ടെൽ അവീവ്: ഒക്ടോബർ 27ന് നടന്ന ഇസ്രയേൽ പാർലമെന്റ് തിരഞ്ഞെടുപ്പിന്റെ ഫലം ഔദ്യോഗികമായി ഏറ്റുവാങ്ങി പ്രസിഡന്റ് ഐസക് ഹെർസോഗ്. സെൻട്രൽ ഇലക്ഷൻസ് കമ്മിറ്റി ചെയർമാൻ ജസ്റ്റിസ് നോം സോൾബെർഗിൽ നിന്നാണ് ഇസ്രയേൽ പ്രസിഡന്റ് തിരഞ്ഞെടുപ്പ് ഫലം സ്വീകരിച്ചത്. വിദേശ ഇടപെടലിലൂടെ തിരഞ്ഞെടുപ്പ് അട്ടിമറിച്ചെന്ന് ആരോപിച്ചിട്ടുള്ള പ്രധാനമന്ത്രി ബെഞ്ചമിൻ നെതന്യാഹുവിന് തിരിച്ചടിയാണിത്. ഇതോടെ തിരഞ്ഞെടുപ്പ് ഫലം ഔദ്യോഗികമായി. അടുത്ത സർക്കാർ രൂപീകരിക്കുന്നതിനായി ഇസ്രയേൽ പ്രസിഡന്റ് പാർട്ടി പ്രതിനിധികളുമായി ഉടൻ ചർച്ചകൾ നടത്തും.

To advertise here,

തിരഞ്ഞെടുപ്പ് ഘട്ടത്തിലും അതിന് ശേഷവും അറബ് സമൂഹത്തിനെതിരെയുണ്ടായ വംശീയ പരാമർശങ്ങളെ ഇസ്രയേൽ പ്രസിഡന്റ് ഐസക് ഹെർസോഗ് അപലപിച്ചു. തിരഞ്ഞെടുപ്പിലെ അട്ടിമറി ആരോപണങ്ങൾ അന്വേഷിക്കുന്ന ഏജൻസികളിൽ തനിക്ക് 'പൂർണ്ണ ആത്മവിശ്വാസമുണ്ടെന്ന്' അദ്ദേഹം കൂട്ടിച്ചേർത്തു.

'ഷിൻ ബെറ്റ്, ഇസ്രയേൽ പോലീസ്, നിയമപാലകർ എന്നിവരുടെ പ്രവർത്തനങ്ങളിൽ എനിക്ക് പൂർണ്ണ വിശ്വാസമുണ്ട്. തിരഞ്ഞെടുപ്പ് ഫലങ്ങളിൽ വിദേശ ഇടപെടൽ ഉണ്ടെന്ന ഏതൊരു സംശയവും ഷിൻ ബെറ്റും പോലീസും സമഗ്രമായി അന്വേഷിക്കേണ്ടതാണ്. അന്വേഷണങ്ങളുടെ ഫലമായി അറബ് സമൂഹം കളങ്കപ്പെടാൻ പാടില്ല. അടുത്ത കാലത്തായി നാം കേട്ട കടുത്ത വംശീയമായ പ്രകടനങ്ങളെ ഞാൻ അപലപിക്കുന്നു. ഇസ്രയേലിലെ ഏതെങ്കിലും ഒരു സമൂഹത്തിനെതിരെ അത്തരം കാര്യങ്ങൾക്ക് സ്ഥാനമില്ല' ഹെർസോഗ് പറഞ്ഞു.

ആർക്കും കേവല ഭൂരിപക്ഷം നേടാനാകാത്തത് ചൂണ്ടിക്കാട്ടിയ ഇസ്രയേൽ പ്രസിഡന്റ് വീണ്ടും തിരഞ്ഞെടുപ്പ് നടത്തുന്നത് ഒഴിവാക്കാൻ പാർട്ടികൾ വിട്ടവീഴ്ച ചെയ്യേണ്ടതുണ്ടെന്നും പറഞ്ഞു. 120 അംഗ നെസറ്റിൽ ഭൂരിപക്ഷത്തിന് വേണ്ടത് 61 സീറ്റുകളാണ്. 53 സീറ്റുകൾ നേടി നെതന്യാഹുവിന്റെ മുന്നണി മുന്നിട്ട് നിൽക്കുന്നുണ്ടെങ്കിൽ 48 സീറ്റ് നേടിയ പ്രതിപക്ഷ ചേരി 19 സീറ്റുകൾ നേടിയ അറബ് പാർട്ടികളുമായി ചേർന്ന് സർക്കാർ രൂപീകരിക്കാനാണ് സാധ്യത. 48 സീറ്റുകൾക്കൊപ്പം അറബ് പാർട്ടികളുടെ 19 സീറ്റുകളും ചേരുമ്പോൾ ഐസൻകോട്ടിന് ആകെ 67 സീറ്റുകൾ ലഭിക്കും. ഇത് നെതന്യാഹുവിന് പകരമായി ഐസൻകോട്ടിന് സർക്കാർ രൂപീകരിക്കാനുള്ള അധികാരം ഹെർസോഗ് നൽകാൻ ഇടയാക്കിയേക്കാം. എന്നാൽ അറബ് പാർട്ടികളുമായി സഖ്യമുണ്ടാക്കുന്നത് സംബന്ധിച്ച് പ്രതിപക്ഷത്തും വിള്ളലുണ്ട്.

രാഷ്ട്രീയ പ്രതിസന്ധി ഒടുവിൽ മറ്റൊരു തിരഞ്ഞെടുപ്പിലേക്ക് നയിച്ചേക്കാമെന്ന ആശങ്കയും ഉണ്ട്. എങ്കിലും സഖ്യ ചർച്ചകളിലൂടെ പാർട്ടികൾക്ക് ഒരു ധാരണയിലെത്താൻ കഴിയുമെന്നാണ് ഇസ്രയേൽ പ്രസിഡന്റ് ആത്മവിശ്വാസം പ്രകടിപ്പിച്ചത്.