പത്തനംതിട്ട: ‘ജാനകിയാന്റിയേ...എത്ര വയസ്സായി? പല്ലൊക്കെ എന്തിയേ?’ ചെറുപ്പത്തിൽ തന്നെ ലാളിച്ചും ഓമനിച്ചും വളർത്തിയ ജാനകിയാന്റിയെത്തേടി എത്തിയതായിരുന്നു മണിപ്പാലിൽ ജോലിചെയ്യുന്ന മലയാളി. 93-കാരിയായ ജാനകിയെ അദ്ദേഹം ചേർത്തുപിടിച്ചു. കുഞ്ഞുന്നാളിൽ നൽകിയ സ്‌നേഹവാത്സല്യത്തോടെ ജാനകിയും കെട്ടിപ്പിടിച്ചു. 28-29 വർഷത്തിനു ശേഷമുള്ള കൂടിക്കാഴ്ചയുടെ വീഡിയോ ഇൻസ്റ്റഗ്രാമിൽ പോസ്റ്റുചെയ്തത് മണിക്കൂറുകൾക്കകം വൈറലായി.

To advertise here,

മണിപ്പാൽ ആശുപത്രിയിൽ ഫാർമക്കോളജിസ്റ്റാണ് ഡോ.റെനോയ് ഫിലിപ്പ്. ഇവരുടെ കുടുംബം ബഹ്റൈനിലായിരുന്നു. പത്തനംതിട്ട തടിയൂരിലാണ് നാട്. 1991-ലാണ് റെനോയ് ജനിച്ചത്. ഒരു സഹായത്തിനായി നാട്ടിൽനിന്ന് ഒരാളെ വീട്ടുകാർ അന്വേഷിച്ചു. അങ്ങനെയാണ് അയിരൂർ സ്വദേശി ജാനകി ബഹ്റൈനിലേക്കെത്തിയത്. റെനോയിയെ ലാളിച്ചും ഓമനിച്ചും അവർ കൊണ്ടുനടന്നു. സ്വന്തം വീട്ടിലെ കുട്ടിയെപ്പോലെ. ഏഴെട്ടുവർഷത്തോളം ജാനകി കുടുംബത്തോടൊപ്പമുണ്ടായിരുന്നു. പിന്നീട് വീട്ടിലെ സാഹചര്യങ്ങൾമൂലം അവർക്കു നാട്ടിലേക്കുമടങ്ങേണ്ടിവന്നു. 2016-ൽ റെനോയിയുടെ കുടുംബവും തടിയൂരിലെ കാവുംതുണ്ടിയിൽ വീട്ടിലേക്കുമടങ്ങി.

പഴയകാര്യങ്ങൾ ഓർക്കാറുണ്ടായിരുന്നെങ്കിലും അമ്മ സഖിയും മറ്റ്കുടുംബാംഗങ്ങളും നാട്ടിൽവെച്ച് ജാനകിയെ നേരിട്ടു കണ്ടിരുന്നില്ല. രണ്ടാഴ്ചമുമ്പ് സഖി ഫിലിപ്പും ഭർത്താവ് കെ.എം.ഫിലിപ്പും തിരുവല്ലയിലെ സ്വകാര്യ ആശുപത്രിയിൽ ചെക്കപ്പിനു പോയപ്പോൾ കാന്റീനിൽവെച്ചാണ് യാദൃശ്ചികമായി കൂടിക്കാഴ്ചയ്ക്കു വഴിതെളിഞ്ഞത്. ’അമ്മാമ്മേ’ എന്നു വിളിച്ച് പിന്നിൽനിന്ന് ഒരാൾ വന്നതായി സഖി പറഞ്ഞു. “ആളെ മനസ്സിലായില്ല. ജാനകിയുടെ മകനാണെന്നു പറഞ്ഞു രവി. പരസ്പരം ഫോൺ നമ്പർ കൈമാറി. കഴിഞ്ഞദിവസം മകൻ ബെംഗളൂരുവിൽനിന്ന് വന്നപ്പോൾ കാര്യം പറഞ്ഞു. അങ്ങനെയാണ് കുടുംബമായി ജാനകിയെപ്പോയി കണ്ടത്”-സഖി പറഞ്ഞു.

ബഹ്റൈനിൽ സ്വന്തമായി സ്റ്റുഡിയോ നടത്തുകയായിരുന്നു ഫിലിപ്പ്. ഇവർക്ക് വേറെ മൂന്ന് ആൺമക്കൾ കൂടിയുണ്ട്. പന്ത്രണ്ടുവരെ ബഹ്റൈനിൽ പഠിച്ച റെനോയി ഫിലിപ്പ് ഫാർമക്കോളജി പഠിച്ചത് ബെംഗളൂരുവിലാണ്.