ന്യൂഡൽഹി/ക്രൈസ്റ്റ്ചർച്ച്: ന്യൂസീലൻഡിനെതിരായ ടെസ്റ്റ് പരമ്പരയ്ക്ക് ദിവസങ്ങൾ മാത്രം ശേഷിക്കേ ഓപ്പണർ യശസ്വി ജയ്‌സ്വാളിന്റെ ഫോമിൽ ഇന്ത്യൻ ടീമിന് ആശങ്ക. ന്യൂസീലൻഡ് എ-യ്ക്കെതിരായ രണ്ടാം അനൗദ്യോഗിക ടെസ്റ്റ് മത്സരത്തിലും താരം വീണ്ടും കുറഞ്ഞ സ്‌കോറിന് പുറത്തായതോടെ പര്യടനത്തിലെ ബാറ്റിംഗ് പ്രതിസന്ധി രൂക്ഷമായിരിക്കുകയാണ്. വെറും നാലു പന്തുകൾ മാത്രം നേരിട്ട് റണ്ണൊന്നുമെടുക്കാതെയാണ് താരം പുറത്തായത്.

To advertise here,

ഹാഗ്ലി ഓവലിൽ നടന്ന മത്സരത്തിൽ ടോസ് നേടിയ ന്യൂസീലൻഡ് എ ടീം ഇന്ത്യയെ ബാറ്റിങ്ങിനയക്കുകയായിരുന്നു. ഓപ്പണറായി ക്രീസിലെത്തിയ 24-കാരനായ ജയ്സ്വാളിനെ മത്സരത്തിന്റെ ആദ്യ ഓവറിൽ തന്നെ പേസർ ഫ്രേസർ ഷീറ്റ് പുറത്താക്കി.

ന്യൂസീലൻഡിനെതിരായ പ്രധാന ടെസ്റ്റ് പരമ്പരയിൽ കെ.എൽ. രാഹുലിനൊപ്പം ഇന്ത്യയുടെ ഒന്നാം നമ്പർ ഓപ്പണറായി രംഗത്തിറങ്ങേണ്ട ജയ്‌സ്വാളിന് ന്യൂസീലൻഡ് എ-യ്ക്കെതിരായ പരമ്പരയിലെ തുടർച്ചയായ മൂന്നാം ഇന്നിങ്‌സിലും തിളങ്ങാനായില്ല.

ആദ്യ അനൗദ്യോഗിക ടെസ്റ്റിലെ രണ്ട് ഇന്നിങ്‌സുകളിൽ നിന്നായി ആകെ 22 റൺസ് മാത്രമാണ് താരത്തിന് നേടാനായത്. ആദ്യ ഇന്നിങ്‌സിൽ 17 റൺസിന് പുറത്തായ താരം, രണ്ടാം ഇന്നിങ്‌സിൽ സാക് ഗിബ്‌സന്റെ ബൗൺസർ ഗ്ലൗസിൽ ഉരസി സ്ലിപ്പിൽ ക്യാച്ചാകുകയായിരുന്നു. ക്രീസിൽ സമയം ചെലവഴിക്കാൻ അവസരം ലഭിച്ചിട്ടും റൺസ് കണ്ടെത്താൻ സാധിക്കാത്തത് താരത്തിന് വലിയ തിരിച്ചടിയാവുകയാണ്.

ഓഗസ്റ്റ് മാസത്തിനു ശേഷം റെഡ് ബോൾ ഫോർമാറ്റിൽ ഒരു അർധ സെഞ്ചുറി പോലും നേടാൻ ജയ്സ്വാളിന് കഴിഞ്ഞിട്ടില്ല. കഴിഞ്ഞ ആഴ്ച ന്യൂസീലൻഡ് എ ടീമിനെതിരേ നടന്ന ചതുർദിന മത്സരത്തിൽ 17, 5 എന്നിങ്ങനെയായിരുന്നു താരത്തിന്റെ സ്‌കോറുകൾ. കൂടാതെ രഞ്ജി ട്രോഫിയിൽ ചണ്ഡീഗഡിനെതിരെ മുംബൈയ്ക്കായി ഇറങ്ങിയപ്പോഴും 13 പന്തുകളിൽ നിന്ന് റണ്ണെടുക്കാതെയാണ് ജയ്സ്വാൾ പുറത്തായത്.

ശ്രീലങ്കൻ പര്യടനത്തിനു ശേഷം കളിച്ച ഒമ്പത് ഇന്നിങ്‌സുകളിൽ ഇത് നാലാം തവണയാണ് ജയ്‌സ്വാൾ പൂജ്യത്തിന് പുറത്താകുന്നത്. ശ്രീലങ്കയ്ക്കെതിരായ ഗാലെ ടെസ്റ്റിന്റെ രണ്ടാം ഇന്നിങ്‌സിലും താരം ഡക്കായി പുറത്തായിരുന്നു. സമനിലയിലായ ആ പരമ്പരയിലെ മൂന്ന് ഇന്നിങ്‌സുകളിൽ നിന്ന് ആകെ 77 റൺസ് മാത്രമാണ് താരത്തിന് നേടാനായത്.