ജൂൺ 5 പരിസ്ഥിതി ദിനാചരണം മാത്രമല്ല, പരിസ്ഥിതിവിരുദ്ധരുടെ കൂടി ദിനം

നമ്മുടെ വൻകിട അണക്കെട്ടുകളൊന്നും വെള്ളപ്പൊക്കം നിയന്ത്രിക്കാൻ പര്യാപ്തമല്ലെന്നു അത് കൈകാര്യം ചെയ്യുന്ന വൈദ്യുത ബോർഡ് തന്നെ പറയുമ്പോൾ അവക്ക് കീഴെ നമുക്കെങ്ങനെ സ്വസ്ഥമായി ഉറങ്ങാൻ കഴിയും? അണക്കെട്ടുകൾ കൊണ്ട് ഇല്ലാതായ നദീതടങ്ങൾ കയ്യേറി നമ്മൾ നിർമ്മിച്ച ബസ് സ്റ്റാന്റും മാളുകളും വിമാനത്താവളങ്ങളും വരെ അണക്കെട്ടു തുറക്കുമ്പോൾ നീരൊഴുക്കിന് തടസ്സമാകുന്നു. ‘റൂം ഫോർ റിവർ’ നടപ്പാക്കും എന്ന് പറയുന്നവർ തന്നെ ഇത്തരം ഭീമൻ നിർമ്മാണ പദ്ധതികളുമായി വരുമ്പോൾ നമ്മുടെ ഭാവി ഏറെ അനിശ്ചിതമാകുന്നു. കേരളത്തിന് കുറുകെ മുന്നൂറോളം കിമി നീളത്തിൽ പ്രളയനിരപ്പിനേക്കാൾ 5മി ഉയരത്തിൽ മതിൽകെട്ടി അതിവേഗവണ്ടി ഓടിക്കും എന്നാണു പറയുന്നത്. ഒരു മതിലും ഇല്ലാതെ തന്നെ മുങ്ങിപ്പോയ ഇടനാടാണ് നമ്മുടേത്. ഇത്തരം  നിർമ്മാണപ്രവർത്തനങ്ങൾക്കാവശ്യമായ കരിങ്കല്ലും മണ്ണും മണലും മെന്തിന് വെള്ളം പോലും ഇവിടെ നിന്ന് കിട്ടും? അങ്ങനെ മലകളെല്ലാം തുറന്നു അവയെടുത്താൽ എന്താകും കേരളത്തിന്റെ അവസ്ഥ? ഇത്തരം ചോദ്യങ്ങളെ ഇന്നും വികസനവിരുദ്ധതയായി കാണുന്ന വ്യക്തികളും പ്രസ്ഥാനങ്ങളുമാണ് ഇവിടെ അധികാരം കയ്യാളുന്നത്.
നമ്മുടെ അടിസ്ഥാനപ്രശ്ങ്ങൾ ഇന്ന് പലതാണ്. വളരെ ചെറുതെന്നു മുമ്പ് നമ്മൾ കരുതിയിരുന്ന മാലിന്യ പ്രശനം ഇന്നെത്ര രൂക്ഷമായി വളർന്നിരിക്കുന്നു.

കൊച്ചി ഒഴിച്ച് എല്ലായിടങ്ങളിലെയും കേന്ദ്രീകൃത മാലിന്യ സംസ്കരണ കേന്ദ്രങ്ങളെല്ലാം ( സംസ്കരണമൊന്നും ഇല്ല, വെറും സംഭരണകേന്ദ്രങ്ങളായിരുന്നു അവ എന്ന് അന്ന് പറഞ്ഞപ്പോൾ വിശ്വസിക്കാതിരുന്നവർ ഇപ്പോൾ അംഗീകരിക്കുന്നു) അടച്ചു പൂട്ടിയിരിക്കുന്നു. ഇനിയും പൂട്ടാത്ത കൊച്ചിയിലെ  ബ്രഹ്മപുരമാകട്ടെ ലക്ഷക്കണക്കിന് മനുഷ്യരെ രണ്ടാഴ്ച വിഷപ്പുക ശ്വസിപ്പിച്ചു എന്ന് മാത്രമല്ല ഇപ്പോൾ 94000 ടൺ വരുന്ന പ്ലാസ്റ്റിക്കും മറ്റും കത്തിച്ചതിന്റെ ചാരം കടമ്പ്ര  യാറിലേക്കും അത് വഴി കൊച്ചിക്കായലിലേക്കും തുടർന്ന് അറബിക്കടലിലേക്കും ഒഴുക്കാനും പോകുന്നു. അനേക പതിറ്റാണ്ടുകൾ ഇതിന്റെ പ്രത്യാഘാതം ഉണ്ടാകുമെന്നു അറിയാത്തവരൊന്നുമല്ല അധികാരികൾ. അഴിമതിയും കെടുകാര്യസ്ഥതയും സങ്കുചിത കക്ഷി രാഷ്ട്രീയ താലപര്യങ്ങളുമാണ് ഇതിനെല്ലാം കാരണമെന്ന് എല്ലാവർക്കും അറിയാം. എല്ലാം കഴിഞ്ഞു ഇപ്പോൾ പറയുന്നത് കൊച്ചിയിലെ മാലിന്യങ്ങളെല്ലാം വീണ്ടും ബ്ര്ഹമപുരത്തെ കേന്ദ്രത്തിലേക്ക് തന്നെ പോകുന്നു എന്നാണ്. മാർച്ചിൽ തീ പിടിചചപ്പോൾ ഇവിടെ വന്നു നമ്മുടെ മന്ത്രിമാർ നടത്തിയ പ്രസ്താവനകളെല്ലാം വെള്ളത്തിൽ വരച്ച വരകൾ മാത്രം. ഒറ്റ മഴയ്ക്ക് ആകെ  മുങ്ങിപ്പോകുന്നനഗരമാണ് കൊച്ചി. 

വേനൽക്കാലത്തു തന്നെ അകത്താകെ നിരന്തരം വെള്ളം കയറുന്ന നൂറുകണക്കിന് വീടുകൾ കൊച്ചി നഗരത്തിന്റെ ഹൃദയഭാഗത്തു തന്നെയുണ്ട്. ഇന്നേറെ വലിയ പ്രതിസന്ധിയായി വളർന്നിരിക്കുന്ന വന്യജീവികളും മനുഷ്യരും തമ്മിലുള്ള സംഘർഷം എന്തുകൊണ്ടെന്ന് ശാസ്ത്രീയമായി പറയാൻ പോലും നമുക്ക് കഴിയുന്നില്ല.  കാലാവസ്ഥാമാറ്റം നിയന്ത്രിക്കാനുള്ള ശേഷി കേരളം പോലൊരു  പ്രദേശത്തിന് കാര്യമായില്ല. എന്നാൽ കാലാവസ്ഥാ മാറ്റത്തെ  നേരിടാനും ദുരന്തങ്ങളുടെ ആഘാതം കുറക്കാനും നമുക്ക് മുന്നിൽ വഴികളുണ്ട് എന്ന് ശാസ്ത്രീയമായി തന്നെ ബോധ്യപ്പെട്ടിട്ടുണ്ട്. അതിവര്ഷത്തെയും വരൾച്ചയെയും ദുരന്തമാക്കുന്ന മനുഷ്യന്റെ ഇടപെടലുകളിൽ കാര്യമായ മാറ്റം വരുത്തിയാൽ ഇത് സാധ്യമാണ്. അതാണ് നമ്മുടെ പ്രതീക്ഷയും.
 

Representational Image | Illustration: Vijesh Viswam

ഇന്ന് സമൂഹത്തിൽ നല്ലൊരു ഭാഗത്തിനും, പ്രത്യേകിച്ച് യുവജങ്ങൾക്കു ഈ ഭീഷണിയെ പറ്റി നല്ല ധാരണയുണ്ട്. തെറ്റായ വികസനരീതികൾക്കെതിരെ ലോകമാകെ യുവജനങ്ങൾ ശബ്ദമുയർത്തുന്നു. കേരളത്തിലും സിൽവർ ലൈൻ, വിഴിഞ്ഞം തുറമുഖം, അതിരപ്പിള്ളി ജലവൈദ്യത പദ്ധതി തുടങ്ങിയവക്കെതിരെ ശക്തമായ ജനരോഷം ഉയർന്നു വരുന്നുണ്ട്. 

ഈ ശബ്ദം കേൾക്കാൻ  നമ്മുടെ ഭരണകർത്താക്കൾ തയ്യാറാകുമോ? കേവലം പ്രതിപക്ഷത്താകുമ്പോൾ ഉള്ള പരിസ്ഥതി പ്രേമത്തിനപ്പുറം ഒരു സുസ്ഥിര അതിജീവനത്തെക്കുറിച്ചു രാഷ്ട്രീയ കക്ഷികൾക്ക് ബോധ്യം ഉണ്ടാകുമോ? ഒരു പക്ഷെ കേരളം നേരിടുന്ന ഏറ്റവും വലിയ വെല്ലുവിളി ഇതാണെന്നും പറയാം. പരിസ്ഥിതി  ദിനാഘോഷങ്ങളുടെ ഭാഗമായി എവിടെയെങ്കിലും കുറച്ച്  മരങ്ങളുടെ തൈകൾ നട്ടാൽ മതിയോ? അങ്ങനെ നടന്ന തൈകൾക്കു എന്ത് സംഭവിക്കുന്നു എന്ന് പോലും തിരിഞ്ഞു നോക്കാത്തവരുടെ ആഘോഷങ്ങൾ വെറും കാപട്യമല്ലേ? കഴിഞ്ഞ രണ്ട് പതിറ്റാണ്ടിനിടയിൽ നമ്മളെല്ലാം നാട്ടു എന്നവകാശപ്പെടുന്ന തയ്യുകളുടെ ഒരു ശതമാനമെങ്കിലും വളർന്നിരുന്നു എങ്കിൽ കേരളമാകെ വനമായി മാറുമായിരുന്നില്ലേ? എന്നെ സംബന്ധിച്ചിടത്തോളം പരിസ്ഥിതിയുടെ സംരക്ഷണം എന്നത്  കേവലം ചില കാട്ടിക്കൂട്ടലുകളല്ല. മറിച്ച് അത് സമഗ്രമായ ഒരു വീക്ഷണമായാണ്. പ്രകൃതി എന്നതിലെ പരസ്പരബന്ധവും പരസ്പരാശ്രിതത്വവും മനസ്സിലാക്കാതെ എന്ത് ചെയ്യുന്നതും ദ്രോഹമാണ്. നമ്മുടെ സുഖം, സൗകര്യം, സന്തോഷം, സ്വാദ്, ലാഭം തുടങ്ങിയവയെ സംബന്ധിച്ചുള്ള ധാരണകളിൽ തിരുത്തലുകൾ  വരുത്താതെ നമ്മുടെ ജീവിതം സുരക്ഷിതമാണെന്ന് പറയാൻ കഴിയില്ല.