മയാമി: അമേരിക്കന് മലയാളികളുടെ ക്രൈസ്തവ ആത്മീയ യാത്രക്ക് മഹത്തായ പുത്തന് അദ്ധ്യായം എഴുതി ചേര്ത്താണ് മലയാളി കത്തോലിക്ക വൈദീക സമ്മേളനത്തിന് മയാമിയില് തിരിതെളിഞ്ഞത്.
ഇന്ത്യന്-അമേരിക്കന് സമൂഹത്തില് മാത്രമല്ല വിശാലമായ അമേരിക്കന് കത്തോലിക്ക സമൂഹത്തിനായി അമേരിക്കയിലുടനീളം ഇന്ന് അഞ്ഞൂറോളം മലയാളി കത്തോലിക്ക വൈദീകര് ആത്മീയ അജപാലന ശുശ്രൂഷകളും അതോടൊപ്പം വിവിധ മേഖലകളിലും സേവനം ചെയ്തു വരുന്നു.
കേരളത്തിന്റെ ആഴമേറിയ ആത്മീയ വിശ്വാസ പാരമ്പര്യവും, ഇന്ത്യന് കത്തോലിക്ക സഭാ അനുഷ്ഠാനങ്ങളും ചേരുന്ന സീറോ മലബാര്, സീറോ മലങ്കര, ലാറ്റിന് റീത്തുകളും, ക്നാനായ സഭയും, വിവിധ സന്യാസി സമൂഹങ്ങളും കോണ്ഗ്രിഗേഷനുകളില് നിന്നുമുള്ള വൈദീകരുമാണ് ഷിക്കാഗോ സീറോ മലബാര് രൂപതയുടെ രജത ജൂബിലി ആഘോഷങ്ങളുടെ ഭാഗമായി ഇദംപ്രഥമമായി സംഘടിപ്പിക്കപ്പെട്ട അമേരിക്കന് മലയാളി കത്തോലിക്ക വൈദീക മഹാസംഗമത്തില് പങ്കെടുത്തത്.
'കൊയ്നോനിയ 2025' എന്ന് പേരുനല്കിയ ഈ വൈദീക സമ്മേളനം; വിശ്വാസ-ആത്മീയ ഐക്യത്തിന്റേയും, ഭക്തിയുടെയും, കൂട്ടായ ബലിയര്പ്പണത്തിന്റേയും, സഹവര്ത്തിത്വത്തിന്റെയും, കലാസാംസ്കാരിക-വൈഭവ സമന്വയത്തിന്റേയും, അസാമാന്യമായ ഒരു മഹോത്സവമായി തീര്ന്നു.
നവംബര് 18, 19 തിയ്യതികളിലായി നടന്ന ഈ സമ്മേളനത്തില് നൂറ്റി അമ്പതോളം വൈദീകര് പങ്കെടുത്തു.
നവംബര് 18-ാം തീയതി ചൊവ്വാഴ്ച വൈകുന്നേരം 5 മണിക്ക് കോറല് സ്പ്രിങ്സ് സെന്റ് എലിസബത്ത് ആന് സെറ്റണ് കാത്തലിക് ചര്ച്ച് മൈതാനത്ത് എത്തിച്ചേര്ന്ന മയാമി ആര്ച്ച് ബിഷപ്പ് തോമസ് വെന്സ്കി, അമേരിക്കന് ബിഷപ്പ് കോണ്ഫറന്സ് അംഗവും പെന്സിക്കോള ബിഷപ്പുമായ വില്യം എ വാക്ക്, ഷിക്കാഗോ സീറോ മലബാര് രൂപതാധ്യക്ഷന് ബിഷപ്പ് ജോയ് ആലപ്പാട്ട്, ഷിക്കാഗോ രൂപതയുടെ പ്രഥമ മെത്രാന് ബിഷപ്പ് എമിററ്റസ്, ബിഷപ്പ് ജേക്കബ് അങ്ങാടിയത്ത്, വികാര് ജനറല്മാരായ ഫാ:ജോണ് മേലേപ്പുറം, ഫാ:തോമസ് കടുകപ്പള്ളി എന്നിവരോടൊപ്പം അതിഥികളായി എത്തിയ നൂറ്റി അന്പത് വൈദികരേയും കേരള തനിമയുടെ പാരമ്പര്യം ഉണര്ത്തുന്ന താലപ്പൊലിയും, മുത്തുക്കുടകളും, ചെണ്ടവാദ്യങ്ങളുടേയും അകമ്പടിയോടെ, ചുവപ്പ് പരവതാനിയിലൂടെ നൈറ്റ് ഓഫ് കൊളംബസിന്റെ ഗാര്ഡ് ഓഫ് ഓണര് ഏറ്റുവാങ്ങി ദേവാലയത്തിലേക്ക് ഘോഷയാത്രയായി ആനയിച്ചു.
