റിയാദ്: സൗദി അറേബ്യയുടെ തെക്കുപടിഞ്ഞാറൻ മേഖലയായ നജ്‌റാനിൽ നാഷണൽ ഗാർഡിന്റെ നിരീക്ഷണ ഹെലികോപ്റ്റർ തകർന്നുവീണ് രണ്ട് ഉദ്യോഗസ്ഥർ മരിച്ചു. സാങ്കേതിക തകരാറാണ് അപകടത്തിന് കാരണമെന്ന് യമനിലെ നിയമാനുസൃത സർക്കാരിനെ പിന്തുണയ്ക്കുന്ന സഖ്യസേനയുടെ ഔദ്യോഗിക വക്താവ് മേജർ ജനറൽ തുർക്കി അൽ മാലികി അറിയിച്ചു.

To advertise here,

സൗദി നാഷണൽ ഗാർഡിന്റെ മന്ത്രാലയത്തിന് കീഴിലുള്ള എഎച്ച്-6ഐ (AH-6i) നിരീക്ഷണ ഹെലികോപ്റ്ററാണ് അപകടത്തിൽപ്പെട്ടത്. യമൻ അതിർത്തിക്ക് സമീപം സൗദി ഭൂപ്രദേശത്താണ് ഹെലികോപ്റ്റർ തകർന്നുവീണത്. അപകടത്തിൽ ഹെലികോപ്റ്ററിലുണ്ടായിരുന്ന രണ്ട് ഉദ്യോഗസ്ഥരും മരിച്ചതായി അൽ മാലികി എക്‌സിലൂടെ പുറത്തിറക്കിയ പ്രസ്താവനയിൽ വ്യക്തമാക്കി.

മരിച്ച ഉദ്യോഗസ്ഥരുടെ കുടുംബങ്ങളോട് അൽ മാലികി അനുശോചനം അറിയിച്ചു. മരിച്ചവർക്ക് ദൈവത്തിന്റെ കാരുണ്യം ലഭിക്കട്ടെയെന്നും പ്രാർഥിച്ചു. യമനിലെ ഹൂതി മിലീഷ്യയുടെ മിസൈൽ, ഡ്രോൺ ആക്രമണങ്ങൾ വീണ്ടും ശക്തമായ സാഹചര്യത്തിൽ സൗദി അറേബ്യയിൽ സുരക്ഷാ ജാഗ്രത തുടരുന്നതിനിടെയാണ് അപകടം.

യമൻ അതിർത്തിയോട് ചേർന്നുകിടക്കുന്ന നജ്‌റാൻ മേഖലയിൽ നേരത്തെയും ഹൂതി ആക്രമണങ്ങൾ ഉണ്ടായിട്ടുണ്ട്. ഞായറാഴ്ച ഖമീസ് മുശൈത്തിലേക്ക് വിക്ഷേപിച്ച രണ്ട് ബാലിസ്റ്റിക് മിസൈലുകളും റിയാദ് മേഖലയെ ലക്ഷ്യമിട്ടെത്തിയ ഒരു ഡ്രോണും സൗദി വ്യോമപ്രതിരോധ സേന തടഞ്ഞ് നശിപ്പിച്ചതായി സഖ്യസേനാ വക്താവ് അറിയിച്ചു.

ഇതിന് മണിക്കൂറുകൾക്ക് മുമ്പ് റിയാദിലെയും ഖമീസ് മുശൈത്തിലെയും ജനങ്ങൾക്ക് സൗദി സിവിൽ ഡിഫൻസ് മൊബൈൽ ഫോൺ വഴി മുന്നറിയിപ്പ് സന്ദേശങ്ങൾ അയച്ചിരുന്നു. ആകാശത്തുനിന്നുള്ള ശത്രു ഭീഷണിയുണ്ടെന്ന് അറിയിച്ച അധികൃതർ ജനങ്ങളോട് വീടിനുള്ളിൽ സുരക്ഷിതമായി കഴിയാനും ജനലുകളിൽനിന്ന് അകന്നുനിൽക്കാനും നിർദേശിച്ചു.

ശനിയാഴ്ച റിയാദ്, കിഴക്കൻ പ്രവിശ്യ, തെക്കൻ മേഖലകൾ എന്നിവിടങ്ങളിലായി നാല് ഡ്രോണുകൾ തടഞ്ഞുനശിപ്പിച്ചതായും യമനിലെ സഅദ ഗവർണറേറ്റിൽ രണ്ട് ബാലിസ്റ്റിക് മിസൈൽ വിക്ഷേപണ സംവിധാനങ്ങൾ തകർത്തതായും സഖ്യസേന അറിയിച്ചിരുന്നു. വർഷങ്ങളായി താരതമ്യേന ശാന്തമായിരുന്ന യമൻ സംഘർഷം ജൂലൈയിൽ വീണ്ടും രൂക്ഷമായതിനെത്തുടർന്നാണ് മേഖലയിൽ ആക്രമണങ്ങൾ വർധിച്ചത്.

വിമാനത്താവളങ്ങൾ, ഊർജ നിലയങ്ങൾ, ഗതാഗത അടിസ്ഥാനസൗകര്യങ്ങൾ, മറ്റ് തന്ത്രപ്രധാന കേന്ദ്രങ്ങൾ എന്നിവ ലക്ഷ്യമിട്ട് ഹൂതി മിലീഷ്യ ആവർത്തിച്ച് മിസൈൽ, ഡ്രോൺ ആക്രമണങ്ങൾ നടത്തിയിട്ടുണ്ട്. കഴിഞ്ഞയാഴ്ച റിയാദ് വിമാനത്താവളത്തിന് നേരെയുണ്ടായ ആക്രമണത്തിൽ 13 പേർ മരിച്ചതായും നേരത്തെയുള്ള റിപ്പോർട്ടുകൾ വ്യക്തമാക്കിയിരുന്നു.

അതേസമയം, സൗദി അറേബ്യയെയും യമനിലെ സർക്കാർ നിയന്ത്രണത്തിലുള്ള പ്രദേശങ്ങളെയും അന്താരാഷ്ട്ര കപ്പൽഗതാഗത പാതകളെയും ലക്ഷ്യമിട്ടുള്ള ആക്രമണങ്ങൾ തടയുകയെന്ന ലക്ഷ്യത്തോടെ യമനിലെ ഹൂതി സൈനിക കേന്ദ്രങ്ങൾക്കും അടിസ്ഥാനസൗകര്യങ്ങൾക്കും നേരെ സൗദി നേതൃത്വത്തിലുള്ള സഖ്യസേനയുടെ വ്യോമാക്രമണങ്ങളും തുടരുകയാണ്.