കേരളത്തിന്റെ തേക്ക്, കർണാടകയുടെ ഗ്രാനൈറ്റ്; സ്വര്‍ണംപൂശിയത് തിരുവനന്തപുരത്തുനിന്നുള്ള ശില്‍പികള്‍

രാജസ്ഥാനിലെ ഭരത്പൂരിൽ നിന്ന് കൊണ്ടുവന്ന പിങ്ക് നിറത്തിലുള്ള സാൻഡ് സ്റ്റോണാണ് ഉപയോഗിച്ചിരിക്കുന്നത്. ഇതിനായി 4.7 ലക്ഷം അടി സാൻഡ് സ്റ്റോൺ ഉപയോഗിച്ചു.

ക്ഷേത്രത്തിന് വലയം ചെയ്ത് നിർമിക്കുന്ന മതിൽ ഉത്തരേന്ത്യൻ രീതിയിൽ പതിവില്ല. തമിഴ്‌നാട്ടിലെ ദ്രാവിഡ നിർമാണ രീതിയിലാണ് ഇത് നിർമിച്ചിരിക്കുന്നതെന്ന് മുഖ്യ എഞ്ചിനീയർ ഗിരീഷ് സഹസ്ര ഭോജിനി പറഞ്ഞു. 14 അടി വീതിയുണ്ട് ഈ ചുറ്റുവലയത്തിന്. രണ്ട് നില കെട്ടിടത്തിന്റെ ഉയരത്തിലാണ് ഈ ചുറ്റുമതിൽ നിർമിക്കുന്നത്. ക്ഷേത്രത്തിൽ വാതിൽ പാളികൾ തേക്ക് കൊണ്ടാണ് തീർത്തിരിക്കുന്നതെന്നും വാതിലിലും മറ്റുമുള്ള കൊത്തുപണികളിൽ സ്വർണം പൂശാൻ തിരുവനന്തപുരത്ത് നിന്നുള്ള ശിൽപികൾ എത്തിയിരുന്നുവെന്ന് പ്രോജക്ട് എഞ്ചിനീയർ ജഗദീഷ് മാതൃഭൂമിയോട് പറഞ്ഞു. പ്രധാന ക്ഷേത്രം കൂടാതെ അങ്കണത്തിൽ ഏഴ് ഉപക്ഷേത്രങ്ങളുമുണ്ട്. വത്മീകി, വസിഷ്ഠൻ, വിശ്വാമിത്രൻ, അഗസ്ത്യൻ, നിഷാദ രാജാവ്, ശബരി, അഹല്യ എന്നിവരാണ് ഈ ക്ഷേത്രങ്ങളിലെ പ്രതിഷ്ഠകൾ. ജഡായുവന്റെ പ്രതിമയും തെല്ലകലെയുണ്ട്.

പ്രതിദിനം പ്രതീക്ഷിക്കുന്നത് രണ്ട് ലക്ഷം തീർഥാടകരെ

രാമക്ഷേത്രത്തിൽ പ്രതിദിനം രണ്ട് ലക്ഷം പേരെയാണ് പ്രതീക്ഷിക്കുന്നതെന്ന് സംഘാടകർ. 15 മണിക്കൂറോളം ദർശന സമയമുണ്ടായിരിക്കും. ക്ഷേത്രത്തിലെത്തുന്ന ദിവ്യാംഗർ, പ്രായംചെന്നവർ, ഭിന്നശേഷിക്കാർ തുടങ്ങിയവർക്ക് പ്രത്യേക കരുതൽ ഒരുക്കിയിട്ടുണ്ടെന്ന് ചംപട്ട് റായി പറഞ്ഞു. ഇവർക്കായി ക്ഷേത്രത്തിൽ ലിഫ്റ്റുകളും റാംപുകളും ഒരുക്കിയിട്ടുണ്ട്. അടിയന്തര സാഹചര്യത്തിൽ വാഹനങ്ങൾക്ക് സഞ്ചരിക്കാനുള്ള പാതയും നിർമിച്ചിട്ടുണ്ട്. 100 വീതം ശൗചാലയങ്ങൾ അടങ്ങിയ ടോയ്‌ലറ്റ് കോംപ്ലക്‌സുകൾ നിർമിച്ചു കഴിഞ്ഞു.

ചെരിപ്പിട്ട് ക്ഷേത്രത്തിലേക്ക് പ്രവേശനമില്ല. അതിനാൽ ഒരേ സമയം ഇരുപത്തി അയ്യായിരം പേർക്ക് ചെരിപ്പ് സൂക്ഷിക്കാൻ കഴിയുന്ന സംവിധാനമടക്കം  പിൽഗ്രിമേജ് ഫെസിലിറ്റി സെന്ററും (പി.എഫ്.സി) ഒരുക്കിയിട്ടുണ്ട്. മലിന ജല നിർമാർജനം, ജല സംസ്‌കരണം എന്നിവ അടക്കമുള്ള പ്രവർത്തനങ്ങൾക്ക് നഗരസഭയെ ആശ്രയിക്കുന്നില്ല. സ്വന്തം നിലയ്ക്ക് ക്ഷേത്ര പരിസരത്ത് രണ്ട് പ്ലാന്റുകൾ സ്ഥാപിച്ചിട്ടുണ്ട്.