തുടര്ന്ന് അത്താഴ വിരുന്നും അതോടനുബന്ധിച്ച് നടന്ന പൊതുസമ്മേളനത്തില് ബിഷപ്പ് ജോയ് ആലപ്പാട്ട് അധ്യക്ഷത വഹിച്ചു.
ആര്ച്ച് ബിഷപ്പ് തോമസ് വെന്സ്കി, കൊയ്നോനിയയുടെ ഔപചാരികമായ ഉദ്ഘാടനം നിര്വഹിച്ചു. മലയാളി കത്തോലിക്ക വൈദിക സമൂഹം അമേരിക്കന് സമൂഹത്തിന് ചെയ്തു വരുന്ന ശുശ്രൂഷകളെയും, സേവനങ്ങളെയും അദ്ദേഹം പ്രകീര്ത്തിക്കുകയും പ്രശംസിക്കുകയും ചെയ്തു.
ബിഷപ്പ് വില്യം എ വിക്കിന്റെ പ്രചോദനാത്മക സന്ദേശത്തില് കേരള വൈദീകരുടെ തീക്ഷ്ണമായ മിഷിനറി പ്രവര്ത്തനങ്ങളെ കുറിച്ചും പ്രവാസി വിശ്വാസമൂഹത്തിന്റെ ക്രൈസ്തവ സാക്ഷ്യത്തെ കുറിച്ചും, ഒന്നുമില്ലായ്മകളില് നിന്ന് കുറഞ്ഞ സമയം കൊണ്ട് അമേരിക്കയില് സീറോ മലബാര് സഭയുടെ വളര്ച്ചയും വിശ്വാസാധിഷ്ഠിതമായ ക്രൈസ്തവ കുടുംബ ജീവിതത്തെക്കുറിച്ചും അഭിനന്ദനങ്ങള് നേര്ന്നു സംസാരിച്ചു.
ഇന്ത്യക്ക് വെളിയില് സീറോ മലബാര് സഭക്ക് ആദ്യമായി ഒരു രൂപത ഷിക്കാഗോയില് സ്ഥാപിക്കപ്പെടുകയും അതിന്റെ പ്രഥമ ബിഷപ്പാകുകയും ചെയ്ത ബിഷപ്പ് മാര് ജേക്കബ് അങ്ങാടിയത്തിന് അദ്ദേഹത്തിന്റെ എപ്പിസ്കോപ്പല് ഓര്ഡിനേഷന്റെ സില്വര് ജൂബിലി ആശംസകള് അര്പ്പിക്കുകയും, ബിഷപ്പ് ജോയ് ആലപ്പാട്ട് പൊന്നാട അണിയിച്ച് ആദരിക്കുകയും ജൂബിലി കേക്ക് മുറിച്ച് പങ്കുവെക്കുകയും ചെയ്തു.
