റാഞ്ചി: ജയത്തുടർച്ചയിൽ കുറഞ്ഞതൊന്നും ടീം ഇന്ത്യ പ്രതീക്ഷിക്കുന്നില്ല. വെസ്റ്റിൻഡീസാകട്ടെ, മികച്ചൊരു തിരിച്ചുവരവാണ് മോഹിക്കുന്നത്. ട്വന്റി-20 ക്രിക്കറ്റ് പരമ്പരയിലെ രണ്ടാം മത്സരത്തിൽ റാഞ്ചിയിൽ ഇന്ത്യയും വിൻഡീസും മുഖാമുഖം വരുമ്പോൾ ആവേശത്തിന് കുറവൊന്നുമുണ്ടാകില്ല. വെള്ളിയാഴ്ച രാത്രി ഏഴ് മണി മുതലാണ് മത്സരം. അഞ്ച് മത്സരങ്ങളുടെ പരമ്പരയിൽ ഇന്ത്യ 1-0ത്തിന് മുന്നിലാണ്.

To advertise here,

ആദ്യ മത്സരത്തിൽ ശ്രേയസ് അയ്യരുടെ വെടിക്കെട്ടിലാണ് ഇന്ത്യ അനായാസം ജയിച്ചുകയറിയത്. 43 പന്തിൽ ആറ് സിക്‌സും 10 ഫോറും സഹിതം 102 റൺസാണ് അയ്യർ അടിച്ചുകൂട്ടിയത്. ഇേേതാടെ എട്ട് വിക്കറ്റ് വിജയമാണ് ഇന്ത്യ നേടിയത്.

ഓപ്പണിങ്ങിൽ വൈഭവ് സൂര്യവംശിക്ക് അവസരം ലഭിക്കാൻ സാധ്യത കുറവാണ്. മലയാളി താരം സഞ്ജു സാംസണും അഭിഷേക് ശർമയും കളിക്കും. സഞ്ജുവിന് ഫോമിലേക്ക് മടങ്ങിവരേണ്ടതുണ്ട്. ഇന്ത്യൻ ബാറ്റിങ് ലൈനപ്പിൽ മാറ്റത്തിന് സാധ്യത കുറവാണ്. ഇഷാൻ കിഷൻ, തിലക് വർമ എന്നിവർ കളിക്കും. ഓൾറൗണ്ടർമാരായി അക്‌സർ പട്ടേൽ, ശിവം ദുബെ, നമൻ ധിർ എന്നിവരുണ്ട്. ഓഫ് സ്പിന്നറായ നമൻ കഴിഞ്ഞ മത്സരത്തിൽ മൂന്ന് വിക്കറ്റ് വീഴ്ത്തിയത് ടീം മാനേജ്‌മെന്റിന് ആശ്വാസം പകരുന്നതാണ്. ബൗളിങ്ങിൽ പേസർ പ്രിൻസ് യാദവിന് അവസരം നൽകിയേക്കും. അങ്ങനെയെങ്കിൽ മായങ്ക് യാദവ് പുറത്തുപോകും. ചൈനാമാൻ സ്പിന്നർ കുൽദീപ് യാദവ് കളിക്കും.

വിൻഡീസ് പരമ്പരയിലേക്ക് തിരിച്ചുവരാൻ ജയം വേണം. ക്യാപ്റ്റൻ ഷായ് ഹോപ് ഫോമിലുള്ളതാണ് ടീമിന് ആശ്വാസം പകരുന്നത്. ട്വന്റി 20 സ്‌പെഷ്യലിസ്റ്റുകൾ ടീമിലുണ്ടെങ്കിലും ഫോം കണ്ടെത്താത്തതാണ് പ്രശ്‌നം സൃഷ്ടിക്കുന്നത്. ഷിംറോൺ ഹെറ്റ്‌മെയർ, റോവ്മൻ പവൽ, ഷെർഫാനെ റുഥർഫോർഡ്, റൊമാരിയോ ഷെപ്പേർഡ് തുടങ്ങി മത്സരം ഒറ്റയ്ക്ക് മാറ്റിമറിക്കാൻ കഴിയുന്ന താരങ്ങൾ ടീമിലുണ്ട്. കാമിൽ പുരാന് പകരം ആമിർ ജാങ്കോയെ ടീം പരീക്ഷിക്കാനും സാധ്യതയുണ്ട്. റാഞ്ചിയിലെ പിച്ചിൽ 2023-ന് ശേഷം രാത്രിയിൽ ട്വന്റി 20 മത്സരം നടന്നിട്ടില്ല. പിച്ചിന്റെ മുൻചരിത്രം പരിശോധിച്ചാൽ വമ്പൻ സ്‌കോറുണ്ടാകാൻ സാധ്യത കുറവാണ്. ഇവിടെ നടന്ന ഏഴ് മത്സരങ്ങളിൽ നാലിലും രണ്ടാമത് ബാറ്റ് ചെയ്ത ടീമാണ് ജയിച്ചത്.