മുംബൈ: ഇന്ത്യൻ ക്രിക്കറ്റ് ടീമിൽ സ്ഥാനം നിലനിർത്തണമെങ്കിൽ ഒന്നിലധികം മേഖലകളിൽ തിളങ്ങാനുള്ള കഴിവ് ഇപ്പോൾ അത്യാവശ്യമാണെന്ന് കഴിഞ്ഞ ദിവസം ഇന്ത്യയുടെ മുൻ താരം നയൻ മോംഗിയ പറഞ്ഞിരുന്നു. ദൂരദർശനിലെ ഒരു പരിപാടിയിലാണ് മോംഗിയ ട്വന്റി 20 ക്രിക്കറ്റ് താരങ്ങളുടെ മനോഭാവം മാറ്റിയതിനെ കുറിച്ച് പറഞ്ഞത്. ധ്രുവ് ജുറെലും ഇഷാൻ കിഷനും സഞ്ജു സാംസണുമെല്ലാം വിക്കറ്റ് കീപ്പർമാരാണെങ്കിലും ചിലപ്പോൾ വെറും ബാറ്റർമാരായിമാത്രം അവർക്ക് കളിക്കേണ്ടി വരുന്നുവെന്നും ഇങ്ങനെയെല്ലാം സംഭവിക്കുമെന്ന് ആരാണ് കരുതിയതെന്നും മോംഗിയ ചോദിച്ചിരുന്നു.

To advertise here,

ഇപ്പോഴിതാ ഇന്ത്യയുടെ മറ്റൊരു താരം യശസ്വി ജയ്‌സ്വാളും വിക്കറ്റ് കീപ്പിങ്ങിൽ പരിശീലനം തുടങ്ങിയിരിക്കുകയാണ്. ബാറ്റിങ്ങിനും ലെഗ് സ്പിന്നിനും ഒപ്പം വിക്കറ്റ് കീപ്പിങ്ങിലും യശസ്വി പരിശീലനം നടത്തുന്നുണ്ടെന്ന് മുംബൈ ക്യാപ്റ്റൻ സിദ്ധേഷ് ലാഡ് വ്യക്തമാക്കി. പുതിയ രഞ്ജി സീസണിന് മുന്നോടിയായി യശസ്വി വിക്കറ്റിന് പിന്നിൽ പരിശീലനം നടത്തുന്ന ചിത്രങ്ങളും പുറത്തുവന്നിട്ടുണ്ട്.

ഞായറാഴ്ച വാംഖഡെ സ്റ്റേഡിയത്തിൽ ചണ്ഡീഗഢിനെതിരെയാണ്‌ മുംബൈയുടെ ആദ്യ മത്സരം. അതിൽ യശസ്വിയുമുണ്ടാകും. എന്നാൽ ഇന്ത്യയുടെ മത്സരമുള്ളതിനാൽ മുംബൈയുടെ മറ്റു മത്സരങ്ങളിൽ യശസ്വിയുണ്ടാകില്ല.

'യശസ്വി വിക്കറ്റ് കീപ്പിങ് പരിശീലിക്കാൻ തുടങ്ങിയിട്ടുണ്ട്. ഇന്ത്യയ്ക്കും മുംബൈ ടീമിന് വേണ്ടിയും വിക്കറ്റ് കീപ്പ് ചെയ്യാനാണ് അവൻ ആഗ്രഹിക്കുന്നത്. തന്റെ കളിയിൽ മറ്റെന്തെങ്കിലും കൂട്ടിച്ചേർക്കാൻ അവന് തോന്നിയതിനാലാണ് ഇപ്പോൾ ഈ പരിശീലനം.'-സിദ്ധേഷ് ലാഡ് വ്യക്തമാക്കി.

മുൻ ഇന്ത്യൻ ക്യാപ്റ്റൻ രാഹുൽ ദ്രാവിഡ് ഒരു സ്‌പെഷ്യലിസ്റ്റ് ബാറ്ററായിട്ടാണ് തുടങ്ങിയതെങ്കിലും, ഇന്ത്യൻ ഏകദിന ടീമിലെ തന്റെ റോളിൽ മറ്റൊരു മാനം കൂടി നൽകുന്നതിനായി പിന്നീട് വിക്കറ്റ് കീപ്പിങ് ഏറ്റെടുത്തിരുന്നു. വിക്കറ്റ് കീപ്പിങ്ങിൽ യശസ്വി പുരോഗതി കൈവരിക്കുകയാണെങ്കിൽ, ഇന്ത്യൻ ക്രിക്കറ്റ് ടീമിലെ സമവാക്യങ്ങൾ മുഴുവൻ മാറിയേക്കാം.

രഞ്ജി ട്രോഫിക്ക് മുന്നോടിയായുള്ള മുംബൈയുടെ ഒരു പരിശീലന മത്സരത്തിനിടയിൽ യശസ്വി ഏകദേശം 10 ഓവർ വിക്കറ്റ് കീപ്പ് ചെയ്തിട്ടുണ്ടെന്നാണ് വിവരം. മുൻ ക്യാപ്റ്റൻ ശാർദുൽ താക്കൂറിന്റെ സേവനം ലഭ്യമല്ലാത്തതും, സീസൺ ആരംഭിക്കുന്നതിന് മുൻപ് മുൻ ക്യാപ്റ്റൻ അജിങ്ക്യ രഹാനെ എല്ലാ ഫോർമാറ്റ് ക്രിക്കറ്റിൽ നിന്നും വിരമിച്ചതിനാലും മുംബൈ ടീമിന് യശസ്വിയുടെ സാന്നിധ്യം പ്രയോജനം ചെയ്യുമെന്നും സിദ്ധേഷ് ലാഡ് പറഞ്ഞു.