ലണ്ടന്‍: ഇംഗ്ലീഷ് ഫുട്‌ബോള്‍ ക്ലബ്ബ് ആസ്റ്റണ്‍ വില്ലയുടെ പരിശീലക സ്ഥാനത്തുനിന്ന് സ്റ്റീവന്‍ ജെറാര്‍ഡിനെ പുറത്താക്കി. ഇംഗ്ലണ്ടിന്റെ എക്കാലത്തെയും മികച്ച ഫുട്‌ബോള്‍ താരങ്ങളിലൊരാളായ ജെറാര്‍ഡിന് പരിശീലകനായി മികവ് പുറത്തെടുക്കാനായില്ല. ഇംഗ്ലീഷ് പ്രീമിയര്‍ ലീഗില്‍ ഫുള്‍ഹാമിനോട് ആസ്റ്റണ്‍ വില്ല 3-0 ന് തോല്‍വി വഴങ്ങിയതിനുപിന്നാലെയാണ് ജെറാര്‍ഡിനെ പുറത്താക്കിയത്.

To advertise here,

ഈ സീസണില്‍ ആസ്റ്റണ്‍ വില്ലയുടെ പ്രകടനം ദയനീയമാണ്. 11 മത്സരങ്ങള്‍ പൂര്‍ത്തിയാക്കിയ ടീം ജെറാര്‍ഡിന് കീഴില്‍ വെറും രണ്ട് വിജയങ്ങള്‍ മാത്രമാണ് നേടിയത്. മൂന്ന് സമനില നേടിയപ്പോള്‍ ആറ് മത്സരങ്ങളില്‍ തോറ്റു. നിലവില്‍ പോയന്റ് പട്ടികയില്‍ 17-ാം സ്ഥാനത്താണ് ആസ്റ്റണ്‍ വില്ല. 

11 മാസം ടീമിനെ പരിശീലിപ്പിച്ച ശേഷമാണ് ജെറാര്‍ഡ് പടിയിറങ്ങുന്നത്. കഴിഞ്ഞ നവംബറിലാണ് ജെറാര്‍ഡ് ആസ്റ്റണ്‍ വില്ലയുടെ പരിശീലകനായി സ്ഥാനമേറ്റത്. ഡീന്‍ സ്മിത്ത് പുറത്തായശേഷം പകരക്കാരനായി വന്ന ജെറാര്‍ഡ് കഴിഞ്ഞ സീസണില്‍ ടീമിനെ 14-ാം സ്ഥാനത്തെത്തിച്ചിരുന്നു. 

ജെറാര്‍ഡിന്റെ കീഴില്‍ 40 മത്സരങ്ങളിലാണ് ആസ്റ്റണ്‍ വില്ല കളിച്ചത്. അതില്‍ 13 മത്സരങ്ങളില്‍ വിജയിച്ചപ്പോള്‍ 19 കളികളില്‍ പരാജയപ്പെട്ടു. ആസ്റ്റണ്‍ വില്ലയിലെത്തുംമുന്‍പ് ജെറാര്‍ഡ് സ്‌കോട്ടിഷ് ക്ലബ്ബ് റേഞ്ചേഴ്‌സിന്റെ പരിശീലകനായിരുന്നു. 2021-ല്‍ ടീമിന് സ്‌കോട്ടിഷ് കിരീടവും നേടിക്കൊടുത്തു.