പൊതുസമ്മേളനത്തില് സീറോ മലബാര് മേജര് ആര്ച്ച് ബിഷപ്പ് മാര് റാഫേല് തട്ടില്, കര്ദിനാള് മാര് ജോര്ജ്ജ് ആലഞ്ചേരി ക്നാനായ വികാരി ജനറല് റവ: ഫാ:തോമസ് മുളവനാല്, ഇന്ത്യന് കോണ്സില് ജനറല് അറ്റ്ലാന്റാ രമേശ് ബാബു ലക്ഷ്മണ് തുടങ്ങിയവരുടെ ആശംസാ സന്ദേശം എല്ഇഡി സ്ക്രീനില് പ്രദര്ശിപ്പിച്ചു. ഷിക്കാഗോ സീറോ മലബാര് സഭയുടെ കഴിഞ്ഞ 25 വര്ഷത്തെ ശ്രദ്ധേയമായ വളര്ച്ചയെയും, നേട്ടങ്ങളെയുംകുറിച്ചുള്ള ഡോക്യൂമെന്ററി പ്രദര്ശന വേദിയില് അവതരിപ്പിച്ചു. 2026 ജൂലൈ 9 മുതല് 12 വരെ തീയതികളില് ഷിക്കാഗോയില് വെച്ച് നടത്തപ്പെടുന്ന സീറോ മലബാര് രൂപതാ സില്വര് ജൂബിലി കണ്വെന്ഷന്റെ കിക്ക് ഓഫ് വേദിയില് നടത്തപ്പെട്ടു.
സില്വര് ജൂബിലി കണ്വെന്ഷന് ഗാനം പാടി പൊതുസമ്മേളനം സമാപിച്ചു. തുടര്ന്ന് മയാമി ഔവര് ലേഡി ഓഫ് ഹെല്ത്ത് ഫൊറോന ദേവാലയത്തിലെ പ്രതിഭാധനരായ നൂറ്റി ഇരുപത്തിയഞ്ചോളം കലാകാരന്മാര് ചേര്ന്ന് അവതരിപ്പിച്ച സ്റ്റേജ് ഷോ 'പാവനം' ഈ കലാസന്ധ്യയെ ഏറ്റവും ആകര്ഷകമാക്കി.
പൊതുസമ്മേളനത്തില് 'കൊയ്നോനിയ 2025' ചെയര്മാനും ഔവര് ലേഡി ഓഫ് ഹെല്ത്ത് വികാരിയുമായ ഫാ:ജോര്ജ്ജ് ഇളമ്പാശ്ശേരി ആമുഖ പ്രസംഗവും, വികാരി ജനറലും പ്രീസ്റ്റ് ഗാദറിങ് സഹ രക്ഷാധികാരിയുമായ വികാരി ജനറല് ഫാ:ജോണ് മേലേപ്പുറം സ്വാഗതവും, ജനറല് കണ്വീനര് ജോഷി ജോസഫ് കൃതജ്ഞതയും അര്പ്പിച്ചു. ദീപാ ദീപു പരിപാടികളുടെ എംസിയുമായി പ്രവര്ത്തിച്ചു.
മലയാളി പ്രീസ്റ്റ് സമ്മേളനം വിജയകരമാക്കുന്നതിന് ഇരുപതോളം വിവിധ കമ്മിറ്റി ചെയര്മാന്മാരും, കൈക്കാരന്മാരും, പള്ളിക്കമ്മിറ്റി അംഗങ്ങളും, അനേകം വോളണ്ടിയേഴ്സും സുമനസ്സുകളും ഈ ആത്മീയ നേതാക്കന്മാരുടെ ഒത്തുചേരലിനായി വിവിധ പരിപാടികള് സൂക്ഷ്മതയോടെ ആസൂത്രണം ചെയ്തു സഹായിച്ചു.
വാര്ത്തയും ഫോട്ടോയും : ജോയ് കുറ്റിയാനി
Content Highlights: Koinonia-2025
Published: 25 Nov 2025, 01:56 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented