മാഡ്രിഡ്: വിയ്യാറയലിനെതിരെയുള്ള മത്സരത്തിനിടെ എതിർതാരത്തിന്റെ മുടിയിൽ പിടിച്ചുവലിച്ചതിനും റഫറിയോട് രോഷാകുലനായി സംസാരിച്ചതിനും റയൽ മാഡ്രിഡ് താരം വിനീഷ്യസ് ജൂനിയറിന് നാല് ലീഗ് മത്സരങ്ങളിൽ വിലക്ക്. സ്പാനിഷ് സോക്കർ ഫെഡറേഷന്റെ അച്ചടക്ക സമിതിയാണ് താരത്തിനുള്ള ശിക്ഷ പ്രഖ്യാപിച്ചത്.

To advertise here,

എതിർതാരത്തിന്റെ മുടിയിൽ പിടിച്ചുവലിച്ചതിന് രണ്ട് മത്സരങ്ങളിലെ വിലക്കും, തുടർന്ന് റഫറിയോട് നടത്തിയ കടുത്ത പ്രതിഷേധത്തിന് രണ്ട് മത്സരങ്ങളിലെ വിലക്കുമാണ് താരത്തിന് ലഭിച്ചത്. ഈ വിലക്ക് കാരണം ബാഴ്‌സലോണയ്ക്കെതിരായ നിർണായകമായ 'എൽ ക്ലാസിക്കോ' മത്സരവും വിനീഷ്യസിന് നഷ്ടമാകും.

വിയ്യാറയലിനെതിരേ 1-0 ന് റയൽ മാഡ്രിഡ് വിജയിച്ച മത്സരത്തിന്റെ 73-ാം മിനിറ്റിലാണ് സംഭവം. പന്തുമായി മുന്നേറുന്നതിനിടെ വിയ്യാറയൽ താരം നഥാൻ സാലിബയുടെ മുടിയിൽ ശക്തമായി പിടിച്ചുവലിച്ചതിനാണ് വിനീഷ്യസിന് നേരിട്ട് റെഡ് കാർഡ് ലഭിച്ചത്. ഇതിന് തൊട്ടുപിന്നാലെ വിനീഷ്യസ് ഗോൾ നേടിയെങ്കിലും റഫറി ആ ഗോൾ അനുവദിച്ചില്ല. റെഡ് കാർഡ് കണ്ടതിന് ശേഷം റഫറി ഇസിഡ്രോ ഡയസ് ഡി മേറയോട് വിനീഷ്യസ് രോഷാകുലനായി സംസാരിച്ചു. സഹതാരങ്ങൾ തടഞ്ഞുനിർത്താൻ ശ്രമിക്കവെയാണ് വിനീഷ്യസ് റഫറിയോട് ഉച്ചത്തിൽ സംസാരിച്ചതെന്ന് മത്സര റിപ്പോർട്ടിൽ വ്യക്തമാക്കിയിട്ടുണ്ട്.

വിമർശനവുമായി മൗറീന്യോ

ബുധനാഴ്ച റോമയ്ക്കെതിരായ റയൽ മാഡ്രിഡിന്റെ ചാമ്പ്യൻസ് ലീഗ് പോരാട്ടത്തിന് തൊട്ടുമുമ്പാണ് വിലക്ക് സംബന്ധിച്ച പ്രഖ്യാപനമുണ്ടായത്. മത്സരത്തിനായി സ്റ്റേഡിയത്തിലേക്ക് പോകുകയായിരുന്ന ബസിലിരിക്കുമ്പോഴാണ് കിക്കോഫിന് രണ്ട് മണിക്കൂർ മാത്രം ബാക്കിനിൽക്കെ വിലക്കിന്റെ വിവരം അറിയുന്നതെന്ന് പരിശീലകൻ ഹോസെ മൗറീന്യോ പറഞ്ഞു. ഇത്തരം തീരുമാനങ്ങൾ പ്രഖ്യാപിച്ച സമയത്തെ കടുപ്പത്തിൽ വിമർശിച്ച മൗറീഞ്ഞോ, യാതൊരു നാണവുമില്ലാതെയാണ് അധികൃതർ കാര്യങ്ങൾ ചെയ്യുന്നതെന്നും ആരോപിച്ചു. റോമയ്ക്കെതിരെ രണ്ട് ഗോളുകൾക്ക് പിന്നിൽ നിന്ന ശേഷം 4-3 നാണ് റയൽ മാഡ്രിഡ് വിജയിച്ചത്.

ഈ വിലക്കിനെതിരേ റയൽ മാഡ്രിഡ് അപ്പീൽ നൽകും. എന്നാൽ ടീം നൽകിയ പ്രാഥമിക അപ്പീൽ തള്ളിയതായി സ്പാനിഷ് മാധ്യമങ്ങൾ റിപ്പോർട്ട് ചെയ്തു. വിലക്ക് നിലനിൽക്കുകയാണെങ്കിൽ, സെവിയ്യയ്ക്കെതിരായ ഹോം മത്സരവും ബാഴ്‌സലോണയ്ക്കെതിരായ എൽ ക്ലാസിക്കോ പോരാട്ടവും വിനീഷ്യസിന് നഷ്ടമാകും. കൂടാതെ റേസിംഗ് സന്റാണ്ടർ, വലൻസിയ എന്നിവർക്കെതിരായ എവേ മത്സരങ്ങളിലും താരത്തിന് കളിക്കാനാകില്ല.