യത്യാസം അടിസ്ഥാനമാക്കേണ്ടി വന്നു. ഇതോടെയാണ് 16 ഗോള്‍ വ്യത്യാസത്തില്‍ ജയിച്ച് ഇന്ത്യ നോക്കൗട്ട് ഉറപ്പാക്കിയത്. ജപ്പാന്‍, മലേഷ്യ, ദക്ഷിണ കൊറിയ എന്നിവരാണ് സൂപ്പര്‍ ഫോറില്‍ കടന്ന മറ്റ് ടീമുകള്‍.

ദിപ്‌സന്‍ ടിര്‍ക്കി അഞ്ചു ഗോളുകള്‍ നേടിയ മത്സരത്തില്‍ സുദേവ് ബെലിമാഗ്ഗ മൂന്ന് തവണ സ്‌കോര്‍ ചെയ്തു. എസ്.വി സുനില്‍, പവന്‍ രജ്ഭാര്‍, കാര്‍ത്തി സെല്‍വം, ഉദ്ധം സിങ്, നിലം സന്‍ജീപ് എന്നിവരാണ് മറ്റ് സ്‌കോറര്‍മാര്‍.