കണ്ണൂര്‍: മുഖ്യമന്ത്രിയുടെ ചിത്രമുള്ള ലൈഫ് മിഷന്‍ പരസ്യബോര്‍ഡ് മറഞ്ഞതിന് സ്‌കൂള്‍ അങ്കണത്തിലെ മരക്കൊമ്പുകള്‍ അനുവാദമില്ലാതെ മുറിച്ചതായി പരാതി. മൂന്നുപേരടങ്ങുന്ന സംഘമാണ് കണ്ണൂര്‍ താവക്കര സര്‍ക്കാര്‍ യു.പി. സ്‌കൂള്‍ അങ്കണത്തിലെ മരം മുറിച്ചുമാറ്റിയത്. അവധിയെത്തുടര്‍ന്ന് അധ്യാപകരും വിദ്യാര്‍ഥികളും ഇല്ലാതിരുന്ന ശനിയാഴ്ചയാണ് മരച്ചില്ലകള്‍ മുറിച്ചത്. പ്രധാനധ്യാപകന്‍ പോലീസിലും കണ്ണൂര്‍ കോര്‍പ്പറേഷനിലും പരാതി നല്‍കി.
ലൈഫ് മിഷന്‍ പദ്ധതിയെക്കുറിച്ച് സംസ്ഥാന സര്‍ക്കാര്‍ റോഡരികിലെ കെട്ടിടത്തിനുമുകളിലാണ് ഫ്‌ളെക്‌സ് ബോര്‍ഡ് സ്ഥാപിച്ചത്. വീടിന്റെ പാലുകാച്ചല്‍ ചടങ്ങില്‍ മുഖ്യമന്ത്രി പങ്കെടുക്കുന്നതാണ് ചിത്രം. ഫ്‌ളെക്‌സ് ബോര്‍ഡിന്റെ കാഴ്ച മറയ്ക്കുന്നതിനാല്‍ സ്‌കൂളിലെ മരം മുറിച്ചുമാറ്റണമെന്ന് സ്‌കൂളിലെ ഓഫീസ് അസിസ്റ്റന്റിനോട് ചിലര്‍ ആവശ്യപ്പെട്ടിരുന്നു. പിന്നാലെ ശനിയാഴ്ച രാവിലെ മൂന്നുപേരെത്തി സ്‌കൂള്‍ അധികൃതരുടെ അനുവാദമില്ലാതെ മരച്ചില്ലകള്‍ മുറിച്ചുമാറ്റിയെന്നാണ് പരാതി.
അവധിദിനമായതിനാല്‍ സ്‌കൂളില്‍ അധ്യാപകരും വിദ്യാര്‍ഥികളും ഉണ്ടായിരുന്നില്ല. ഫ്‌ളെക്‌സ് ബോര്‍ഡ് കാണാന്‍ വേണ്ടിയാണ് മരം മുറിക്കുന്നതെന്ന് വന്നവരും പറഞ്ഞു. ഫ്‌ളെക്‌സ് കാണത്തക്ക രീതിയിലുള്ള കൊമ്പുകള്‍ മാത്രമാണ് മുറിച്ചതായി കാണുന്നത്. സംഭവം കോര്‍പ്പറേഷനില്‍ അറിയിക്കുകയും പോലീസ് സ്‌റ്റേഷനില്‍ പരാതി നല്‍കുകയും ചെയ്തിട്ടുണ്ട്. രണ്ടു മരങ്ങളുടെ ചില്ലകളാണ് മുറിച്ചുമാറ്റിയത്. ഫ്‌ളെക്‌സ് ബോര്‍ഡിലെ ചിത്രം കാണുന്നുണ്ടെന്ന് ഉറപ്പുവരുത്താനായി, മുറിച്ചശേഷം ഫോണില്‍ ചിത്രമെടുത്തശേഷമാണ്‌ മൂന്നംഗം സംഘം മടങ്ങിയത്. ആളുകള്‍ തണല്‍ തേടി എത്തുന്ന സ്ഥലം കൂടിയാണിതെന്ന് സ്‌കൂള്‍ അധികൃതര്‍ പറയുന്നു.
Content Highlights: life mission flex board cm pinarayi vijayan face govt School compound tree braches cut
Published: 09 Oct 2023, 10:26 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented