മെല്‍ബണ്‍: രണ്ടാം ക്രിക്കറ്റ് ടെസ്റ്റിൽ 195 റൺസെന്ന ഓസ്ട്രേലിയയുടെ ഒന്നാമിന്നിങ്സ് സ്കോറിനെതിരേ ഇന്ത്യയ്ക്കും പതറിയ തുടക്കം. ഓപ്പണർ മായങ്ക് അഗർവാളിനെ ഒന്നാം ഓവറിൽ തന്നെ ഇന്ത്യയ്ക്ക് നഷ്ടമായി. അവസാന പന്തിൽ മിച്ചൽ സ്റ്റാർക്ക് അഗർവാളിനെ വിക്കറ്റിന് മുന്നിൽ കുടുക്കുകയായിരുന്നു. സ്കോർബോർഡിൽ ഒരു റൺ പോലും ചേർക്കും മുൻപായിരുന്നു ഇന്ത്യയ്ക്ക് ഈ ആഘാതം. എന്നാൽ, പിന്നീട് അരങ്ങേറ്റക്കാരൻ ശുഭ്മാൻ ഗില്ലും ചേതേശ്വർ പൂജാരയും ചേർന്ന് സ്കോർ മുന്നോട്ടു കൊണ്ടുപോവുകയായിരുന്നു. ഒന്നം ദിവസം പതിനൊന്ന് ഓവർ എറിഞ്ഞ ശേഷം ബെയ്ലെടുക്കുമ്പോൾ ഒരു വിക്കറ്റ് നഷ്ടത്തിൽ 36 റൺസെടുത്തു നിൽക്കുകയാണ് ഇന്ത്യ. ആതിഥേയരേക്കാൾ 159 റൺസ് പിറകിലാണ് ഇന്ത്യ. ഗിൽ 38 പന്തിൽ നിന്ന് 28 ഉം പൂജാര 23 പന്തിൽ നിന്ന് ഏഴും റൺസെടുത്താണ് നിൽക്കുന്നത്.

To advertise here,

അഡ്ലെയ്ഡിൽ നടന്ന ഒന്നാം ടെസ്റ്റിന്റെ രണ്ടാമിന്നിങ്സിൽ 36 റൺസിന് ഓൾഔട്ടായാണ് ഇന്ത്യ എട്ട് വിക്കറ്റ് തോൽവി ഏറ്റുവാങ്ങിയത്.

നേരത്തെ നിറഞ്ഞാടിയ ഇന്ത്യൻ ബൗളർമാരാണ് ഓസ്ട്രേലിയയെ 195 റൺസിൽ ഒതുക്കിയത്. ജസ്പ്രീത് ബുംറ നാലും അശ്വിൻ മൂന്നും അരങ്ങേറ്റക്കാരൻ മുഹമ്മദ് സിറാജ് രണ്ടും രവീന്ദ്ര ജഡേജ ഒരു വിക്കറ്റും വീഴ്ത്തി.

48 റണ്‍സെടുത്ത മാര്‍നസ് ലബുഷെയ്‌നാണ് ഓസ്ട്രേലിയയുടെ ടോപ് സ്‌കോറര്‍. ട്രാവിസ് ഹെഡ് 38ഉം മാത്യു വെയ്ഡ് 30  ഉം നഥാൻ ലയൺ 20 ഉം റണ്‍സെടുത്തു. ഓപ്പണര്‍ ജോ ബേണ്‍സും സ്റ്റീവന്‍ സ്മിത്തും പൂജ്യത്തിനും കാമറൂണ്‍ ഗ്രീന്‍ 12 ഉം ടിം പെയ്ന്‍ 13 ഉം പാറ്റ് കമ്മിൻസ് എട്ടും റണ്‍സെടുത്ത് പുറത്തായി.

അഡ്ലെയ്ഡിൽ നടന്ന ഒന്നാം ടെസ്റ്റിലും ഓസ്ട്രേലിയക്ക് 200 റൺസ് കടക്കാൻ കഴിഞ്ഞിരുന്നില്ല. ഒന്നാമിന്നിങ്സിൽ അവർ 191 റൺസ് ഓൾഔട്ടാവുകയായിരുന്നു.

ടോസ് നേടിയ ഓസ്ട്രേലിയ ബാറ്റിങ് തിരഞ്ഞെടുക്കുകയായിരുന്നു.

ഇന്ത്യയ്ക്കുവേണ്ടി മീഡിയം പേസര്‍ മുഹമ്മദ് സിറാജും ഓപ്പണര്‍ ശുഭ്മാന്‍ ഗില്ലും ടെസ്റ്റ് അരങ്ങേറ്റം കുറിക്കുന്നുണ്ട്.

നാല് ടെസ്റ്റുകളുള്ള പരമ്പരയിലെ ആദ്യ ടെസ്റ്റിൽ എട്ട് വിക്കറ്റിന് ഓസ്ട്രേലിയക്കായിരുന്നു ജയം.

തത്സമയ വിവരങ്ങൾ താഴെ വായിക്കാം

Content Highlights: Australia India Second Cricket Test Melbourne Boxing Day