സെന്റ് വിന്‍സന്റ്: ടി20-യില്‍ ചരിത്രമെഴുതി ഓസ്‌ട്രേലിയന്‍ പേസര്‍ പാറ്റ് കമ്മിന്‍സ്. ടി20-ലോകകപ്പില്‍ രണ്ട് ഹാട്രിക്ക് നേടുന്ന ആദ്യ താരമെന്ന ചരിത്രനേട്ടമാണ് കമ്മിന്‍സ് സ്വന്തമാക്കിയത്. ടി20-യില്‍ തുടര്‍ച്ചയായി ഹാട്രിക് നേടുന്ന ആദ്യ താരവും കമിന്‍സ് തന്നെയാണ്‌. അഫ്ഗാനെതിരായ സൂപ്പര്‍ എട്ട് മത്സരത്തില്‍ ഹാട്രിക് നേടിയതോടെയാണ് താരം റെക്കോഡ് കുറിച്ചത്. നേരത്തേ ബംഗ്ലാദേശിനെതിരേയും തുടര്‍ച്ചയായ മൂന്നു പന്തുകളില്‍ വിക്കറ്റ് നേടിയിരുന്നു.

To advertise here,

18-ാം ഓവറിലെ അവസാന പന്തില്‍ റാഷിദ് ഖാനെ പുറത്താക്കിയ കമ്മിന്‍സ് 20-ാം ഓവറിലെ ആദ്യ രണ്ട് പന്തും വിക്കറ്റെടുത്താണ് പുതുചരിത്രമെഴുതിയത്. കരിം ജാനത്ത്, ഗുല്‍ബാദിന്‍ എന്നിവരെയാണ് മടക്കിയത്. ഇതോടെയാണ് അന്താരാഷ്ട്ര ടി20-യില്‍ തുടര്‍ച്ചയായി ഹാട്രിക് നേടുന്ന ഏക ബൗളറായി കമ്മിന്‍സ് മാറിയത്. ടി20-ലോകകപ്പില്‍ രണ്ട് ഹാട്രിക് നേടിയ മറ്റൊരു താരമില്ല. 

അന്താരാഷ്ട്ര ടി20-ക്രിക്കറ്റില്‍ രണ്ട് ഹാട്രിക് നേടുന്ന അഞ്ചാമത്തെ ബൗളറാണ് കമ്മിന്‍സ്. ലസിത് മലിംഗ, ടിം സൗത്തി, മാര്‍ക് പവ്‌ലോവിക്, വസീം അബ്ബാസ് എന്നിവരാണ് ടി20-യില്‍ രണ്ട് ഹാട്രിക് സ്വന്തമാക്കിയവര്‍. 

കമ്മിന്‍സ് ചരിത്രമെഴുതിയ മത്സരത്തില്‍ പക്ഷേ ഓസീസിന് ജയിക്കാനായില്ല. 149-റണ്‍സ് വിജയലക്ഷ്യവുമായി ഇറങ്ങിയ ഓസീസിനെ 127-റണ്‍സിന് ഓള്‍ഔട്ടാക്കി അഫ്ഗാന്‍ ടി20-ലോകകപ്പില്‍ സെമിസാധ്യതകള്‍ സജീവമാക്കി.