വിക്ടോറിയ: 2022 ട്വന്റി 20 ലോകകപ്പിലെ ആദ്യ ഹാട്രിക്ക് പിറന്നു. ഗ്രൂപ്പ് ഘട്ടത്തിലെ യു.എ.ഇ-ശ്രീലങ്ക മത്സരത്തിനിടെയാണ് ഹാട്രിക്ക് പിറന്നത്. യു.എ.ഇയുടെ കാര്ത്തിക്ക് മെയ്യപ്പനാണ് ഹാട്രിക്കിലൂടെ ആരാധകരുടെ മനം കവര്ന്നത്.
കരുത്തരായ ശ്രീലങ്കയ്ക്കെതിരേ നേടിയ ഹാട്രിക്ക് മെയ്യപ്പന്റെ സ്പിന് ബൗളിങ് മികവിന്റെ മകുടോദാഹരണമാണ്. മത്സരത്തിന്റെ 15-ാം ഓവറിലാണ് ഹാട്രിക്ക് പിറന്നത്. 15-ാം ഓവറിലെ നാലാം പന്തില് അപകടകാരിയായ ഭനുക രജപക്സയെ കാഷിഫ് ദാവൂദിന്റെ കയ്യിലെത്തിച്ചാണ് മെയ്യപ്പന് ഹാട്രിക്കിന് തുടക്കം കുറിച്ചത്. തൊട്ടടുത്ത പന്തില് മികച്ച ബാറ്ററായ ചരിത് അസലങ്കയെ വിക്കറ്റ് കീപ്പര് വൃത്യ അരവിന്ദിന്റെ കയ്യിലെത്തിച്ച് മെയ്യപ്പന് ശ്രീലങ്കയെ ഞെട്ടിച്ചു.
അടുത്തത് ഹാട്രിക്ക് പന്താണ്. നേരിടുന്നത് ശ്രീലങ്കന് നായകനും മികച്ച ഓള്റൗണ്ടറുമായ ഡാസണ് ശനക. എന്നാല് ശനകയെ നിസ്സഹായനാക്കിക്കൊണ്ട് മെയ്യപ്പന് വിക്കറ്റ് പിഴുതു. മെയ്യപ്പന്റെ ഗൂഗ്ലി വിക്കറ്റ് പിഴുതപ്പോള് ശനക അത്ഭുതത്തോടെയാണ് അത് നോക്കിനിന്നത്. ഇതോടെ മെയ്യപ്പന് ചരിത്രത്തിന്റെ ഭാഗമായി. നാലോവര് ചെയ്ത മെയ്യപ്പന് 19 റണ്സ് മാത്രം വിട്ടുനല്കി മൂന്ന് വിക്കറ്റെടുത്തു.
ട്വന്റി 20 ലോകകപ്പില് ഹാട്രിക്ക് നേടുന്ന അഞ്ചാമത്തെ മാത്രം ബൗളറാണ് മെയ്യപ്പന്. ബ്രെറ്റ് ലീ (2007), കര്ട്ടിസ് ക്യാംഫര് (2021), വാനിന്ദു ഹസരംഗ (2021), കഗിസോ റബാദ (2021) എന്നിവരാണ് ഇതിനുമുന്പ് ട്വന്റി 20 ലോകകപ്പില് ഹാട്രിക്ക് നേടിയ ബൗളര്മാര്.
ക്രിക്കറ്റ് ലോകകപ്പില് (ട്വന്റി 20, ഏകദിനം) ഒരു ടെസ്റ്റ് യോഗ്യതയുള്ള ടീമിനെതിരേ ഹാട്രിക്ക് നേടുന്ന അസോസിയേറ്റ് ടീമില് നിന്നുള്ള ആദ്യ ബൗളര് എന്ന റെക്കോഡും മെയ്യപ്പന് സ്വന്തമാക്കി.
Content Highlights: hat trick in 2022 t20 world cup, meiyappan hat trick, uae bowler hat trick, karthik meiyappan, uae
Published: 18 Oct 2022, 03:46 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented