
ഉദുമ: എട്ട് വർഷം മുൻപ് മരിച്ച പ്രവാസി വ്യവസായിയുടെ വീടിനോടുചേർന്നുള്ള കെട്ടിടത്തിൽ കണ്ടെത്തിയ ആയുധങ്ങൾ പുരാവസ്തു ആകാമെന്ന് പ്രാഥമിക നിഗമനം. അന്തരിച്ച മുഹമ്മദ് കുഞ്ഞിയുടെ കോട്ടിക്കുളത്തെ സ്വകാര്യ ആശുപത്രിയുടെ പിറകിലുള്ള കെട്ടിടത്തിൽനിന്നാണ് ഈ വസ്തുക്കൾ കണ്ടെത്തിയത്. രഹസ്യവിവരം ലഭിച്ചതിനെ തുടർന്ന് കഴിഞ്ഞ 18-ന് രാത്രി പോലീസ് നടത്തിയ പരിശോധനയിൽ എട്ട് വാളുകളും മൂന്ന് തോക്കുകളും ബേക്കൽ പോലീസ് കസ്റ്റഡിയിലെടുത്തിരുന്നു.
പോലീസ്, കളക്ടർ എന്നിവർ മുഖാന്തരം റിപ്പോർട്ട് പുരാവസ്തു വകുപ്പിന് നൽകുന്നതോടെ ഇതിന്റെ നിജസ്ഥിതി, കാലപ്പഴക്കം, മൂല്യം, തുടങ്ങിയവ കണ്ടെത്താനുള്ള തുടർനടപടികളുണ്ടാകുമെന്നാണ് ലഭ്യമായ വിവരം. കേന്ദ്ര പുരാവസ്തു വകുപ്പിലെ വിദഗ്ധർ ചൊവ്വാഴ്ച ഇവ പരിശോധിച്ചു. എഎസ്ഐ തൃശ്ശൂർ ആസ്ഥാനത്തെ സൂപ്രണ്ടിങ് ആർക്കിയോളജിസ്റ്റ് വിജയകുമാർ എസ്. നായർ, ഗംഗാദേവി തുടങ്ങിയവരുടെ നേതൃത്വത്തിലുള്ള സംഘമാണ് പരിശോധനക്കെത്തിയത്.

രാജഭരണകാലത്തേതെന്ന് തോന്നിപ്പിക്കുന്ന ആയുധങ്ങളായതിനാലാണ് ആദ്യംതന്നെ ബേക്കൽ പോലീസ് കസ്റ്റഡിയിലെടുത്തത്. വീടിനോടുചേർന്നുള്ള പ്രത്യേക കെട്ടിടത്തിൽ ആയുധങ്ങൾ കൂടാതെ പുരാതന സംഗീത ഉപകരണങ്ങൾ, പാത്രങ്ങൾ, ഭരണികൾ, വിവിധതരം കുപ്പികൾ, പഴയകാലത്തെ ഫോൺ, ത്രാസ്, കളിപ്പാട്ടങ്ങൾ, വിദേശനിർമിത ചിത്രങ്ങൾ തുടങ്ങി ഒട്ടേറെ വസ്തുക്കൾ കണ്ടെത്തിയിട്ടുണ്ട്. ഈ വസ്തുക്കൾ സൂക്ഷിക്കാൻവേണ്ടി നിർമിച്ച കോൺക്രീറ്റ് കെട്ടിടത്തിലെ ഒരു മുറി തന്നെ രണ്ട് തട്ടാക്കി തിരിച്ചാണ് ഇവ വെച്ചിരുന്നത്.
സ്പെഷ്യൽ ബ്രാഞ്ച് ഡിവൈഎസ്പി സിബി തോമസ്, ഇൻസ്പെക്ടർ പി. പ്രമോദ്, ബേക്കൽ ഇൻസ്പെക്ടർ എം.വി. ശ്രീദാസ് എന്നിവരുടെ നേതൃത്വത്തിലുള്ള പോലീസ് സംഘം പരിശോധകസംഘത്തിന് സഹായവുമായി ഉണ്ടായിരുന്നു.
വിദ്യാർഥി ആയിരിക്കുമ്പോൾ തന്നെ പുരാവസ്തു ശേഖരണത്തിൽ കമ്പമുള്ളയാളായിരുന്നു മുഹമ്മദ് കുഞ്ഞിയെന്ന് ഇദ്ദേഹത്തിന്റെ സഹപാഠികളായിരുന്നവർ പറഞ്ഞു. പ്രവാസിയായശേഷം ശേഖരണം വിപുലീകരിക്കുകയായിരുന്നു. 2017-ൽ മുഹമ്മദ് കുഞ്ഞി മരിച്ചതോടെ ശേഖരമുള്ള കെട്ടിടം അടച്ചു. മക്കൾ രണ്ടുപേരും വിദേശത്താണ്.
Content Highlights: weapons found may be artifact
Published: 27 Aug 2025, 07:02 am IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..

Most Commented