പിതാവ് ഹോർഹെ മെസ്സിയുടെ മരണത്തിനുശേഷം സാമൂഹികമാധ്യത്തിലെ കുറിപ്പിലാണ് ഇനി അധികകാലം ഫുട്ബോൾ മൈതാനത്തുണ്ടാകില്ലെന്ന സൂചന ലയണൽ മെസ്സി നൽകിയത്. അന്താരാഷ്ട്ര ഫുട്ബോളിൽ അടുത്ത കോപ്പ അമേരിക്ക ടൂർണമെന്റ് വരെ താരം തുടരുമെന്ന് ആരാധകർ കരുതിയതുമാണ്. എന്നാൽ, എല്ലാവരേയും അമ്പരപ്പിച്ച് കഴിഞ്ഞദിവസം മെസ്സി വിരമിക്കൽ പ്രഖ്യാപിച്ചു. ഇതോടെ ക്ലബ് ഫുട്ബോളിലും കൂടുതൽ സീസൺ കളിക്കാനിടയില്ല.

To advertise here,

39-കാരനായ മെസ്സിക്ക് നിലവിലെ ക്ലബ്ബമായ ഇന്റർ മയാമിയുമായി 2028 വരെ കരാറുണ്ട്. അടുത്തിടെയാണ് കരാർ പുതുക്കിയത്. കരാർ പ്രകാരം കളിക്കളത്തിൽനിന്നും പുറത്തുനിന്നുമായി 760 കോടിയോളം രൂപ വർഷത്തിൽ പ്രതിഫലമായി ലഭിക്കും. ശമ്പളം, ബോണസ് എന്നിവയ്ക്കുപുറമേ വാണിജ്യവരുമാനങ്ങളും ഇതിൽപ്പെടും. എന്നാൽ, പുതിയ സാഹചര്യത്തിൽ സീസൺ പൂർത്തിയായാൽ മെസ്സി കളിക്കളം വിടാനും സാധ്യതയുണ്ട്.

ഹോർഹെ മെസ്സിയായിരുന്നു കളിക്കളത്തിനു പുറത്തുള്ള കാര്യങ്ങൾ കൈകാര്യംചെയ്തിരുന്നത്. മെസ്സിയുടെ ഏജന്റായും മാനേജരായും പിതാവ് പ്രവർത്തിച്ചതോടെ മെസ്സിക്ക് സമ്മർദമുണ്ടായിരുന്നില്ല. പിതാവിന്റെ വിയോഗത്തോടെ ഇക്കാര്യങ്ങൾകൂടി നോക്കേണ്ട അവസ്ഥയുണ്ട്. ഇതിനുപുറമേ പിതാവുമായി വൈകാരിക അടുപ്പം സൂക്ഷിച്ചിരുന്ന താരത്തിന് മരണം ഉൾക്കൊള്ളാനുമായിട്ടില്ല. ഫുട്ബോളിൽ ഇനിയെന്തിന് തുടരണമെന്ന ചിന്തയും ശക്തമായി. അന്നത്തെ കുറിപ്പ് ഇത് സൂചിപ്പിക്കുന്നുമുണ്ട്.

കളിക്കളത്തിൽ മിന്നുന്ന ഫോമിലാണ് താരം. ഇന്റർ മയാമിക്കായി അവസാനമത്സരത്തിൽ ഹാട്രിക് അടക്കം നാലു ഗോളും നേടിയിരുന്നു. കുറച്ചുകാലംകൂടി ക്ലബ് ഫുട്ബോളിൽ മെസ്സി തുടരുമെന്നാണ് ആരാധകർ പ്രതീക്ഷിക്കുന്നത്.